Wanem Nao Mekem Man Savve Teach Gud?
1. Wanem nao mekem man savve teach gud?
1 Wanem nao mekem man for savve gud hao for teachim Bible? Waswe, man mas garem big education, experience, or savve? Nomoa, man mas garem love. Sapos man garem love, datwan minim hem followim full Law nao. Love nao mekem pipol luksavve hu nao olketa trufala disaepol bilong Jesus. Love hem main fasin bilong Jehovah. (John 13:35; Gal. 5:14; 1 John 4:8) Man wea savve teach gud hem man wea showimaot love.
2. Why nao hem important for iumi lovem pipol?
2 Lovem Pipol: Jesus wea hem Nambawan Teacher, hem showimaot love long pipol, and diswan mekem olketa laek lisin long hem. (Luke 5:12, 13; John 13:1; 15:13) Sapos iumi tingim pipol, bae iumi iusim evri chance for preach long olketa. Wei wea pipol againstim iumi or no interest for lisin bae no stopem iumi for duim diswan. Bae iumi interest long olketa wea iumi meetim, and changem story bilong iumi for fitim samting wea olketa wari abaotem. Bae iumi willing for spendem taem witim each Bible student and bae iumi prepare gud firstaem for each study tu.
3. Hao nao wei for tinghae long truth insaed Bible bae helpem iumi taem iumi duim ministry?
3 Tinghae Long Truth Insaed Bible: Jesus tinghae tu long olketa tru teaching and hem ting long olketa olsem barava spesol samting. (Matt. 13:52) Sapos iumi tinghae long truth, bae iumi hapi tumas for storyim, and datwan savve mekem pipol barava interest for herem story bilong iumi. Taem iumi duim ministry, wei for tinghae olsem bae helpem iumi for no feel olsem iumi no fit, bat bae iumi tingim disfala important message and no fraet for storyim.
4. Wanem nao iumi savve duim mekem iumi gohed for showimaot love?
4 Gohed for Showimaot Love: Wanem nao iumi savve duim mekem iumi lovem pipol? Iumi bae lovem pipol sapos iumi tingim love wea Jehovah and Son bilong hem showimaot, and sapos iumi tingim wei wea pipol long territory hangre long spiritual wei. (Mark 6:34; 1 John 4:10, 11) Iumi bae tinghae long truth insaed Bible taem iumi study seleva evritaem and ting raonem wanem iumi studyim. Holy spirit savve mekem iumi for showimaot love. (Gal. 5:22) So iumi savve prea long Jehovah for holy spirit and askem hem for helpem iumi gohed for showimaot love. (Luke 11:13; 1 John 5:14) Nomata wanem kaen education, experience or savve iumi garem, iumi fit for kamap man wea savve gud hao for teachim Bible sapos iumi gohed showimaot love.