Waswe, Man Savve Winim Faet Againstim Drug?

WEI for winim faet againstim olketa drug hem nambawan goal, bat hem no isi samting for duim. Tufala barava strong paoa nao muvim diswan—supply and demand. For klosap wan handred year, olketa gavman and police trae hard for katem daon supply. Tingting bilong olketa hem simpol: Nomoa drug, nomoa man for depend long drug.

Attakim Datfala Supply

For kasem diswan, olketa drug police kasholem finis planti drug, and wei wea planti kantri waka tugeta lead go for arrestim olketa main man for sellim drug. Bat trufala samting hem, nomata waka bilong police maet forcem samfala pipol wea sellim drug for muv long difren ples, lukaotem narafala ples for sellim drug, or for kamap moa careful, diswan no stopem olketa. Wanfala police expert saed long drug hem talem olsem: “Mifala no fitim pipol for sellim drug taem olketa no savve short long selen and mifala mas faet for kasem selen.”

Joe de la Rosa, wanfala bilong Gibraltar Police Force, talem Wekap! abaotem wei wea hem hard tumas for kontrolem gogo bilong drug midol long Africa and Iberian Peninsula. Hem sei: “Insaed 1997 mifala hipimap klosap 400 kilo bilong cannabis resin. Planti long olketa mifala no aotem from pipol wea sellim drug; mifala faendem olketa float olabaot long sea or sea karem kam olketa long sanbis. Datwan givim iu samfala idea long haomas drug nao olketa tekem akros from Gibraltar evri year. Wanem mifala tekem hem smolfala part long hem nomoa. Olketa wea karem drug from Africa go long Spain garem olketa speedboat wea fast tumas winim motorboat bilong mifala. And sapos olketa luksavve police maet arrestim olketa, olketa torowem aot olketa drug hia long sea, so mifala bae no garem eni pruv for accusim olketa long hem.”

Olketa police feisim semkaen problem evriwea long world. Olketa man wea travel, olketa smol aeroplane, olketa container ship, and nomata olketa submarine tu tekem haed olketa drug akros long sea or thru olketa spialaen. Wanfala report bilong United Nations wakem aot hao “olketa need for kasholem maet winim 75 percent long drug wea olketa sendem aot evriwea long world bifor olketa savve barava katem daon gogo bilong drug.” Distaem, namba wea olketa kasholem hem maet no hae winim 30 percent for cocaine—and moa low for olketa nara drug.

So why nao olketa gavman no attakim botom bilong problem hia and distroem evri cannabis plant, olketa opium plant, and olketa bush coca? No longtaem go nomoa United Nations sei for duim olsem, bat hem no wanfala isi samting. Cannabis savve grow long klosap eni garden nomoa. Wanfala main area long Andes wea coca grow long hem nao olketa tingim olsem “aotsaed ples wea gavman kontrolem.” Hem semsem witim olketa farawe area bilong Afghanistan and Burma, wea hem main ples bilong opium and heroin.

For mekem samting hard moa, olketa wea sellim drug savve kwiktaem changem drug, wea demand hem kamap big. Olketa secret laboratory savve wakem olketa drug hia long klosap evriwea long world.

Waswe, gudfala waka bilong police and hardfala taem for stap insaed prison savve daonem drug bisnis? Staka tumas pipol for givimaot olketa drug stap, staka tumas pipol wea depend long drug, and no staka policeman for mekem datfala idea waka. Olsem example, United States garem klosap tu million pipol insaed prison—planti long olketa brekem law long saed bilong drug. Bat fraet long prison nating stopem olketa for tekem drug. Long planti poor kantri wea drug bisnis hem grow, olketa police force wea no staka and no garem gud pei luksavve olketa no fit for stopem disfala problem.

Waswe, Man Savve Daonem Demand for Drug?

Sapos man hard for kontrolem supply bilong drug, hao nao bae hem savve daonem disfala demand for drug? Time magasin hem sei: “Disfala faet againstim drug hem barava wanfala faet bilong heart and mind tu, no wanfala problem for olketa police and kot nomoa for deal witim.”

