Gohed for Wakabaot Followim Faith

1. Why nao hem fitim for aposol Paul feel satisfae lo laef blo hem?

APOSOL Paul savve dat klosap nao olketa bae killim hem dae, nomata olsem, hem barava feel satisfae lo laef blo hem. Taem hem luk bak, hem sei hem ran kasem end blo datfala resis and hem keepim faith blo hem. (2 Tim. 4:​6-8) Paul mekem olketa wise disison taem hem duim ministry blo hem, and hem barava sure Jehovah hapi lo hem. Iumi tu laek for mekem olketa gud disison and mekem God hapi lo iumi. Hao nao iumi savve duim datwan?

2. Wat nao hem minim for wakabaot followim faith?

² Paul sei olsem abaotem hemseleva and olketa nara faithful Christian: “Iumi no followim samting wea iumi lukim, bat laef bilong iumi showimaot iumi garem faith.” (2 Cor. 5:7) Wat nao Paul minim? Lo original languis, Paul iusim word “wakabaot” wea staka taem lo Bible datwan minim samting wea man disaed for duim lo laef blo hem. If samwan wakabaot followim wat hem lukim, hem bae mekem disison followim nomoa olketa physical samting olsem wat hem lukim, feelim, and herem. Bat if samwan wakabaot followim faith, hem bae mekem disison wea showimaot hem trustim Jehovah God. Wat hem duim showimaot hem barava convince God bae rewardim hem and hem bae kasem gud samting taem hem followim advaes blo Jehovah wea stap lo Bible.—Ps. 119:66; Heb. 11:6.

3. Wat nao olketa gud samting wea iumi kasem taem iumi wakabaot followim faith? (2 Corinth 4:18)

³ Samfala taem, iumi evriwan savve mekem olketa disison wea followim nomoa olketa physical samting. Bat, iumi bae kasem problem if iumi mekem olketa important disison wea base nomoa lo wat iumi lukim and herem. Why? Bikos samfala taem olketa physical samting savve laea lo iumi. Nomata if hem stret, taem iumi disaed for wakabaot followim wat iumi lukim, maet end ap iumi ignorem kaonsel or wat God laekem iumi for duim. (Eccl. 11:9; Matt. 24:​37-39) Bat, if iumi wakabaot followim faith bae hem moa isi for mekem olketa disison wea “Lord hapi long hem.” (Eph. 5:10) Taem iumi followim advaes blo God, bae iumi garem peace lo mind and barava hapi. (Ps. 16:​8, 9; Isa. 48:​17, 18) And if iumi gohed for wakabaot followim faith bae iumi kasem laef olowe lo future.—Readim 2 Corinth 4:18.

4. Hao nao iumi bae luksavve if iumi wakabaot followim faith or followim wat iumi lukim?

⁴ Hao nao iumi savve if iumi wakabaot followim faith or followim wat iumi lukim? For helpem iumi, tingim diswan: Wat nao iumi savve basem olketa disison blo iumi lo hem? Hao, iumi followim nomoa samting iumi lukim? Or hao, iumi trustim and depend lo advaes blo Jehovah? Bae iumi storyim hao iumi savve wakabaot followim faith lo thrifala situation hia: (1) Taem iumi chusim waka, (2) taem iumi chusim marit partner, and (3) taem iumi kasem direction from organization. For each situation, bae iumi discussim wat nao olketa samting wea iumi need for tingim for helpem iumi for mekem gud disison.

TAEM IUMI CHUSIM WAKA

5. Wat nao iumi shud tingim taem iumi chusim waka?

⁵ Iumi evriwan laek for provaedem wat iumiseleva and famili blo iumi needim. (Eccl. 7:12; 1 Tim. 5:8) Samfala waka olketa savve pei gud winim nara waka. From datwan, man savve garem inaf selen fitim each day and hem savve sevem lelebet selen for future. Bat lo samfala waka, pei hem smol and maet hem fitim nomoa for provaedem olketa main samting wea famili needim. Taem iumi ting raonem if iumi bae acceptim wanfala waka, wanfala samting wea iumi savve tingim hem nao haomas selen bae iumi earnim. Bat if iumi only ting abaotem datwan, hem minim iumi wakabaot followim samting iumi lukim.

