“Pipol wea Gohed Faithful” lo Jehovah Olketa Hapi

1-2. (a) Wat nao samfala gavman duim for againstim pipol blo Jehovah, bat wat nao olketa brata and sista duim? (b) Why nao samwan wea kasem persecution savve hapi? (Koment tu abaotem piksa lo front page.)

DISTAEM olketa gavman banim waka blo iumi lo winim 30-fala kantri. Lo samfala kantri hia, gavman putim olketa brata and sista lo prison. Waswe, olketa duim samting wea no stret? Lo Jehovah, olketa no duim eni rong samting. Samting wea olketa duim nomoa hem for readim and studyim Bible, storyim biliv blo olketa lo narawan, and attendim olketa meeting witim olketa nara brata and sista. And tu, olketa no teksaed lo politik. Nomata gavman barava againstim olketa, olketa gohed faithful lo Jehovah. And olketa barava hapi from olketa duim datwan!

² Staka taem iumi savve lukim piksa blo olketa Witness wea kasem persecution, bat iumi lukim olketa gohed smile. Olketa smile bikos olketa savve Jehovah hapi lo olketa from olketa gohed faithful lo hem. (Fas Kronikols 29:17a) Jesus sei: “Olketa wea nara pipol spoelem olketa from olketa duim samting wea stret, bae hapi . . . Iufala mas barava hapi bikos iufala bae kasem bigfala blessing.”​—Matt. 5:10-12.

GUD EXAMPLE FOR IUMI

3. Olsem Acts 4:19, 20 storyim, wat nao olketa aposol duim taem olketa kasem persecution, and why nao olsem?

³ Olketa brata and sista distaem kasem persecution. Olketa olsem olketa aposol lo first century wea kasem persecution from olketa preach abaotem Jesus. Staka taem olketa judge lo hae kot blo olketa Jew talem “olketa for no story long nem bilong Jesus.” (Acts 4:18; 5:27, 28, 40) Wat nao olketa aposol duim? (Readim Acts 4:19, 20.) God ‘talem olketa for mas preach long pipol and for witness long evriwan’ abaotem Christ. (Acts 10:42) So Peter and John sei olketa aposol bae obeyim God winim olketa judge and olketa bae no stop for story abaotem Jesus. Hem olsem olketa sei lo olketa judge, ‘Hao, iufala tingse iufala garem authority for stopem mifala for duim wanem God talem mifala for duim?’

4. Hao nao olketa Christian savve followim example blo olketa aposol, wea Acts 5:27-29 storyim?

⁴ Olketa aposol showimaot gud example wea olketa tru Christian gohed followim kam kasem distaem. Olketa aposol sei lo olketa judge: “God nao hem ruler wea mifala mas obeyim, no olketa man.” (Readim Acts 5:27-29.) Bihaen datwan olketa whipim olketa aposol, then olketa go aot from hae kot. Bat “olketa hapi nomoa from olketa savve God nao letem datwan for kasem olketa bikos olketa faithful for followim Jesus,” and olketa gohed for preach!​—Acts 5:40-42.

5. Wat nao samfala kwestin wea iumi bae storyim?

⁵ Wanem olketa aposol hia duim mekem samfala kwestin kamap. For example, olketa aposol disaed for obeyim God winim olketa man bat datwan mekem olketa no savve followim komand lo Bible for “stap anda long olketa wea rul.” Waswe, wanem olketa duim hem stret? (Rome 13:1) And tu, Paul sei iumi shud “obeyim olketa gavman and olketa wea garem paoa,” bat sapos olsem, hao nao iumi savve gohed faithful lo God wea hem nao iumi shud obeyim?​—Titus 3:1.

“OLKETA WEA RUL”

6. (a) Hu nao “olketa wea rul” wea Rome 13:1 storyim, and wat nao iumi mas duim for olketa? (b) Wat nao hem gud for luksavve lo hem abaotem olketa gavman?

⁶ Readim Rome 13:1. Lo disfala verse, “olketa wea rul,” hem minim olketa gavman blo man wea rul ovarem olketa pipol. Olketa Christian mas stap anda lo olketa. Olketa gavman mek sure law and order stap lo kantri, and samfala taem olketa savve defendim pipol blo Jehovah tu. (Rev. 12:16) Dastawe Bible sei iumi mas peim tax, obeyim, and respectim olketa. (Rome 13:7) Bat hem gud for luksavve hao olketa gavman hia garem paoa for rul from Jehovah nao letem olketa. Jesus mekem datfala point klia taem Pontius Pilate, Governor blo Rome, kwestinim hem. Taem Pilate sei hem nao garem paoa for sevem Jesus or judgem hem for dae, Jesus sei lo hem: “Sapos God hem no givim paoa long iu, hard for iu duim eni samting long mi.” (John 19:11) Paoa blo Pilate hem garem spialaen, and hem semsem tu witim olketa gavman distaem.

