Waswe, Corruption lo Gavman Bae Finis Enitaem?

Corruption wea olketa bigman blo gavman duim hem problem evriwea lo world and hem kosim staka nogud samting.a Olsem example, lo taem blo COVID-19 pandemic, pipol sei olketa bigman lo staka kantri stealim selen wea olketa shud iusim for helpem pipol lo datfala pandemic and iusim selen hia for mekem olketa seleva rich. Datfala corruption stopem staka pipol for kasem health treatment wea olketa needim, and from datwan staka pipol safa and dae.

Staka nogud samting hem kamaot from corruption lo gavman. David Cameron, wea hem prime minister blo United Kingdom bifor, hem sei: “Corruption hem bigfala problem lo world, and hem affectim pipol lo evri gavman lo evri kantri.”

Nomata olsem, iumi savve sure klosap nao evri corruption lo gavman bae finis. Why nao iumi savve sure lo datwan? Lukim wanem Bible hem sei God bae duim.

Why iumi savve God bae duim samting for finisim corruption

Lo Bible, God hem talem disfala toktok: “Mi [Jehovah] nao mi laekem tumas olketa wei wea hemi stret, bat mi barava les long olketa wei fo stil, an fo duim olketa ravis samting.”b (Aesaea 61:8) God hem lukim taem pipol safa bikos lo samting wea olketa narawan duim wea corrupt. (Provebs 14:31) God talem disfala promis: “Bikos olketa nogud pipol ya i gohed fo spoelem olketa pua pipol, . . . bae mi kam nao fo sevem olketa.”—Sams 12:5.

Wat nao bae God hem duim? Bae hem no duim samting for trae mekem olketa gavman wea stap distaem for kamap gud. Hem bae changem evri gavman distaem witim gavman blo hemseleva, wea Bible kolem datwan “Kingdom blo God.” (Mark 1:14, 15; Matthew 6:10) Bible sei: “God long heven bae hemi mekem wanfala kingdom fo kamap wea . . . bae hemi pisisim finis olketa narafala kingdom, an rul blong hem bae hemi stap evritaem olowe.” (Daniel 2:44) God bae iusim datfala Kingdom for finisim corruption wea happen lo world distaem.

Wanfala gavman wea no savve corrupt

Hao nao iumi savve Kingdom blo God bae no savve corrupt enitaem? Tingim olketa point hia.

1. 1. Paoa. Datfala Kingdom bae kasem paoa blo hem from Olmaeti God.—Revelation 11:15.

   Why datwan hem important: For waka gud, olketa gavman blo man depend lo selen wea olketa kasem from olketa citizen blo kantri. Staka taem diswan mekem chance kamap for pipol tekem bribe, steal, and duim olketa nara samting wea no stret. Bat Olmaeti God nao sapotim Kingdom blo hem, so Kingdom bae evritaem fit for provaedem evri need blo olketa pipol wea hem rul ovarem.—Sams145:16.

2. 2. Ruler. God markem Jesus Christ for rul lo datfala Kingdom.—Daniel 7:13, 14.

   Why datwan hem important: Nomata wanfala man hem gudfala ruler, bat hem savve kasem temptation for duim samting wea no stret. (Eklesiastes 7:20) Bat Jesus showimaot finis hem bae no tekem bribe from eniwan. (Matthew 4:8-11) And tu, love nao muvim hem for duim evri samting wea hem duim for pipol, and hem laekem olketa wea hem rul ovarem for kasem gud samting.—Sams 72:12-14.

3. 3. Olketa Law. Evri law blo Kingdom blo God hem perfect, and mekem olketa wea followim for hapi.—Sams 19:7, 8.

   Why datwan hem important: Staka taem, olketa law blo man olketa no isi for minim, no isi for followim, or police no duim eniting taem pipol no obey, and datwan givim staka chance for corruption. Bat olketa law blo God evritaem mek sense, isi for followim, and olketa wea followim kasem gud samting. (Aesaea 48:17, 18) And tu, olketa law hia no just affectim wanem pipol duim bat why olketa duim. (Matthew 22:37, 39) And from God savve lukluk lo heart blo man, iumi savve sure hem kaen and showimaot mercy taem hem deal witim olketa wea traem best for followim olketa law blo hem.—Jeremaea 17:10.

Lo future, corruption lo gavman bae finis. Mifala invaetem iu for lanem moa samting abaotem disfala promis lo Bible.

• Readim article lo English “God’s Kingdom—A Government With No Corruption” sapos iu laek lanem thrifala reason moa why Kingdom blo God bae no enitaem corrupt.

• Watchim video Wanem Nao Kingdom Bilong God? sapos iu laek lanem moa samting abaotem disfala gavman blo God and wanem hem bae duim for earth.

• Traem free Bible course blo mifala and lukim olketa gud samting wea iu savve kasem from olketa promis lo Bible.