Iusim Gud Bible
1. Long wanem wei nao Bible savve helpem olketa man?
1 Wei for iusim gud Bible savve helpem iumi for talem and teachim tru samting, and for showimaot olketa teaching and kastom wea no tru.—2 Tim. 2:15; 1 Pet. 3:15.
2. Wanem nao bae helpem iumi for faendem olketa scripture insaed Bible?
2 Savve Gud Go Moa Long Bible: Taem iumi iusim wanfala tul evritaem, bae iumi savve gud long hao for iusim datfala tul. Wei for reading full Bible savve helpem iumi for minim theme bilong Bible. Wei for duim olsem savve helpem iumi for rememberim olketa scripture and isi for faendem. Wei for savve gud long olketa Scripture bae mekem iu fit for story gud taem iu preach and taem iu duim enitaem witnessing.—1 Thess. 1:5.
3, 4. (a) Wanem nao samfala wei for helpem iumi savve gud long Bible? (b) Wanem nao samfala nara wei wea helpem iu savve gud moa long Bible?
3 Taem meeting gohed, mekem hem wei bilong iu for openem Bible and luk followim taem brata hem read from Bible. Taem iumi duim study seleva and prepare for olketa kongregeson meeting, readim and ting raonem olketa Scripture and hao iumi savve followim. Winim wei for lukluk long computer or printim Scripture from computer, plande faendem wei for read stret from Bible barava helpem olketa for faendem olketa scripture taem olketa preach.—John 14:26.
4 Samfala famili markem taem for baeheartim samfala scripture. Maet olketa savve pleim game wea wansaed long card hem garem scripture and narasaed hem garem toktok from datfala scripture. Evriwan savve garem chance for talem wanem nao datfala scripture and wanem hem talem. Wei for practice for iusim Bible for ansarem wanfala kwestin or for story long man wea no agree savve helpem iumi kamap gud go moa.
5. Why nao iumi laek for savve gud moa long Bible?
5 No eni nara buk hem gud olsem Bible. Bible nomoa garem olketa toktok wea savve helpem pipol for kamap “wise for kasem salvation.” (2 Tim. 3:15) Plande pipol long territory bilong iumi no savve long gudfala samting wea stap insaed long Bible, dastawe iumi mas savve gud go moa long Bible, mekem iumi savve teachim olketa trufala samting wea Bible talem.—Prov. 2:1-5.