Joe de la Rosa, wea iumi storyim finis, bilivim tu hao education nomoa hem only wei for faet againstim olketa nogud drug. Hem sei: “Fasin for depend long drug hem problem wea community nao mekem kamap, so iumi mas changem community or changem tingting bilong pipol. Iumi trae for mekem olketa skul, dadi and mami, and olketa teacher for join insaed mekem evriwan savve hao danger hem stap, hao drug hem stap, and hao pikinini bilong olketa savve foldaon long diswan.”

Wanem Olketa Witness Bilong Jehovah Duim

For planti year finis Olketa Witness Bilong Jehovah barava waka hard for teachim pipol for stap klia from olketa drug. Olketa redyim information wea savve helpem olketa dadi and mami for teachim pikinini bilong olketa abaotem olketa danger bilong drug.a And tu, ministry bilong olketa help for stretem bak living bilong planti pipol wea iusim and sellim drug.

Olketa introducem Ana, wea iumi storyim long article bifor, long Olketa Witness Bilong Jehovah bikos sista bilong hem herem hao olketa win for helpem pipol wea depend long drug. Ana no mas interest long Bible, bat hem go long wanfala assembly wea olketa Witness holem. Long there hem lukim wanfala bigman saed long drug bat wea barava change long lukluk and living bilong hem. Ana sei: “Mi ting hao sapos hem change, mi savve duim tu. Wei wea hem change pruvim long mi hao mi shud acceptim wanfala Bible study.

“Start from firstaem mi studyim Bible, mi disaed for stap long hom, bikos mi savve sapos mi lusim haos, mi bae meetim olketa nara pipol wea iusim drug and mi bae tekem drug moa. Mi savve finis hao drug hem rong and hao God no hapi long disfala fasin. Mi lukim tu samting wea drug duim long pipol and nogud samting wea mi duim long famili bilong mi. Bat mi needim spiritual strong for kamap free from wei for slave long drug. Hem barava hardfala samting taem paoa bilong drug hem go aot from body. For samfala taem mi sleep for full day taem paoa bilong drug hem go aot from body. Bat hem olraet nomoa.”

Barava Hope and Mining

Hasband bilong Ana, Pedro, wea iumi storyim finis long nara article, garem semkaen wei for kamap free. “Wanday taem mi smokem marijuana long haos bilong brata bilong mi, mi lukim wanfala buk wea title bilong hem mekem mi interest tumas,” Pedro hem ting bak. “Hem garem title: Truth Where Bringim Man long Life All-the-way. Mi tekem go hom, readim, and chekim olketa scripture. Mi sure mi faendem truth nao.

“Wei for readim Bible and story bilong nara pipol abaot samting mi lanem mekem mi feel moabeta and daonem feeling bilong mi for laekem drug tumas. Mi disaed for no go ahed long plan bilong mi for iusim gun for steal from wanfala petrol station. Wanfala fren hem studyim Bible witim Olketa Witness Bilong Jehovah, and mi kwiktaem followim example bilong hem. Insaed naenfala month mi changem living bilong mi and baptaes. Insaed datfala taem, planti fren bilong mi bifor offerim mi drug, bat semtaem mi start for story long olketa abaotem Bible. Samfala acceptim. Wanfala winim wei wea hem depend long drug.

“For kamap free from drug, iu need for garem hope. Bible givim mi datfala hope, hem givim mining long laef bilong mi, and showim mi long kliafala wei tingting bilong God abaotem drug and raf fasin. Mi luksavve hao mi feel moabeta taem mi lane abaotem Almighty—and diswan no garem nogud saed. Bihaen, wei wea mi kaban tugeta witim Olketa Witness Bilong Jehovah wea garem klinfala living helpem mi for go ahed long disfala wei.”

