Wat Nao Iumi Savve Duim for Hapi?

1. Wat nao Jesus sei bae mekem iumi hapi?

IUMI savve hapi nomata iumi kasem samfala hard taem. Hao nao olsem? Jesus storyim datwan lo Sermon lo Maunten. Hem sei: “Olketa wea luksavve olketa needim God bae hapi.” (Matt. 5:3) Jesus savve Jehovah wakem iumi for laek savve lo hem and for worshipim hem. And from Jehovah hem “datfala hapi God,” olketa wea worshipim hem savve hapi tu.​—1 Tim. 1:11.

2-3. (a) Waswe, iumi savve hapi nomata iumi deal witim olketa hard samting? (b) Wat nao bae iumi storyim lo disfala article, and hao nao datwan savve helpem iumi?

² Waswe, iumi savve hapi nomata iumi deal witim olketa hard samting? Ia. Lo datfala sermon, Jesus sei “olketa wea barava sorre bae hapi.” Maet olketa sorre from olketa duim sin or from nogud samting wea happen lo olketa. Jesus sei tu “olketa wea nara pipol spoelem olketa from olketa duim samting wea stret,” bae hapi, and olketa wea pipol “tok daonem” olketa from olketa disaepol blo Jesus bae hapi. (Matt. 5:4, 10, 11) Bat hao nao iumi savve hapi nomata iumi feisim olketa samting olsem?

³ Jesus sei nomata iumi deal witim samfala hard samting, iumi savve hapi sapos iumi savve lo God and fren gud witim hem. (Jas. 4:8) Wat nao bae helpem iumi for duim olsem? Lo disfala article bae iumi storyim thrifala samting wea iumi need for duim for hapi.

FEEDIM IUMISELEVA LO SPIRITUAL WEI

4. Wat nao first samting iumi savve duim for hapi? (Sams 1:1-3)

⁴ FIRST SAMTING: For iumi hapi, iumi mas feedim iumiseleva lo spiritual wei. Jesus comparem toktok lo Bible witim kaikai. Olketa human being and olketa animal need for kaikai mekem olketa laef. Bat olketa human being nomoa savve readim Bible, and iumi need for duim datwan. Dastawe Jesus sei: “Samting wea mekem man laef nao, hem no kaikai nomoa, bat hem evri toktok wea kamaot from mouth bilong Jehovah.” (Matt. 4:4) So hem important for readim Bible evriday. Wanfala psalm hem sei: “Olketa pipol ya i hapi bikos olketa falom Lo blong [Jehovah], an oltaem olketa gohed fo ridim an tingting long hem evri de an evri naet.”​—Readim Sams 1:1-3.

5-6. (a) Wat nao iumi savve lanem lo Bible? (b) Hao nao Bible reading savve helpem iumi?

⁵ From Jehovah lovem iumi, hem iusim Bible for talem iumi wanem for duim mekem iumi garem hapi laef. Iumi lanem wat nao plan blo hem for iumi, hao iumi savve fren gud witim hem, and hao for kasem forgiveness for olketa sin blo iumi. And tu, iumi lane abaotem nambawan hope wea hem promisim for iumi lo future. (Jeremaea 29:11) Olketa truth hia wea iumi lanem lo Bible hem mekem iumi hapi!

⁶ Iumi savve Bible garem tu staka gud advaes for helpem iumi. Taem iumi followim advaes hia, iumi savve hapi. Taem iumi kasem olketa problem wea mekem iumi discourage, spendem moa taem for readim and ting raonem toktok lo Bible. Jesus sei: “Olketa wea herem toktok bilong God and obeyim datwan nao olketa hapi!”​—Luke 11:28.

7. Wat nao bae helpem iu for enjoyim Bible reading?

⁷ Taem iu readim Bible, no readim kwiktaem. Tingim disfala example. Samwan kukim for iu fevaret kaikai blo iu. Bat maet from iu busy or tingim nara samting, iu kaikai kwiktaem nomoa and no teistim nao datfala kaikai. Bihaen iu kaikai iu luksavve iu kaikai fast tumas, and iu wish nomoa iu isisi kaikai mekem iu enjoyim kaikai hia. Waswe, enitaem iu readim Bible kwiktaem tumas and bihaen iu no savve tingim wat iu read abaotem? Taem iu readim Bible, hem gud for tingim wanem iu bae lukim and herem sapos iu lo there, and tu, tek taem for ting raonem wanem iu readim. Taem iu duim olsem, bae iu enjoyim Bible reading blo iu.

