Luksavve Long Danger and Iusim Gud Tingting Long Ministry
1. Why nao iumi mas lukaot and garem gudfala tingting taem iumi duim ministry?
1 Pipol bilong Jehovah preach “midolwan long olketa nogud pipol” so olketa “olsem olketa sheepsheep midolwan olketa wild dog.” (Matt. 10:16; Phil. 2:15) Distaem iumi herem nogud nius abaotem pipol wea againstim gavman, pipol wea faet and riot, and pipol wea kidnapim narawan. Evri samting hia showimaot olketa nogud man kamap “worse moa.” (2 Tim. 3:13) Olketa wanem Bible principle nao bae helpem iumi for “lukaot and garem gudfala tingting” taem iumi duim ministry?—Matt. 10:16.
2. Taem iumi preach, wanem nao maet happen wea mekem iumi need for go preach long nara ples?
2 Luksavve and Duim Samting: Proverbs 22:3 mekhae long wei for “luksavve long trabol and protectim iumiseleva.” Lukaot gud evritaem! Taem iumi preach maet evri samting gohed gud nomoa bat seknomoa samting happen nao. Maet iu lukim staka police kam or staka pipol hipap tugeta. Samfala taem samwan long territory savve warnim iu abaotem eni samting wea gohed. Winim wei for stap raon long there and laek for savve wanem nao gohed, hem wise for lusim datfala ples kwiktaem and go preach long nara ples.—Prov. 17:14; John 8:59; 1 Thess. 4:11.
3. Hao nao iumi savve followim Ecclesiastes 4:9 long ministry?
3 Waka Tugeta: Ecclesiastes 4:9 sei: “Tufala man nao winim wanfala man.” Maet bifor iu feel sef for duim ministry seleva nomoa, bat waswe, hem sef yet distaem? Long samfala ples hem sef. Bat long olketa nara ples hem no sef for wanfala sista or wanfala young wan for preach seleva long haos tu haos, especially long evening. Staka taem hem moabeta for iumi preach witim narawan mekem hem tu savve helpem iumi for luksavve long eni danger. (Eccl. 4:10, 12) Hem gud for each wan long iumi mek sure evriwan long grup sef. Evritaem talem olketa narawan sapos iu bae lusim territory.
4. Wanem nao iumi savve duim for mekem evriwan long kongregeson stap sef?
4 From hem responsibility bilong olketa elder for ‘lukaftarem evriwan’ long kongregeson, hem stret for olketa talem iumi wanem for duim fitim ples wea iumi stap, mekem iumi stap sef. (Heb. 13:17) Taem iumi hambol and willing for duim wanem olketa talem, Jehovah bae blessim iumi. (Mic. 6:8; 1 Cor. 10:12) Iumi laek for gohed duim gud preaching waka long olketa territory bilong iumi, bat iumi mas lukaot and garem gudfala tingting.