6. Taem iumi chusim waka, wat nao iumi savve duim for showimaot iumi wakabaot followim faith? (Hebrew 13:5)

⁶ If iumi samwan wea wakabaot followim faith, iumi bae tingim tu hao datfala waka bae affectim frenship blo iumi witim Jehovah. Hem gud for askem iumiseleva: ‘If mi acceptim disfala waka, hao, bae hem mekem mi for duim samting wea Jehovah heitim?’ (Prov. 6:​16-19) ‘Hao, bae hem affectim worship blo mi and mekem mi for lusim famili for longfala taem?’ (Phil. 1:10) If ansa for eni kwestin hia hem yes, hem wise for iu no acceptim datfala waka, nomata maet hem hard for faendem waka lo ples iu stap. From iumi wakabaot followim faith, iumi mekem olketa disison wea showim iumi trustim dat Jehovah bae lukaftarem olketa need blo iumi.—Matt. 6:33; readim Hebrew 13:5.

7-8. Hao nao wanfala brata lo South America showimaot hem wakabaot followim faith? (Lukim tu piksa.)

⁷ Javier,a wanfala brata lo South America luksavve dat hem important for wakabaot followim faith. Hem sei: “Mi apply for wanfala waka wea garem hae position and wea pei blo hem bae tu-taems hae winim wat mi kasem finis and hem waka wea mi interest for duim.” Bat lo semtaem, Javier hem laek for pioneer tu. Hem sei: “Olketa acceptim mi for go interview witim national manager blo datfala company. Bifor interview, mi prea lo Jehovah for help, and mi barava trustim dat Jehovah savve wat nao hem best for mi. Mi laek for kasem datfala waka wea garem big pei, bat mi no laek for acceptim datfala waka if hem no helpem mi for kasem olketa spiritual goal.”

⁸ Javier sei: “During lo datfala interview manager talem mi dat bae mi need for waka ovataem. Mi explainim lo kaenfala wei, dat bikos lo ministry blo mi, bae mi hard for duim datwan.” Yes, Javier no acceptim datfala waka. Bihaen tufala week, hem start for pioneer. And lo datfala sem year, hem faendem wanfala part-taem waka. Hem sei: “Jehovah ansarem prea blo mi, hem provaedem waka wea fitim pioneer schedule blo mi. Mi barava hapi for garem waka wea helpem mi for iusim moa taem for servem Jehovah and for helpem olketa brata and sista.”

9. Wat nao iu lanem from experience blo Brata Trésor?

⁹ Wat if iumi luksavve waka wea iumi duim distaem hem affectim hao iumi wakabaot followim faith? Tingim experience blo Brata Trésor, from Congo. Hem sei: “Mi kasem wanfala niu waka and hem kaen waka wea if iu misstim datfala chance hard for iu kasem moa. Selen wea mi kasem hem thri-taems winim salary blo mi bifor, and pipol tinghae lo mi. Bat staka taem Trésor savve misstim olketa meeting bikos hem waka ovataem. And hem kasem pressure tu for no talem tru samting abaotem wei wea olketa narawan duim samting wea no honest. Trésor laek for finis from datfala waka, bat hem wari nogud hem no faendem eni nara waka. Wat nao helpem hem? Hem sei: “Habakkuk 3:​17-19 helpem mi for luksavve dat even if mi finis waka, Jehovah bae lukaftarem mi. So mi resign.” Then hem sei: “Lo tingting blo staka pipol, man need for sakrifaesim evriting, includim famili and olketa spiritual samting, mekem hem savve keepim datfala waka wea garem gud pei. Mi hapi dat mi keepim frenship blo mi witim Jehovah and witim famili blo mi. Wan year bihaen, Jehovah helpem mi for faendem wanfala gud waka wea helpem mi for garem simpol laef and for spendem moa taem lo service blo Jehovah. If iumi putim Jehovah first, hem bae lukaftarem iumi nomata maet iumi stragol saed lo selen for lelebet taem.” Yes, if iumi trustim olketa advaes and promis blo Jehovah, bae iumi gohed for wakabaot followim faith and hem bae blessim iumi.