8. Hao nao “datfala wakaman wea faithful and wise” provaedem spiritual kaikai for iumi? (Lukim tu footnote.)

⁸ Jesus markem “datfala wakaman wea faithful and wise” for givim spiritual kaikai lo barava taem, and distaem iumi barava kaikai gud.b (Matt. 24:45) Evri samting wea datfala faithful wakaman provaedem hem kam from Bible. (1 Thess. 2:13) Olketa spiritual kaikai hia helpem iumi for savve lo tingting blo Jehovah wea Bible storyim. Dastawe iumi laek for readim olketa Wastaoa and Wekap! magasin and olketa article lo jw.org, prepare for olketa midol week and weekend meeting, and watchim each program wea kamap evri month lo JW Broadcasting^®. Sapos iumi evritaem feedim iumiseleva lo spiritual wei, datwan bae helpem iumi for duim mek-tu samting wea bae mekem iumi hapi.

FOLLOWIM OLKETA STANDARD BLO JEHOVAH

9. Wat nao mek-tu samting wea bae mekem iumi hapi?

⁹ MEK-TU: For iumi hapi, iumi need for followim olketa standard blo Jehovah. Wanfala psalm hem sei: ‘Pipol wea tinghae long Jehovah, an falom toktok blong hem, olketa nao hapi.’ (Sams 128:1) From iumi respectim Jehovah, iumi no laek for duim eni samting wea bae mekem hem no hapi. (Provebs 16:6) So iumi laek gohed tinghae lo wanem God sei hem stret and no stret wea Bible storyim. (2 Cor. 7:1) Taem iumi duim wanem Jehovah hapi lo hem and no duim olketa samting wea hem heitim, datwan bae helpem iumi for hapi.​—Sams 37:27; 97:10; Rome 12:9.

10. Olsem Rome 12:2 storyim, wat nao iumi need for duim?

¹⁰ Readim Rome 12:2. Samwan maet savve Jehovah garem raet for disaedem wanem hem stret and no stret, bat hem mas disaed for followim olketa standard blo God tu. For example, samwan maet savve gavman garem raet for markem speed limit for olketa road. Bat hem maet no laek followim speed limit hia, and hem draev fast winim datwan. So wanem iumi duim bae showimaot iumi sure hao best samting, hem for followim olketa standard blo Jehovah. (Provebs 12:28) David garem datfala tingting bikos hem sei olsem abaotem Jehovah: “Yu bin som mi olketa wei fo kasem tru laef, an taem yu stap wetem mi, bae yu mekem mi hapi fogud.”​—Sams 16:11.

11-12. (a) Taem iumi wari or discourage, wat nao iumi mas careful lo hem? (b) Hao nao Philippi 4:8 savve helpem iumi for followim olketa standard blo Jehovah?

¹¹ Taem iumi warim samting or discourage, maet iumi laek for duim samting wea mekem iumi for hapi and mekem iumi no tingim olketa wari blo iumi. Nomata olsem, iumi mas careful for no duim samting wea Jehovah heitim.​—Eph. 5:10-12, 15-17.

¹² Lo leta blo Paul for olketa Christian lo Philippi, hem encouragem olketa for gohed tingim olketa samting wea ‘raeteous, klin, and gud.’ (Readim Philippi 4:8.) So hem gud for tingim sapos olketa song wea iumi chus for lisin lo hem, olketa movie wea iumi bae watchim, olketa buk wea iumi laek readim, or olketa video game wea iumi bae pleim olketa raeteous, klin, and gud. Datwan bae helpem iumi for luksavve sapos wanem iumi chus for duim hem bae mekem God hapi or nomoa. Iumi laek for followim olketa hae standard blo Jehovah. (Sams 119:1-3) Then from iumi garem gudfala konsens, datwan bae helpem iumi for duim mek-thri samting wea bae mekem iumi hapi.​—Acts 23:1.

FOR WORSHIPIM JEHOVAH HEM MAS MAIN SAMTING

13. Wat nao mek-thri samting wea bae mekem iumi hapi? (John 4:23, 24)

¹³ MEK-THRI: Mek sure worship blo iumi for Jehovah hem main samting lo laef blo iumi. From Jehovah nao Creator, iumi shud worshipim hem. (Rev. 4:11; 14:6, 7) So hem important for worshipim hem lo stretfala wei, wea minim for “worshipim hem followim holy spirit and followim samting wea tru.” (Readim John 4:23, 24.) Iumi laekem holy spirit for helpem iumi for worshipim Jehovah followim olketa tru teaching lo Bible. Worship blo iumi mas main samting lo laef, nomata iumi stap lo ples wea gavman banim waka blo iumi. Distaem, winim 100 brata and sista stap lo prison bikos olketa Jehovah’s Witness.c Bat olketa hapi from olketa duim best blo olketa for gohed prea, study, and talem olketa narawan abaotem God and Kingdom blo hem. Nomata pipol tok spoelem iumi or persecutim iumi, iumi savve hapi from iumi savve Jehovah hem stap witim iumi and bae hem rewardim iumi.​—Jas. 1:12; 1 Pet. 4:14.

