No Givap Nomata Eni Samting Mekem Iu Feel Nogud

1. Wat nao samfala blessing wea iumi enjoyim bikos iumi insaed organization blo Jehovah?

HEM wanfala blessing for iumi insaed organization blo Jehovah lo olketa last day distaem wea no isi. Taem situation lo world gohed for kamap worse, Jehovah provaedem for iumi wanfala spiritual famili wea wan mind. (Ps. 133:1) Hem helpem iumi for strongim love insaed own famili blo iumi. (Eph. 5:33–6:1) And hem givim iumi wisdom for deal witim olketa wari mekem iumi garem peace lo mind.

2. Wat nao iumi need for duim, and why nao olsem?

² Nomata olsem, iumi mas waka hard for gohed faithful for servem Jehovah. Why? Bikos samfala taem maet iumi feel nogud lo wik point blo narawan. Iumi tu maet faendem hem hard for deal witim olketa wik point blo iumiseleva, especially if iumi duim sem mistek staka taem. Iumi mas no givap for servem Jehovah (1) taem wanfala brata or sista mekem iumi feel nogud, (2) taem marit partner mekem iumi feel nogud, and (3) taem iumi feel nogud lo wat iumiseleva duim. Lo disfala article, bae iumi storyim each wan lo olketa situation hia. And bae iumi storyim tu wat iumi savve lanem from samwan lo Bible wea faithful.

NO GIVAP TAEM WANFALA BRATA OR SISTA MEKEM IU FEEL NOGUD

3. Wat nao challenge wea pipol blo Jehovah feisim?

³ Challenge. Samfala brata and sista garem olketa wei wea iumi no mas laekem. Olketa narawan maet mekem iumi feel nogud or no kaen lo iumi. Olketa brata wea lead savve mekem mistek tu. Olketa situation olsem savve mekem samfala for daotem if diswan hem organization blo God. Winim for olketa gohed “wan mind” for servem God witim olketa brata and sista, maet olketa les for associate witim man wea mekem olketa feel nogud or even stop for go lo olketa meeting. (Zeph. 3:9) Hao, hem wise for duim datwan? Lukim wat iumi savve lanem from example blo samwan lo Bible wea feisim semkaen problem.

4. Wat nao olketa challenge wea aposol Paul feisim?

⁴ Example lo Bible. Aposol Paul savve olketa brata and sista no perfect. For example, taem hem start for associate witim kongregeson lo Jerusalem, samfala no trustim dat hem wanfala disaepol. (Acts 9:26) Bihaen, samfala talem olketa nogud samting wea spoelem reputation blo hem. (2 Cor. 10:10) Paul lukim wanfala elder mekem wanfala rong disison wea maet mekem olketa narawan for stambol. (Gal. 2:​11, 12) And Mark wea hem wanfala gud fren blo hem, duim samting wea mekem hem feel nogud. (Acts 15:​37, 38) Hem isi tumas for Paul letem olketa situation hia for mekem hem for no laek associate witim olketa. Nomata olsem, hem gohed garem positive tingting abaotem olketa brata and sista and continue for servem Jehovah. Wat nao helpem Paul for no givap?

5. Wat nao helpem Paul for no givap lo olketa brata and sista? (Colossae 3:​13, 14) (Lukim tu piksa.)

⁵ Paul lovem olketa brata and sista. From Paul lovem olketa, hem no focus lo wik point blo olketa, bat focus lo gudfala wei blo olketa. Love helpem Paul tu for followim wat hemseleva raetem lo Colossae 3:​13, 14. (Readim.) Tingim hao datwan fitim situation blo hem witim Mark. Nomata Mark lusim hem lo first missionary journey blo hem, Paul no gohed for feel nogud. Bihaen, taem Paul raet lo kongregeson lo Colossae, hem praisem Mark from tufala waka tugeta and sei Mark “barava comfortim” hem. (Col. 4:​10, 11) Taem hem stap lo prison lo Rome, Paul askem Mark for kam helpem hem. (2 Tim. 4:11) Datwan showimaot Paul no givap lo olketa brata and gohed fren klos witim olketa. Wat nao iumi savve lanem from Paul?

6-7. Wat nao savve helpem iumi for no givap for lovem olketa brata and sista nomata olketa garem wik point? (1 John 4:7)

⁶ Leson. Jehovah laekem iumi for no givap for showimaot love lo olketa brata and sista. (Readim 1 John 4:7.) If wanfala brata or sista fail for duim stret samting, hem gud for iumi tingim hao really hem laek for followim Bible principle, bat maet hem no tingting gud nomoa. (Prov. 12:18) Jehovah lovem olketa faithful servant blo hem nomata olketa garem wik point. Nomata iumi mekem olketa mistek, hem no lusim iumi and no gohed for kros. (Ps. 103:9) Hem barava important for followim wei blo Dadi blo iumi for forgivim narawan!—Eph. 4:32–5:1.

