‘Showimaot Long Laef Holy Spirit Strongim Iumi’
1. Wanem nao iumi shud showimaot long preaching?
1 Iumi shud no isisi long eni part long Christian ministry bilong iumi. Bible talem for ‘showimaot long laef bilong iumi hao holy spirit strongim iumi’ and for ‘waka hard for Jehovah.’ (Rom. 12:11) Bat staka samting savve spoelem strong wea iumi garem for duim ministry bilong iumi. Long wanem wei nao iumi savve mekem “kamap big olsem fire” strong wea iumi garem for duim Kingdom waka?—2 Tim. 1:6, 7.
2. Hao nao wei for studyim Bible seleva strongim iumi for duim ministry?
2 Studyim Bible Seleva: Wanfala Kingdom pablisa wea muv ahed, hem lovem law bilong God and barava tinghae long olketa tru samting wea hem lanem. (Ps. 119:97) Taem iumi studyim Bible seleva and faendem samfala niu point, datwan muvim and strongim iumi. God nao givim kam olketa Bible truth hia long iumi. And datwan mekem iumi lovem, praisem and talemaot nem bilong hem long nara pipol. (Heb. 13:15) Wei for talemaot gud nius long gudfala wei showimaot iumi barava tinghae long disfala important waka.
3. Long wanem wei nao holy spirit savve helpem iumi long ministry?
3 Prea for Holy Spirit: Iumi no savve duim gud ministry sapos iumi depend long strong bilong iumiseleva. Iumi savve garem strong for duim ministry taem God givim holy spirit long iumi. (1 Pet. 4:11) Wei for fren gud witim God wea ‘evri paoa’ kam from hem bae barava strongim iumi long spiritual wei for no fraet for witness. (Isa. 40:26, 29-31) Taem aposol Paul kasem hard taem long ministry, ‘God helpem hem for gohed.’ (Acts 26:21, 22) Holy spirit bilong Jehovah wea muvim man savve helpem iumi for strong long ministry, and iumi shud prea for datwan.—Luke 11:9-13.
4. Wanem gud samting nao savve kamaot sapos iumi garem wei for strong, bat wanem nao iumi shud tingim?
4 Wei for barava strong for preach abaotem Kingdom savve muvim olketa brata and sista for strong long ministry. (2 Cor. 9:2) Pipol wea iumi preach long olketa bae laek for lisin taem iumi story long wei for showimaot interest and strongfala biliv. Bat wei for strong mas showaot long wei wea iumi hambol and tingim man. (Titus 3:2) Evritaem, iumi trae for tingim feeling bilong haosholder and respectim wei wea hem garem right for chusim samting.
5. Wanem Bible kaonsel nao iumi shud trae hard for followim?
5 Iumi pipol for preach abaotem Kingdom, so iumi mas evritaem showimaot hao ‘holy spirit strongim iumi.’ Iumi savve gohed strong taem iumi studyim Bible seleva and prea from heart long Jehovah, from hem nao savve givim kam holy spirit. Long wei olsem, iumi savve gohed strong for duim ministry taem iumi garem “holy spirit and strongfala biliv.”—1 Thess. 1:5.