HELP FOR FAMILI | MARIT
Hao for Avoidim Wei for Jealous lo Marit
Marit no savve hapi if wanfala suspectim narawan and no trustim hem. So hao nao iu savve avoidim wei for jealous wea no eni gud reason stap for hem?
Lo disfala article
Wat nao wei for jealous?
Datfala word “jealous” hem garem olketa difren mining. Taem disfala article storyim “wei for jealous,” hem minim feeling wea man or woman savve garem taem hem tingse samwan hem showim romantic interest lo spouse blo hem, or spouse blo hem showim romantic interest lo samwan else. Maet hem jealous bikos hem feel olsem wanfala samting bae spoelem marit blo hem. If datwan nao wat hem happen, then hem normal and stret for feel jealous. Why nao hem olsem hem bikos no eni relationship hem klos winim marit bond, and wanfala couple shud duim evriting tufala fit for duim for protectim marit blo tufala.
Bible principle: “Tufala hia no tufala body, bat wanfala nomoa. . . . No eni man mas aotem samting wea God joinim finis.”—Matthew 19:6.
“If iu feel dat wanfala samting maet spoelem marit blo iu, wei for jealous savve olsem wanfala smoke detector wea hem alertim iu lo datfala danger and motivatim iu for tek akson.”—Benjamin.
Wei for jealous nating, hem kam from wei for suspect and fraet wea no eni gud reason stap for hem. If iumi really lovem spouse blo iumi, bae iumi avoidim kaen wei for jealous olsem. (1 Corinth 13:4, 7) Dr. Robert L. Leahy sei: “Maet iu laek for protectim marit blo iu, bat datwan nao [wei for jealous nating] savve spoelem marit blo iu.”a
Wat nao kosim wei for jealous nating?
Maet iu savve garem wei for jealous nating bikos former spouse blo iu hem no faithful. Or maet marit blo parents blo iu hem brek ap bikos wanfala lo tufala no faithful, and iu warim sem samting maet happen lo marit blo iu.
“Taem mi smol, dadi blo mi hem cheat lo mami blo mi so mi faendem hem no isi for trustim narawan. Hem wanfala emotional scar wea samfala taem mekem hem no isi for mi trustim hasband blo mi.”—Melissa.
Nara samting: If iu garem wei for feel insecure, maet iu kwiktaem for tingse dat olketa narawan bae spoelem marit blo iu. Iu maet even convincim iuseleva dat if chance kamap, bae spouse blo iu lusim iu and tekem narawan.
“Fren blo hasband blo mi askem hem for groomsman lo wedding blo hem, wea minim bae hem standap witim wanfala bridesmaid and dance witim hem tu. Mi NO HAPI lo datwan. So hasband blo mi havtu sei no lo fren blo hem.”—Naomi.
Wat pipol duim lo olketa wedding hem difren lo each kantri, and olketa Christian mas followim olketa Bible principle. Hao, Naomi hem garem stret tingting lo dat taem? Taem Naomi ting bak, hem luksavve dat hem jealous nating nomoa. Naomi sei: “Mi feel insecure lo datfala taem. Mi tingse hasband blo mi comparem mi witim olketa nara woman, bat evriting hia hem insaed hed blo mi nomoa.”
Nomata wat nao reason, wei for jealous nating savve mekem iu suspectim spouse blo iu and accusim hem rong and sei hem no faithful. Diskaen feeling for no trustim spouse blo iu savve spoelem marit blo iu and health blo iu tu.
Bible principle: “Wei for jealous hem olsem cancer.”—Proverbs 14:30, Easy-to-Read Version.
Hao nao iu savve kontrolem feeling for jealous?
Buildimap trust blo iu. Instead for lukaotem olketa saen wea mekem iu tingse hem no faithful, tingim olketa tings wea spouse blo iu duim wea mekem iu for trustim hem.
“Mi tingim olketa gud quality wea hasband blo mi garem. If hem givim attention lo samwan, datwan hem bikos hem kea for hem, no bikos hem garem rong motive. Mi mas gohed for remindim miseleva dat nomata marit blo parents blo mi hem brek ap, datwan no minim marit blo mi bae olsem.”—Melissa.
Bible principle: “Man wea garem love . . . biliv lo evri samting.”—1 Corinth 13:4, 7.
No tingse wat iu suspectim hem tru. Dr. Leahy, wea iumi storyim finis, hem raet olsem: “Samfala taem iumi garem wanfala tingting and iumi bilivim dat hem tru. From iumi sure lo datwan, iumi tingse hem nao pruvim dat wat iumi tingim hem tru. Bat if iumi bilivim dat wanfala samting hem tru, datwan no minim dat hem really tru, and olketa feeling blo iumi tu hem no pruvim dat hem tru.”b
“For guessim wanfala samting and then conclude lo datwan hem savve creatim olketa problem wea hem no lo there lo first ples.”—Nadine.
Bible principle: “Showimaot long evriwan, iufala no ova tumas.”—Philippi 4:5.
Storyim feeling blo iu. Nomata wat nao mekem iu for jealous, storyim feeling blo iu lo spouse blo iu mekem iutufala savve kamap witim samfala baondri saed lo behaviour wea iutufala evriwan agree lo hem.
“Taem iutufala story, iu mas garem mindset dat spouse blo iu no laek for mekem iu feel nogud, and hem tu laek for savve why nao iu feel olsem. Mas garem mindset dat spouse blo iu laek for duim stret samting. Maet iu ova sensitive and expectim tumas samting. Or maet spouse blo iu, hem no realizim dat hem no givim attention wea iu needim.”—Ciara.
Bible principle: “Man mas no tingim hemseleva nomoa, bat hem mas tingim nara pipol tu.”—1 Corinth 10:24.