⁷ Tingim tu, bikos end hem barava klosap, iumi need for fren gud witim olketa brata and sista. Iumi expectim staka persecution. Maet iumi end ap lo prison bikos lo faith blo iumi. If datwan happen, iumi bae needim sapot blo olketa brata and sista winim eni narataem. (Prov. 17:17) Tingim wat happen lo Josep,a wanfala elder lo Spain. Hem and olketa nara brata stap tugeta lo prison bikos olketa neutral. Hem sei: “Lo prison, hem isi for feel nogud lo narawan bikos mifala evriwan stap tugeta. Mifala mas lane for deal witim each other and willing for forgive. Datwan helpem mifala for wan mind and protectim each other bikos olketa nara prisoner no worshipim Jehovah. Wantaem, mi garekil and olketa bandagem hand blo mi, so hem hard for mi duim eniting. Bat wanfala brata wasim kaleko blo mi and helpem mi lo olketa nara samting tu. Lo datfala taem wea mi barava needim, olketa brata showimaot olketa lovem mi.” Diswan gud reason why iumi shud stretem eni problem wea iumi garem witim narawan distaem!

NO GIVAP TAEM MARIT PARTNER MEKEM IU FEEL NOGUD

8. Wat nao challenge wea olketa marit couple savve feisim?

⁸ Challenge. Hard taem savve kamap insaed evri marit. Bible sei “olketa wea marit bae kasem hard taem long laef bilong olketa.” (1 Cor. 7:28) Why? Bikos tufala wea marit no perfect and wei blo tufala and wat tufala laekem and no laekem hem difren. Tufala maet garem difren culture or baekgraon. Maet gogo, really wei blo tufala showaot klia bihaen tufala marit. Olketa samting olsem savve isi for mekem narawan feel nogud. Instead for luksavve hao tufala evriwan contribute lo datfala problem and shud duim samting for stretem, tufala maet blamem each other. Maet tufala tingse, for stretem datfala problem tufala bae separate or divorce. Bat hao, datwan nao bae stretem problem?b Lukim wat iumi savve lanem from example blo wanfala woman lo Bible wea feisim barava hard taem lo marit blo hem.

9. Wat nao challenge wea Abigail feisim?

⁹ Example lo Bible. Abigail maritim Nabal wea raf tumas and savve treatim hem nogud. (1 Sam. 25:3) Masbi hem hard tumas for Abigail stap witim kaen man olsem. Hao, Abigail garem eni chance for lusim datfala man? Wanfala chance kamap taem David, future king blo Israel kam for killim dae hasband blo Abigail, Nabal, bikos hem tok spoelem David and olketa man blo hem. (1 Sam. 25:​9-13) Hem isi nomoa for Abigail ranawe, and letem David for duim samting wea hem planim. Bat Abigail no duim datwan, hem story witim David for no killim dae Nabal. (1 Sam. 25:​23-27) Why nao hem duim datwan?

10. Why nao maet Abigail no givap nomata marit blo hem no isi?

¹⁰ Abigail lovem Jehovah and respectim olketa standard blo hem saed lo marit. Luk olsem, hem savve abaotem wat God talem lo Adam taem hem givim waef lo hem. (Gen. 2:24) Abigail savve lo tingting blo Jehovah dat marit hem wanfala holy arrangement. Hem laek for mekem God hapi, dastawe hem duim best blo hem for sevem famili and hasband blo hem. Hem kwiktaem duim samting for David no killim dae Nabal. Hem willing tu for sei sorre for rong wea hem no duim. Jehovah barava lovem disfala brave woman wea no tingim hemseleva. Wat nao olketa waef and olketa hasband savve lanem for example blo Abigail?

11. (a) Wat nao Jehovah expectim from olketa wea marit? (Ephesus 5:33) (b) Wat nao iu lanem from hao Carmen waka hard for sevem marit blo hem? (Lukim tu piksa.)

¹¹ Leson. Jehovah laekem olketa wea marit for respectim marit arrangement nomata maet hem no isi for stap witim marit partner blo olketa. Jehovah hapi tumas taem hem lukim olketa wea marit waka hard for stretem olketa problem and showimaot love and respect lo each other. (Readim Ephesus 5:33.) Tingim example blo Carmen. Bihaen hem marit for samting olsem six years, hem studyim Bible witim Olketa Jehovah’s Witness and baptaes. Carmen sei: “Hasband blo mi no hapi lo datwan. Hem start for jealous lo wei wea mi servem Jehovah. Hem savve tok spoelem mi and sei bae hem lusim mi.” Nomata olsem, Carmen no givap lo marit blo hem. For 50 years, hem waka hard for lovem and respectim hasband blo hem. Hem sei: “Taem mitufala gohed for stap tugeta, mi lane for luksavve and story kaen lo hasband blo mi. From mi savve marit hem holy lo eye blo Jehovah, mi duim best blo mi for protectim marit blo mi. Mi no givap lo marit blo mi bikos mi lovem Jehovah.”c If iu kasem olketa problem lo marit, iu savve trustim hao Jehovah bae sapotim and helpem iu for no givap.