7. Olketa wanem situation nao iumi bae no obeyim gavman, and wat nao olketa shud tingim?

⁷ Olketa Christian mas obeyim olketa law blo gavman wea no againstim law blo God. Bat iumi bae no obeyim gavman taem olketa talem iumi for duim samting wea God sei for iumi no duim, or taem olketa talem iumi for no duim samting wea God sei for iumi mas duim. For example, gavman maet sei olketa young man lo kantri mas joinim army.b Or olketa maet banim Bible and olketa pablikeson blo iumi and stopem iumi for preach and for worship tugeta. Taem olketa iusim rong lo paoa wea olketa garem, olsem for persecutim olketa disaepol blo Christ, olketa mas ansa lo God. Jehovah lukim evri samting wea olketa duim!​—Eklesiastes 5:8.

8. Hao nao position and paoa blo gavman hem difren from position and paoa blo Jehovah?

⁸ Disfala toktok “olketa wea rul” hem minim olketa wea garem “hae position, bigfala paoa, and authority.” Nomata olketa gavman garem paoa for “rul,” Jehovah nao garem paoa and authority winim olketa, and position blo hem hae winim olketa. Fofala taem Bible sei hao Jehovah God “hemi barava hae tumas.”​—Daniel 7:18, 22, 25, 27.

‘HEM BARAVA HAE TUMAS’

9. Wat nao profet Daniel lukim lo vision blo hem?

⁹ Profet Daniel lukim vision wea showimaot klia hao position blo Jehovah hem hae winim olketa wea rul. Firstaem Daniel lukim fofala big animal wea piksarem olketa world paoa, wea hem nao Babylon, Medo-Persia, Greece, and Rome, and then England-America wea world paoa distaem. (Daniel 7:1-3, 17) Then Daniel lukim Jehovah God sidaon lo throne blo hem lo kot lo heven.

10. Olsem Daniel 7:13, 14, 27 storyim, hu nao Jehovah givim paoa lo olketa, and wat nao datwan showimaot abaotem hem?

¹⁰ Readim Daniel 7:13, 14, 27. God tekem evri paoa and authority from olketa gavman blo man and givim lo olketa narawan wea fit for rul and wea garem moa paoa. Hu nao olketa hia? Bible sei Jehovah givim lo samwan wea “luk olsem wanfala man,” wea hem nao Jesus Christ, and lo “olketa holy wan blo Most Hae,” wea minim 144,000 wea bae rul for “olowe.” (Daniel 7:18) Datwan showimaot Jehovah “hemi barava hae tumas” bikos hem nomoa garem authority for duim datwan.

11. Wat nao nara samting wea Daniel storyim wea showimaot Jehovah hem hae winim olketa wea rul?

¹¹ Wanem hem happen lo datfala vision hem join witim nara samting wea Daniel storyim lo chapter 2. Hem sei: “[God] nao hemi givim paoa long olketa king, an hemi save tekemaot moa paoa ya from olketa.” Hem sei tu: “God nao hemi barava hae fogud, an . . . hem givim [paoa] long olketa pipol hu hemi siusim.” (Daniel 2:19-21; 4:17) Waswe, enitaem bifor Jehovah tekemaot paoa from eni ruler or givim paoa lo samwan? Yes!

12. Storyim example lo hao Jehovah tekemaot paoa blo samfala king bifor. (Lukim piksa.)

¹² Jehovah showimaot hem garem bigfala paoa winim “pipol wea rul.” Tingim thrifala example. Pharaoh, King blo Egypt mekem pipol blo Jehovah for kamap slave and no laek letem olketa go free. Bat God mekem olketa Israelite free and mekem Pharaoh for draon lo Red Sea. (Eksodas 14:26-28; Sams 136:15) King Belshazzar blo Babylon mekem feast for mekhae lo hemseleva, and hem “preisim olketa kaving god” bat hem no praisem Jehovah. (Daniel 5:22, 23) Bat lo “sem naet” olketa killim dae Belshazzar and God givim datfala paoa for rul lo Media and Persia. (Daniel 5:28, 30, 31) King Herod Agrippa I blo Palestine talem olketa soldia for kilim dae aposol James, and then putim Peter lo prison and plan for kilim hem dae tu. Bat Jehovah no letem datwan for happen. Bible sei “angel . . . mekem olketa worm kaikaim Herod and hem dae nao.”​—Acts 12:1-5, 21-23.