TAEM IU CHUSIM WANFALA MARIT PARTNER

10. Wat nao maet mekem iumi for wakabaot followim samting wea iu lukim taem iumi chusim wanfala marit partner?

¹⁰ Marit hem present from Jehovah and hem normal for garem feeling for laek marit. Taem wanfala sista laek for chusim wanfala marit partner, maet hem lukluk lo olketa wei blo wanfala brata, lukluk blo hem, reputation, saed lo selen, famili responsibility, and hao hem treatim hem.b Hem important for tingim olketa samting hia. Bat, if sista hia only tingim olketa physical samting olsem, hem showim hem wakabaot nomoa followim wat hem lukim.

11. Taem iumi chusim wanfala marit partner, hao nao iumi savve showim iumi wakabaot followim faith? (1 Corinth 7:39)

¹¹ Jehovah hapi tumas lo olketa brata and sista wea followim advaes blo hem taem olketa chusim wanfala marit partner! For example, olketa followim advaes blo hem for olketa weit and no kwiktaem fren taem olketa “young tumas.” (1 Cor. 7:36) Taem olketa chusim samwan for maritim, olketa mek sure datfala person garem olketa quality wea Jehovah sei wanfala gud hasband or gud waef shud garem. (Prov. 31:​10-13, 26-28; Eph. 5:33; 1 Tim. 5:8) If samwan wea no Witness showim romantic interest lo olketa, olketa trustim disfala kaonsel for maritim nomoa “wanfala disaepol bilong Christ,” wea stap lo 1 Corinth 7:39. (Readim.) Olketa gohed for wakabaot followim faith and trustim dat Jehovah nao bae barava kea for olketa winim eniwan.—Ps. 55:22.

12. Wat nao iu lanem from experience blo Rosa?

¹² Tingim experience blo Rosa, wanfala pioneer lo Colombia. Lo waka blo hem, staka taem hem meetim wanfala man wea hem no Witness and man hia start for interest lo hem. Rosa tu laekem hem. Hem sei: “Luk olsem, hem wanfala gud man. Hem helpem community blo hem and hem garem olketa gud wei. Hem savve kaen lo mi. Hem garem olketa quality wea mi laekem for hasband garem, bat problem nao hem no wanfala Witness.” Rosa sei: “Mi faendem hem hard for sei no bikos mi barava laekem samwan for lovem mi. Lo datfala taem, mi feel lonely and laek for marit, bat mi no savve faendem samwan lo truth.” Nomata olsem, Rosa no focus nomoa lo wat hem lukim. Hem ting raonem hao disison blo hem bae affectim frenship blo hem witim Jehovah. So, hem stop for contactim datfala man and gohed busy lo olketa theocratic activity. No longtaem bihaen, hem kasem invitation for attendim Skul for Olketa Kingdom Evangelizer, and distaem hem spesol pioneer. Rosa sei: “Jehovah givim olketa blessing wea mekem mi barava hapi.” Samfala taem hem no isi for wakabaot followim faith bikos lo feeling blo iumi, nomata olsem, for followim Jehovah hem best samting.

TAEM IUMI KASEM DIRECTION FROM ORGANIZATION

13. Taem iumi kasem direction from organization, wat nao showimaot if iumi wakabaot followim samting wea iumi lukim?

¹³ For helpem iumi gohed worshipim Jehovah, staka taem iumi kasem direction from organization thru lo olketa elder, circuit overseer, branch office, or from Governing Body. Bat, wat if samfala taem iumi no understandim reason why olketa givim direction? Maet iumi only lukim negative saed blo hao datfala direction bae affectim iumi. And tu, maet iumi start for focus lo wik point blo olketa brata wea givim datfala direction.