NO GIVAP TAEM IU FEEL NOGUD LO WAT IUSELEVA DUIM

12. Wat nao challenge wea iumi maet feisim if iumi duim wanfala serious sin?

¹² Challenge. If iumi duim wanfala serious sin, maet iumi laek for givap. Bible storyim hao sin savve mekem iumi for feel olsem heart blo iumi hem “brek and pisis.” (Ps. 51:17) Wanfala brata wea nem blo hem Robert bin waka hard for staka year for qualify for ministerial servant. Bat, hem duim wanfala serious sin and hem luksavve hem mekem Jehovah for sorre. Hem sei: “Konsens blo mi mekem mi feel guilty tumas. And bihaen, mi feel nogud tumas. Mi krae and prea lo Jehovah. Mi remember dat mi tingse God bae no laek for lisin lo mi nao. Hao nao bae hem lisin lo mi, samting mi no obeyim hem?” If iumi duim wanfala serious sin, maet iumi feel laek for givap bikos heart blo iumi wea pisis mekem iumi for tingse Jehovah no lovem iumi. (Ps. 38:4) If iu feel olsem, tingim disfala example blo samwan lo Bible wea no givap for servem Jehovah nomata hem duim wanfala serious sin.

13. Wat nao serious sin wea aposol Peter duim, and wat nao lead go for datwan?

¹³ Example lo Bible. Lo naet bifor olketa killim dae Jesus, aposol Peter mekem samfala mistek wea lead go for worst mistek wea hem duim lo laef blo hem. First, Peter ova confident and tok praod and sei hem bae gohed faithful nomata olketa nara aposol lusim Jesus. (Mark 14:​27-29) Second, taem olketa lo garden blo Gethsemane, Peter fail for gohed lukaot. (Mark 14:​32, 37-41) Third, taem wanfala big grup kam for arrestim Jesus, Peter ranawe. (Mark 14:50) Then last samting, Peter denyim Jesus thrifala taem, and even sei sapos hem laea, fitim for God panisim hem. (Mark 14:​66-71) Wat nao reaction blo Peter taem hem luksavve hem duim wanfala serious sin? Hem sorre tumas and krae big maet bikos hem barava feel guilty. (Mark 14:72) Just imaginim hao Peter mas sorre tumas taem hem herem olketa killim dae fren blo hem Jesus. Peter mas barava feel iusles!

14. Wat nao helpem Peter for no givap for gohed servem Jehovah? (Lukim piksa .)

¹⁴ Samfala reason stap why Peter no givap for gohed servem Jehovah. Hem no isolatem hemseleva, hem go lo olketa disaepol and for sure olketa comfortim hem. (Luke 24:33) And tu, bihaen Jesus resurrect hem go lo Peter bikos hem laek for encouragem Peter. (Luke 24:34; 1 Cor. 15:5) Bihaen, instead for Jesus tok lo Peter bikos lo olketa mistek wea hem duim, Jesus talem bae hem givim hem samfala big responsibility. (John 21:​15-17) Peter savve hem duim bigfala sin, bat hem no givap for duim stret samting. Why? Bikos hem luksavve hao Masta blo hem Jesus, no givap lo hem. And Peter lukim tu hao olketa spiritual brata blo hem gohed for sapotim hem. Wat nao iumi savve lanem from example blo Peter?

15. Wat nao Jehovah laekem iumi for sure lo hem? (Psalm 86:5; Rome 8:​38, 39) (Lukim tu piksa.)

¹⁵ Leson. Jehovah laekem iumi for sure hao hem lovem and redi for forgivim iumi. (Readim Psalm 86:5; Rome 8:​38, 39.) Taem iumi sin, iumi feel guilty. Datwan hem normal and hem stret. Bat, iumi mas no tingse Jehovah no lovem iumi or no savve forgivim iumi. Iumi shud kwiktaem askem help. Robert wea iumi storyim finis sei: “Mi duim sin bikos mi depend lo strong blo miseleva for againstim datfala temptation.” Hem luksavve hem mas story lo olketa elder. Hem sei: “Taem mi story lo olketa elder, olketa helpem mi for luksavve hao Jehovah lovem mi. Olketa elder no givap lo mi. Olketa helpem mi for luksavve Jehovah no lusim mi.” Iumi tu savve sure Jehovah barava lovem and bae forgivim iumi if iumi repent, ask for help, and traem best for no duim moa datfala sin. (1 John 1:​8, 9) From iumi bilivim datwan, iumi bae gohed servem Jehovah and no givap taem iumi duim eni mistek.

16. Why nao iu disaed strong for servem Jehovah and no givap?

¹⁶ Jehovah barava tinghae lo wei wea iumi traem best for servem hem lo olketa last day distaem wea no isi. Witim help blo Jehovah, iumi savve gohed and no givap nomata eni samting mekem iumi feel nogud. Iumi savve strongim love for olketa brata and sista nomata olketa mekem iumi feel nogud. Iumi savve showimaot iumi barava lovem God and respectim arrangement blo hem taem iumi traem best for stretem olketa problem wea maet kamap insaed marit. And if iumi sin, iumi savve askem help blo Jehovah, acceptim love and forgiveness blo hem, and gohed for servem hem. Iumi savve sure hao Jehovah bae barava blessim iumi if iumi no givap and “gohed for duim gudfala samting.” —Gal. 6:9.