13. Storyim example lo hao Jehovah winim staka ruler.

¹³ Jehovah showimaot tu hao hem fit for winim staka ruler. Hem helpem olketa Israelite for finisim 31 king blo olketa Canaanite and for tekovarem bigfala part blo Promis Land. (Joshua 11:4-6, 20; 12:1, 7, 9-24) Jehovah helpem olketa Israelite tu for winim King Ben-hadad witim 32 nara king blo Syria wea faet againstim Israel.​—1 Ki. 20:1, 26-29, NWT.

14-15. (a) Wat nao King Nebuchadnezzar and King Darius sei abaotem rul blo Jehovah? (b) Wat nao wanfala psalm talem abaotem Jehovah and pipol blo Hem?

¹⁴ Staka taem Jehovah pruvim hao “hemi barava hae tumas.” Wanfala example hem taem King Nebuchadnezzar blo Babylon mekhae lo hemseleva and sei hem garem ‘bikfala paoa from hem nao king, an hem garem hae nem.’ Hem no hambol for sei Jehovah nao fit for kasem praise, so God mekem hem for kamap mentol. Bihaen Nebuchadnezzar gud bak, hem “preisim God hu hemi barava hae tumas” and hem sei “disfala God bae hemi rul olowe.” Hem sei tu: “No eniwan long wol save agensim hem.” (Daniel 4:30, 33-35) Nara example, bihaen Jehovah rescuem Daniel from olketa lion, King Darius sei: ‘Evri pipol long kingdom mas tinghae an mekhae long disfala God wea Daniel wosipim. God ya hemi laef, an bae hemi rul for olowe. No eni man save spoelem kingdom blong hem, an paoa blong hem bae no save finis.’​—Daniel 6:7-10, 19-22, 26, 27.

¹⁵ Man wea raetem wanfala psalm sei: ‘Jehovah gohed fo stopem olketa [nation] fo no wakem olketa plan blong olketa.’ Hem sei tu: ‘Olketa pipol wea God siusim fo kamap pipol blong hem, olketa nao hapi.’ (Sams 33:10,12) Datwan hem barava gud reason for iumi gohed faithful lo Jehovah!

LASTFALA WAR

16. Wat nao iumi sure Jehovah bae duim lo “bigfala trabol,” and why nao olsem? (Lukim piksa.)

¹⁶ Iumi storyim wat nao Jehovah duim bifor, bat wat nao bae hem duim lo future? Iumi sure Jehovah bae rescuem olketa faithful pipol blo hem lo taem blo “bigfala trabol.” (Matt. 24:21; Daniel 12:1) Hem bae duim datwan taem olketa nation, wea Bible kolem Gog blo Magog, attakim olketa wea faithful lo Jehovah evriwea lo world. Nomata sapos evri 193 nation wea member blo United Nations distaem olketa part lo datfala Gog blo Magog, bae olketa no savve winim Jehovah and bigfala army blo hem lo heven! Jehovah promis olsem: “Bae mi somaot long evri kantri wea mi holi an mi garem evri paoa. From samting ya nao, bae olketa jes savegud dat mi nao [Jehovah].”​—Esikiel 38:14-16, 23; Sams 46:10.

17. Wat nao Bible sei bae happen lo olketa king lo earth and olketa wea faithful lo Jehovah?

¹⁷ Bihaen Gog attakim pipol blo Jehovah, war blo Armageddon bae start and Jehovah bae distroem “olketa king evriwea long earth.” (Rev. 16:14, 16; 19:19-21) Bat, “olketa wea raeteous bae stap long earth, and olketa wea faithful bae stap long hem.”​—Prov. 2:21, footnote, NWT.

IUMI MAS GOHED FAITHFUL

18. Wat nao staka Christian willing for duim, and why nao olsem? (Daniel 3:28)

¹⁸ Kam kasem distaem staka Christian willing for lusim freedom, and laef blo olketa tu, from olketa lovem Jehovah wea hem Haefala Ruler blo olketa. Olketa tru Christian hia disaed strong for gohed faithful lo Jehovah. Olketa olsem thrifala Hebrew wea gohed faithful lo God, and then hem sevem olketa for no dae insaed datfala big fire.​—Readim Daniel 3:28.

19. Hao Jehovah judgem pipol blo hem bae depend lo wanem? So wat nao iumi mas duim?

¹⁹ David raetem wanfala psalm wea storyim why hem important for gohed faithful lo God. Hem sei: ‘Jehovah, yu nao save jajem evri pipol. Plis yu jajem mi falom wei wea mi stret long ae blong yu, an mi gohed faithful.’ (Sams 7:8) David sei tu: “Mi stap sef from mi gohed faithful and duim stret samting.” (Ps. 25:21, NWT) Best samting for iumi duim hem for gohed faithful lo Jehovah, nomata wanem hem happen! Then iumi bae experiencem wanem disfala psalm storyim: “Pipol wea gohed faithful . . . , and followim law blo Jehovah, olketa nao hapi.”​—Ps. 119:1, footnote, NWT.