Marit​—Hem for Full Laef

Taem Christian garem gudfala marit, datwan hem givim praise lo Jehovah and hem mekem hasband and waef for hapi. (Mr 10:9) For marit hem hapi and stap olowe, wanfala Christian mas followim olketa Bible principle taem hem chusim samwan for maritim.

No frenim samwan sapos iu “young tumas,” bikos lo datfala taem feeling for laek duim sex hem strong, and hem savve affectim hao iu mekem olketa disison. (1Co 7:36) Iusim gud taem wea iu singol yet for strongim frenship blo iu witim God and for mekem grow olketa Christian wei. Then, datwan bae helpem iu for duim olketa samting wea bae mekem iu garem gudfala marit.

Bifor iu agree for maritim samwan, hem important for tek taem for barava savve gud hu nao hem. (1Pe 3:4) If iu daotem samfala samting, hem gud for iu discussim datwan witim hem. Taem iu garem olketa frens, wei for givim samting hem moa important winim wei for kasem samting, marit hem olsem tu. (Php 2:3, 4) If iu followim olketa Bible principle bifor iu marit, iu bae mekem gudfala faondeson for garem hapi marit.

WATCHIM VIDEO REDI FOR MARIT​—PART 3: “TING RAONEM FIRSTAEM,” AND THEN ANSAREM OLKETA KWESTIN HIA:

• Wat nao happen taem disfala sista frenim Shane?

• Wat nao hem lukim taem hem start for savve gud lo Shane?

• Hao nao parents helpem hem, and wat nao wise disison wea hem mekem?