Hao for Kamap Wanfala Gud Dadi

Lo disfala article

• Wat nao role blo wanfala dadi?

• Hao nao role blo dadi hem spesol?

• Dadi and dota

• Advaes for olketa dadi

Wat nao role blo wanfala dadi?

• Bifor pikinini blo iu hem born. Hao iu treatim waef blo iu taem hem pregnant, hem showim iu bae wat kaen dadi afta baby blo iu hem born. Datfala buk Do Fathers Matter? hem sei:

  “Hasband wea helpem waef blo hem for shopping, tekem hem for go mark, and lukim fetus lo ultrasound or herem heartbeat blo baby taem waef pregnant, staka taem bae hem helpem tu waef and baby blo tufala afta baby hem born.”

  “Taem waef blo mi pregnant, mi no laekem hem for feel olsem hem go thru datwan seleva, so mi helpem hem lo eniting wea mi fit for duim. Mitufala redyim rum blo baby tugeta. Hem wanfala spesol taem for mitufala evriwan taem mifala redi for taem wea baby blo mitufala bae born.”—James.

  Bible principle: “Evritaem tingim olketa narawan and no tingim iufala seleva nomoa.”—Philippi 2:4.

• Afta baby blo iu hem born. Iu savve bond witim baby blo iu taem iu plei and karem hem. Help for lukaftarem baby. Olketa samting wea iu duim olsem dadi, hem contribute lo hao pikinini blo iu hem growap. Bond wea iu garem witim hem showim dat pikinini blo iu hem spesol lo iu.

  “Go daon lo level blo pikinini blo iu. Plei witim hem. Duim olketa fani samting for mekem hem laflaf. No serious tumas. Remember, parents nao first wan wea helpem pikinini for feel savve wat nao love.”—Richard.

  

  Bible principle: “Olketa pikinini hem olketa present from Jehovah. Pikinini wea born hem reward from God.”—Psalm 127:3, footnote.

• Taem pikinini blo iu gohed for growap. Olketa wea duim research faendaot dat olketa pikinini wea klos lo dadi blo olketa do gud lo skul, no garem staka emotional problem, and staka taem olketa no tekem drugs or involve lo rebellious behavior. Iu need for spendem taem witim pikinini blo iu for garem gud relationship witim hem.

  “Son blo mi talem dat wat hem bae barava missim taem hem muv aot from haos, hem olketa conversation wea mifala garem taem mifala draev for long distance or during dinner taem. Samfala barava important conversation wea mifala garem hem lo taem wea mi no expectim. Mifala garem olketa conversation hia bikos mifala spendem staka taem tugeta.”—Dennis.

  

  Bible principle: “Lukluk gud long samting wea iufala duim, mekem iufala wise and no olsem pipol wea no wise. Iusim gud taem bilong iufala.”—Ephesus 5:15,16.

Hao nao role blo dadi hem spesol?

Lo staka culture, pipol sei role blo dadi hem for provaedem physical needs blo famili and for protectim famili, and role blo mami hem for provaedem emotional needs blo famili. (Deuteronomy 1:31; Isaiah 49:15) Lo samfala famili, dadi duim tu role blo mami and mami tu duim role blo dadi. Nomata olsem, olketa wea duim research sei role blo dadi hem difren from role blo mami, and each role hem spesol insaed lo famili.a

Wanfala woman wea duim research abaotem famili, Judith Wallerstein storyim personal experience blo hem wea showim datfala point. Hem sei: “Taem car bangam twelve-year-old dota blo mi, hem laekem dadi blo hem nao for go witim hem insaed ambulance bikos hem trustim dat dadi blo hem bae protectim hem. Bat lo hospital, hem laekem mi nao for sidaon saed lo bed blo hem full day for comfortim hem.”b

“Wanfala dadi mekem famili for feel sef and feel olsem samwan protectim olketa lo wei wea hard for mami duim seleva. Lo semtaem, taem mami lisin lo olketa pikinini, datwan mekem olketa feel savve dat samwan lovem and understandim olketa. Dadi and mami waka tugeta olsem team.”—Daniel.

Bible principle: “Son blo mi, lisin lo discipline blo dadi blo iu, and no rejectim instruction blo mami blo iu.”—Proverbs 1:8.

Dadi and dota

Hao wanfala dadi treatim dota blo hem bae teachim hem wat nao stret wei for eni nara man treatim hem. Dota blo iu bae lanem diswan lo tufala wei:

• Taem hem observim hao iu treatim mami blo hem. Taem iu lovem and respectim waef blo iu, dota blo iu bae luksavve lo olketa important quality wea bae hem luk for hem lo eni man wea hem chus for maritim lo future.—1 Peter 3:7.

  

• Taem hem observim hao iu treatim hem. Taem iu showim respect for dota blo iu, iu teachim hem for respectim hemseleva. Hem lanem tu dat hem nao stret wei for olketa nara man treatim hem.

  Opposite samting, if dadi evritaem criticizem dota blo hem, datwan bae mekem hem no respectim hemseleva and savve kosim hem for lukaotem love from olketa nara man, wea maet olketa man hia mekius nomoa lo hem.

  “Dota wea dadi blo hem lovem and sapotim hem bae no isi for fall in love witim eni man wea no garem olketa gudfala quality blo wanfala gud hasband.”—Wayne.