Hao, Bible Savve Helpem Iu for Winim Drug Addiction?

Each year, staka million pipol dae bikos olketa tekem drugs or samwan wea tekem drugs nao kosim dae blo olketa. During lo COVID-19 pandemic, disfala problem hem kamap worse. Wisdom wea stap lo Bible hem helpem staka for winim wei for addict lo drugs. If iu stragol witim disfala problem, wisdom hia savve helpem iu tu.a

Lo disfala article

Why nao iu shud luk lo Bible for advaes for helpem iu winim addiction?

Olketa man wea duim research faendaot dat staka taem wei for addict hem result blo olketa problem olsem loneliness, stress, anxiety, and depression. Bible savve helpem iu for buildimap faith wea iu needim for deal witim olketa challenge wea maet hem contribute lo addiction. Bible storyim hao iu savve garem klos frenship witim God. (Psalm 25:14) Witim help blo God, iu savve winim olketa problem wea luk olsem hem hard for iu solvem seleva.—Mark 11:22-24.

Fofala Bible principle wea savve helpem iu for brek free from addiction

1. Lane abaotem Jehovah God.b (John 17:3) Hem nao Creator and Source blo barava bigfala paoa. Winim datwan, hem loving Dadi blo iu lo heven. Hem laek for garem klos frenship witim iu and iusim paoa blo hem for helpem iu. (Isaiah 40:29-31; James 4:8) If iu chus for benefit from love blo hem, iu bae kasem wonderful future wea hem promisim.—Jeremiah 29:11; John 3:16.
2. Askem Jehovah for helpem iu. Prea lo God and askem hem for helpem iu for winim addiction blo iu mekem iu savve kamap “holy [or, klin] and . . . God savve hapi long [iu].” (Rome 12:1) Thru lo holy spirit or paoa blo hem, bae hem givim iu “strong wea winim strong bilong man.” (2 Corinth 4:7; Luke 11:13) Paoa hia bae helpem iu for lusim wei for iusim drugs and for “garem niufala wei” wea hem followim will blo hem.—Colossae 3:9, 10.
3. Fulimap mind blo iu witim tingting blo God. (Isaiah 55:9) God bae helpem iu for “garem wanfala niu tingting,” wea diswan bae mekem iu for continue changem tingting blo iu, wea bae helpem iu for brek free from wei for addict. (Ephesus 4:23) Tingting blo God stap lo Bible, so hem barava important for readim Bible evritaem. (Psalm 1:1-3) Staka pipol benefit taem samwan helpem olketa for understandim wat Bible teachim. (Acts 8:30, 31) Olketa Jehovah’s Witness offerim free Bible study course. Mifala invaetem iu for attendim tu olketa meeting blo mifala, wea mifala story abaotem wat Bible talem and hao mifala savve applyim olketa teaching blo hem lo laef blo mifala.
4. Chusim gud association. Olketa wea iu frens witim savve barava influencim iu, lo gud wei or lo nogud wei, lo olketa tings wea iu addict lo hem. (Proverbs 13:20) Iu savve faendem olketa gud frens among olketa wea worshipim God, and hem laekem iu for benefit from frenship blo olketa. (Psalm 119:63; Rome 1:12) Chusim gud entertainment blo iu tu bikos for tok stret, iu associate witim olketa character wea iu watchim, lisin lo olketa, or read abaotem. Avoidim eniting wea bae affectim disison blo iu for duim stret samting.—Psalm 101:3; Amos 5:14.

Olketa Bible verse wea savve helpem iu for winim addiction

Psalm 27:10: “Nomata sapos own dadi and mami blo mi lusim mi, Jehovah nao bae tek kea lo mi.”

“Mi no savve lo really dadi blo mi, and diswan mekem mi for feel emti. Taem mi savve lo Jehovah God olsem wanfala real Person wea barava lovem mi, laef blo mi garem mining and mi fit for lusim addiction blo mi.”—Wilby, from Haiti.

Psalm 50:15: “Kol kam lo mi lo taem blo trabol. Bae mi rescuem iu.”

“Staka taem, disfala verse strongim mi for no givap, nomata bihaen mi foldaon lo temptation for tekem drugs moa samfala taem. Jehovah keepim promis blo hem.”—Serhiy, from Ukraine.

Proverbs 3:5, 6: “Trustim Jehovah lo full heart blo iu, and no depend lo savve blo iuseleva. Tingim hem lo evri samting wea iu duim, and hem bae showim iu stretfala road.”

