Mekem Hem Wei Bilong Iumi for No Leit
1. Jehovah hem showimaot gudfala example long wanem samting?
1 No enitaem Jehovah hem leit. Olsem example, hem duim samting long ‘taem wea iumi needim help.’ (Heb. 4:16) And tu, hem givim iumi spiritual kaikai “long barava taem.” (Matt. 24:45) So iumi savve trustim hao datfala day bilong kros bilong Jehovah “bae no leit.” (Hab. 2:3) Iumi kasem gud samting from Jehovah hem no leit! (Ps. 70:5) Bat from iumi no perfect and iumi savve busy tumas, maet hem no isi for iumi followim taem. Why nao iumi shud mekem hem wei bilong iumi for no leit?
2. Sapos iumi followim taem, hao nao datwan mekem Jehovah kasem praise?
2 Long olketa last day distaem, wea pipol tingim olketa seleva nomoa and no savve kontrolem seleva, olketa tingse hem no important for followim taem. (2 Tim. 3:1-3) So taem olketa Christian no leit long waka, followim taem wea olketa markem for meetim samwan, and no leit long olketa meeting, pipol tinghae long datwan, and wanem olketa duim mekem Jehovah kasem praise. (1 Pet. 2:12) Waswe, iumi followim taem long waka bilong iumi for selen, bat staka taem iumi leit long olketa spiritual program? Sapos iumi arrive long meeting bifor song and prea hem start, datwan showimaot iumi laek followim example bilong God wea no laekem eni samting for olobaot.—1 Cor. 14:33, 40.
3. Taem iumi no leit, hao nao datwan showimaot iumi tingim olketa narawan?
3 Wei for followim taem showimaot iumi tingim olketa narawan tu. (Phil. 2:3, 4) Olsem example, taem iumi no leit long olketa meeting and grup for field service, bae iumi no duim eni samting wea savve disturbim olketa nara brata and sista. Bat sapos hem wei bilong iumi for leit olowe, maet olketa narawan tingse iumi tingim iumiseleva nomoa and no tingim olketa. Sapos iumi followim taem, pipol bae trustim iumi and bae luksavve iumi man for waka and duim wanem iumi talem.
4. Wanem nao iumi savve duim sapos iumi leit staka taem?
4 Sapos iu leit staka taem, hem gud for ting raonem why nao iu olsem. Garem schedule wea bae helpem iu for duim samting long stretfala taem, and datwan bae helpem iu for no leit. (Eccl. 3:1; Phil. 1:10) Askem Jehovah for helpem iu. (1 John 5:14) Taem iumi no leit iumi showimaot iumi tinghae long tufala law wea important winim eni nara law, wea hem nao for lovem God and lovem narawan.—Matt. 22:37-39.