Iumi Talemaot Nius Abaotem Kingdom for 100 Year Finis!
1. Klosap 100 year go finis, wanem nao Brata Rutherford encouragem pipol bilong Jehovah for duim?
1 Klosap 100 year go finis, Brata Rutherford talem disfala toktok: “King hem rul distaem! Iufala nao mas talem pipol abaotem hem. So talemaot, talemaot, talemaot nius abaotem King and kingdom bilong hem.” Hem encouragem pipol bilong Jehovah for talemaot datfala nius abaotem Kingdom long evri ples, and iumi duim datwan! Olsem olketa Christian long first century, iumi preachim gud nius abaotem Kingdom long “evriwan long earth.” (Col. 1:23) Wanem nao iumi duim insaed long 100 year wea go pas for talemaot nius abaotem Kingdom bilong God? Wanem moa iumi savve duim for talemaot datwan?
2. Hao nao olketa pablikeson bilong iumi helpem pipol for savve abaotem Kingdom bilong God?
2 Wanem Iumi Duim Finis: For staka year finis, iumi iusim olketa pablikeson bilong iumi for helpem pipol savve abaotem Kingdom bilong God. Start long 1939 main magasin wea iumi iusim, garem title: Wastaoa wea Talemaot Kingdom Bilong Jehovah. Staka taem disfala magasin story abaotem Kingdom and wanem datfala Kingdom bae duim. Awake! magasin tu mekhae long wei wea Kingdom bilong God nomoa savve stretem evri problem bilong olketa man. Dastawe hem barava fitim hao no eni nara magasin stap long staka languis olsem Wastaoa and Awake!, and staka pipol readim tufala magasin hia winim eni nara magasin!—Rev. 14:6.
3. Wanem nao samfala samting wea iumi iusim for helpem pipol savve abaotem Kingdom?
3 Pipol bilong Jehovah iusim olketa nara samting tu for helpem pipol savve abaotem Kingdom. Long bifor, Olketa Jehovah’s Witness savve iusim olketa car wea garem speaker antap, olketa radio program, and olketa phonograph. Long datfala taem olketa samting hia helpem iumi for talemaot gud nius long staka pipol, nomata iumi no garem staka pablisa. (Ps. 19:4) Distaem iumi garem staka information long Web site bilong iumi, jw.org. Datwan helpem staka million pipol for lane abaotem Kingdom bilong God, nomata pipol wea stap long ples wea olketa tambuim waka bilong iumi tu.
4. Wanem nao samfala difren wei wea iumi helpem pipol for savve abaotem Kingdom?
4 Pipol bilong Jehovah iusim olketa difren wei tu for helpem pipol savve abaotem Kingdom. Olsem example, start long 1994, iumi start for preach long olketa pablik ples, olsem long olketa park, ples for parkim trak, and long bisnis territory. No longtaem go nomoa, olketa branch arrangem spesol wei for duim pablik witnessing long olketa taon long samfala kantri long world. And tu, staka kongregeson iusim tebol or trolley long territory bilong olketa for duim pablik witnessing long ples wea staka pipol savve go pas. Nomata olsem, main wei iumi helpem pipol savve abaotem Kingdom hem for preach from haos tu haos. —Acts 20:20.
5. Long niu service year, staka bae garem chance for duim olketa wanem samting?
5 Wanem Moa Iumi Savve Duim: Staka brata and sista bae kamap regular pioneer long niu service year wea bae start long September. Waswe, iu savve joinim olketa for duim datwan? Sapos nomoa, waswe, iu savve auxiliary pioneer long samfala month? Nomata sapos iu savve pioneer or nomoa, Jehovah bae blessim iu for eni samting iu duim or sakrifaesim mekem iu savve busy long waka for talemaot gud nius abaotem Kingdom.—Mal. 3:10.
6. Why nao October 2014 hem wanfala spesol month?
6 Kingdom bilong God hem start for rul long October 1914, so long October bilong disfala year, hem bae mek-100 year bilong datfala Kingdom for rul. Evri article long pablik Wastaoa wea iumi bae givimaot long datfala month bae storyim Kingdom bilong God. Hem gud for iumi traem best for givimaot disfala magasin long staka pipol. Taem iumi weitim Kingdom for kam, iumi laek for gohed talemaot “datfala gud nius abaotem Kingdom bilong God” long evriwan wea laek for lisin.—Acts 8:12.