Man for Sellim Drug Kamap Man for Leim Brik

José, datfala man for sellim drug wea iumi storyim long article bifor, distaem hem man for leim brik moa. Hem no isi long hem for lusim richfala bisnis bilong hem. “Iu savve kasem bigfala selen from drug,” hem sei, “bat hem no gudfala wei for kasem selen. Mi lukim olketa young wan witim olketa handgun and olketa expensive car. Olketa famili brekdaon, nogud fasin kamap evriwea long olketa street, planti pipol wea depend long drug steal long olketa car, stealim olketa stoa, or conim pipol for kasem selen for drug. Staka start witim marijuana, muv go long ecstasy or nara drug, and then traem cocaine or heroin tu. Mi luksavve hao mi join long wei for mekem pipol for start long olketa wei olsem.

“Taem mi studyim Bible witim Olketa Witness Bilong Jehovah, diswan mekem mi bilivim hao wei wea mi join saed long drug hem rong. Mi want for garem wanfala klin conscience, and waef bilong mi, wea study tu, barava wantem sem samting. Tru tumas, hem hard for stop for sellim drug. Mi explainim long pipol wea tekem drug from mi and pipol wea mifala waka tugeta hao mi studyim Bible and lusim finis drug bisnis. Firstaem, olketa nating bilivim mi, and samfala still no bilivim. Nomata olsem, mi stop for klosap tufala year finis, and mi nating sorre.

“Insaed year wea pas finis, mi go ahed for waka olsem man for leim brik, wea hem nao waka bilong mi. Distaem long wanfala month mi kasem wan quarter long wanem mi savve kasem insaed wanfala day olsem man for sellim drug. Bat diswan nao hem wei bilong living wea moabeta, and mi moa hapi.”

Wanfala Ansa wea Bae Help Evriwea Long World

Samfala pipol wea sellim drug no fraet for finis from drug bisnis. And olketa difren kaen wei for stretem bak living helpem planti thousand pipol for winim wei for depend long drug. Bat, olsem World Drug Report talem, “for olketa wea iusim drug for longfala taem finis, tu-thri nomoa fit for stap klia from drug.” Sorre tumas, for evri man wea stretem bak living bilong hem from drug, samfala niu wan moa foldaon long sem trap. Supply and demand hem go ahed for grow.

For winim disfala faet againstim drug, iumi mas garem wanfala ansa for full world bikos disfala problem hem stap evriwea long world. From diswan, United Nations Commission on Narcotic Drugs sei olsem: “Nomata planti kantri luksavve hao wei for iusim nogud drug, wei for sellim drug and olketa nogud fasin wea join witim drug hem wanfala danger for sef living, pablik no barava luksavve hao olketa drug wea law tambuim hem wanfala problem wea stap evriwea long world wea wan kantri seleva no savve stretem.”

Bat, waswe, olketa gavman bilong disfala world bae join tugeta for finisim disfala trabol wea stap evriwea long world? Samting wea kamaot from diswan no encouragem man. Nomata olsem, Bible point go long wanfala gavman long heven wea bae go ovarem olketa spialaen bilong nation olsem barava trufala ansa. Bible promisim iumi hao Kingdom bilong God, wea Jesus Christ rulim, bae stap “for olowe and olowe.” (Revelation 11:15) Dastawe, anda long Kingdom bilong God, education wea God givim bae mek sure hao bigfala demand for drug bae finis. (Isaiah 54:13) And olketa problem saed long living and feeling wea distaem hem muvim pipol for want for iusim olketa nogud drug bae finis evribit.—Psalm 55:22; 72:12; Micah 4:4.

Waswe, Iu Needim Help?

Nomata distaem, hope bilong Kingdom bilong God anda long Christ hem muvim pipol for sei no long drug. Sapos iu laek for savve long samfala moa information, plis lukim Olketa Jehovah’s Witness long area bilong iu.

[Footnote]

[Piksa long page 11]

Wanfala drug arrest

[Credit Line]

K. Sklute/SuperStock

[Piksa long page 12]

Pedro and waef bilong hem, Ana, studyim Bible witim olketa pikinini bilong tufala

[Piksa long page 13]

Pedro hem putim olketa samting for security