14. Taem iumi kasem direction from organization, wat nao savve helpem iumi for wakabaot followim faith? (Hebrew 13:17)

¹⁴ Taem iumi wakabaot followim faith, iumi trustim hao Jehovah nao leadim organization blo hem and hem savve lo situation blo iumi. From datwan, iumi kwiktaem for obeyim direction and garem positive attitude taem iumi duim datwan. (Readim Hebrew 13:17.) Iumi luksavve taem iumi obey, kongregeson bae wan mind. (Eph. 4:​2, 3) Iumi trustim dat nomata olketa brata wea lead no perfect, Jehovah bae blessim wei wea iumi obey. (1 Sam. 15:22) Lo taem wea Jehovah markem, hem bae stretem watever hem need for stretem.—Mic. 7:7.

15-16. Wat nao helpem wanfala brata for wakabaot followim faith nomata firstaem hem daotem direction wea olketa kasem? (Lukim tu piksa.)

¹⁵ Tingim wanfala experience wea showimaot gud samting wea kamaot from wei for wakabaot followim faith. Lo Peru, nomata Spanish nao hem main languis, staka pipol story lo own languis blo olketa tu. Wanfala lo olketa languis hia hem Quechua. For staka years, olketa brata and sista wea iusim Quechua languis savve lukaotem pipol wea story lo datfala languis lo territory. Bat for followim wat gavman talem, olketa brata mekem adjustment lo hao for faendem olketa pipol hia. (Rom. 13:1) From datwan, samfala wonder if datfala idea bae hem fitim territory blo olketa or nomoa. Bikos olketa brata followim datfala adjustment, Jehovah blessim hard waka blo olketa for faendem pipol wea story lo Quechua languis.

¹⁶ Kevin, wea hem wanfala elder lo Quechua languis kongregeson, hem tu wanfala lo olketa wea wari abaotem datwan. Hem sei: “Mi ting, ‘Hao nao bae mifala faendem olketa pipol wea story lo Quechua languis?’” Wat nao Kevin hem duim? Hem sei: “Mi tingim Proverbs 3:5. And mi tingim story blo Moses. Moses kasem direction for leadim olketa Israelite for go aot from Egypt and luk olsem datfala direction hem no mek sense, bikos bae olketa kamap isi target for olketa blo Egypt. Nomata olsem, Moses obey and Jehovah blessim hem taem hem duim olketa mirakol for sevem olketa.” (Ex. 14:​1, 2, 9-11, 21, 22) Kevin willing for adjust lo hao hem duim ministry blo hem. Wat nao result? Hem sei: “Mi sapraes tumas lo hao Jehovah hem blessim mifala. Bifor, mifala savve wakabaot farawe lo ministry and samtaems mifala only faendem wan or tufala pipol wea story lo Quechua languis. Distaem, mifala focus lo olketa territory wea garem staka pipol wea story lo Quechua languis. From datwan, mifala story witim staka pipol, duim olketa return visit, and garem staka Bible study. Staka pipol nao attendim meeting distaem.” Yes, taem iumi wakabaot followim faith, Jehovah evritaem rewardim iumi.

17. Wat nao iu lanem from disfala article?

¹⁷ Iumi bin storyim hao for gohed wakabaot followim faith lo thrifala important situation. Bat iumi mas gohed for wakabaot followim faith lo olketa nara samting lo laef tu, olsem taem iumi chusim entertainment or hapitaem and taem iumi mekem disison abaotem education or for raisim ap olketa pikinini. Nomata wat kaen disison nao iumi mekem, iumi shud no basem disison blo iumi lo wat iumi lukim nomoa bat iumi mas tingim frenship blo iumi witim Jehovah, advaes blo hem, and promis blo hem for lukaftarem iumi. If iumi duim datwan, bae iumi fit for gohed “wakabaot lo nem blo Jehovah, God blo iumi for olowe.”—Mic. 4:5.