“Olketa verse hia helpem mi for trustim Jehovah, and no trustim miseleva. Witim strong blo hem, mi fit for changem laef blo mi.”—Michele, from Italy.

Isaiah 41:10: “Iu no fraet, bikos mi stap witim iu. Iu no wari, bikos mi nao God blo iu. Bae mi strongim iu, ia, mi bae helpem iu, mi bae barava hol strong lo iu witim raet hand blo mi wea duim raeteous samting.”

“Taem mi no tekem drugs mi barava safa from anxiety. Disfala scripture convincim mi dat God bae helpem mi for winim anxiety blo mi, and hem duim datwan.”—Andy, from South Africa.

1 Corinth 15:33: “No letem eniwan laea long iufala. Sapos man hem fren witim pipol wea wei bilong olketa hem nogud, olketa bae spoelem gudfala wei bilong hem.”

“Olketa wea mi associate witim nao introducem drugs lo mi and gogo mi addict lo hem. Mi fit for winim only afta mi stop for associate witim olketa and garem olketa frens wea no iusim drugs wea mi admirem laefstael blo olketa.”—Isaac, from Kenya.

2 Corinth 7:1: “Iumi mas klinim from body bilong iumiseleva eni samting wea savve mekem body or tingting bilong iumi for no klin.”

“Olketa toktok hia motivatim mi for traem best for klin saed lo body and for lusim olketa tings wea mi addict lo hem lo past and wea spoelem miseleva nomoa.”—Rosa, from Colombia.

Philippi 4:13: “Nomata wanem samting hem kasem mi, paoa wea mi kasem from God nao hem strongim mi for gohed.”

“Mi savve dat witim strong blo miseleva nomoa bae mi no stop for tekem drugs, so mi prea lo God for helpem mi. Hem givim mi strong wea mi barava needim.”—Patrizia, from Italy.

Samfala experience moa: Hao Bible helpem olketa for winim addiction

Joseph Ehrenbogen hem growap lo ples wea violence hem evriwea and gogo hem addict lo alcohol, tobacco, marijuana, and heroin. Tu-thri taem, hem klosap dae bikos hem overdose. Wanfala Bible scripture nao convincim hem dat hem fit for change. Readim story blo hem lo article, “Distaem Mi Tinghae Long Olketa Woman and No Ting Daonem Miseleva.”

Dmitry Korshunov hem foldaon staka taem lo temptation for drinkim alcohol taem hem stragol for lusim wei for addict lo alcohol. Watchim video ‘Mi Les Long Laef Bilong Mi’ for lukim wat nao helpem hem for succeed.

Hao, Bible stopem man for kasem medical treatment for addiction?

Nomoa. Bible sei: “Pipol wea sik nao need for go lukim doctor, no olketa wea strong.” (Matthew 9:12) U.S. National Institute on Drug Abuse sei tu: “Wei for addict lo drugs hem wanfala disease wea no isi for winim, and for garem strong will nomoa for stop for iusim drugs, hem no inaf.” Hem tru, help wea God provaedem hem strong winim own strong blo man or strong will blo hem. Nomata olsem, staka wea kamap free from wei for addict taem olketa followim Bible advaes, olketa needim medical treatment tu.c Example, wanfala man wea nem blo hem Allen sei: “Taem mi stop for tekem alcohol, physical pain wea mi experiencem hem big tumas. So lo dat taem mi realizim mi needim medical treatment witim spiritual help wea mi kasem.”

Hao, Bible stopem medical treatment wea man tekem drug for daonem pain?

Nomoa. Bible storyim alcohol olsem treatment for sik or for daonem pain wea samwan kasem taem hem klosap for dae. (Proverbs 31:6; 1 Timothy 5:23) Bat, semsem olsem alcohol, drugs wea man savve tekem for daonem pain hem savve addict lo hem tu if hem no careful. So hem wise for luksavve lo danger blo datwan and barava careful taem iumi tekem medicine or drugs wea doctor prescribem for daonem pain.—Proverbs 22:3.

a Nomata disfala article hem focus lo wei for winim drug addiction, olketa Bible principle wea iumi storyim savve helpem tu olketa wea stragol witim nara addiction olsem alcohol, tobacco, kaikai, gambling, pornography, or social media.

b Jehovah hem nem blo God wea Bible storyim. (Psalm 83:18) Lukim tu article “Hu Nao Jehovah?”

c Staka treatment center, hospital, and recovery program savve givim help. Each wan shud ting raonem gud olketa option wea available and then disaedem which treatment nao fitim hem.—Proverbs 14:15.