EXPERIENCE BLO WANFALA BRATA

14. Wat nao happen lo wanfala brata lo Tajikistan, and why nao olsem?

¹⁴ Experience blo staka brata and sista showimaot olketa hapi taem olketa duim thrifala samting wea iumi storyim finis, nomata olketa deal witim hard samting. Tingim example blo Jovidon Bobojonov from Tajikistan, wea 19 years. From hem no joinim army, lo October 4, 2019 olketa tekem hem from haos blo hem, putim hem lo prison for samfala month, and treatim hem olsem criminal. Diswan kamap lo nius lo staka kantri. Olketa whipim hem nogud for trae mekem hem joinim army and olketa forcem hem for werem uniform blo army. Bihaen datwan, kot sendem hem lo raf prison from olketa sei hem guilty. Hem stap lo there go kasem taem president blo kantri givim order for releasem hem. Nomata Jovidon feisim olketa hard samting hia, hem gohed hapi and faithful lo Jehovah. Why nao olsem? Bikos hem evritaem duim olketa spiritual samting.

15. Hao nao Jovidon feedim hemseleva lo spiritual wei taem hem stap lo prison?

¹⁵ Taem Jovidon stap lo prison, hem gohed feedim hemseleva lo spiritual wei, nomata hem no garem Bible or eni pablikeson blo iumi. Hao nao hem duim datwan? Olketa brata and sista wea tekem kam kaikai for hem, raetem text for datfala day lo olketa plastic wea olketa tekem kam kaikai insaed. Datwan minim evriday hem savve readim samting from Bible and ting raonem. Bihaen hem release from prison hem talem disfala advaes for olketa wea no feisim yet olketa hard taem: “Hem barava important for iusim freedom wea iumi garem distaem for readim Bible and olketa pablikeson blo iumi mekem iumi savve gud lo Jehovah.”

16. Wat nao Jovidon savve tingting abaotem?

¹⁶ Jovidon followim olketa standard blo Jehovah. Hem no tingim or duim olketa nogud samting bat hem ting raonem olketa gudfala samting wea Jehovah duim for hem. Jovidon tinghae lo nambawan creation blo God. Evri morning taem hem wekap, hem lisin lo krae blo olketa bird. Lo naet hem lukluk lo moon and olketa star. Hem sei: “Creation blo Jehovah hem olsem present wea mekem mi hapi and strongim mi.” Taem iumi tinghae lo olketa spiritual and physical samting wea Jehovah provaedem, datwan mekem iumi hapi and helpem iumi for no givap.

17. Sapos samwan kasem test olsem Jovidon, why nao hem gud for tingim toktok lo 1 Peter 1:6, 7?

¹⁷ Jovidon mek sure worship blo hem for Jehovah nao main samting lo laef blo hem. Hem luksavve hem important for gohed faithful lo Jehovah. Jesus sei: “Iu mas baodaon long God bilong iu Jehovah, and iu mas worshipim hem nomoa.” (Luke 4:8) Olketa komanda blo army and olketa soldia laekem Jovidon for lusim religion blo hem. Bat hem prea lo Jehovah evriday and evri naet, and askem hem for helpem hem for no givap. Nomata hem kasem staka nogud samting, hem gohed faithful. ‘Faith blo hem kasem test’ bikos olketa tekem hem from haos, whipim hem, and putim hem lo prison. Bat evri samting hia strongim faith blo hem, and datwan mekem hem hapi distaem.​—Readim 1 Peter 1:6, 7.

18. Wat nao iumi savve duim for mekem iumi hapi?

¹⁸ Jehovah savve lo wanem iumi need for duim for mekem iumi hapi. Sapos iumi duim thrifala samting for mekem iumi hapi wea iumi storyim finis, iumi savve gohed hapi nomata iumi kasem olketa hard samting. Then bae iumi fit for sei: ‘Olketa pipol wea Jehovah nao God blong olketa, olketa nao hapi!’​—Sams 144:15.