World Hem Depend Long Olketa Drug
FROM MAN WEA RAET FOR WEKAP! LONG SPAIN
BABY wea just born krae big long wanfala hospital long Madrid, Spain. Wanfala nurse trae for mekem hem stop krae bat hard nao. Disfala baby safa from pain wea kamaot from wei wea datfala drug, heroin, hem short insaed body bilong hem. Samting wea moa worse, hem garem HIV. Mami bilong hem depend long heroin.
Wanfala mami from Los Angeles no savve hem draevem car bilong hem long wanfala street wea wanfala gang wea sellim drug olketa kontrolem. Olketa sutim car witim katres and killim dae baby dota bilong hem.
Planti thousand kilometer awe, long Afghanistan, wanfala poor man hem wakem wanfala garden bilong poppy flaoa. Year wea go pas hem gud year; olketa samting wea hem growim go ap 25 percent. Opium poppy garem gudfala price, and famili bilong disfala poor man faet for stap laef. Bat pipol bae wakem disfala naesfala poppy for kamap heroin, and heroin savve distroem laef.
Wanfala young girl wea savve shame tumas long Sydney, Australia, go long wanfala ples for dance evri Saturday naet. Evritaem hem faendem hard for kaban witim pipol long there, bat no longtaem go nomoa wanfala medicine wea olketa kolem ecstasy mekem hem for no shame. Olketa tekem haed olketa medicine hia long Australia from Netherlands, nomata olketa laboratory long there tu start for sellim. Ecstasy mekem music saond naes tumas, and young girl hia lusim fasin bilong hem for hol bak. Hem feel olsem hem luk naes nao.
For Manuel, wanfala man nating wea waka hard for living from smol farm bilong hem long Andes, living kamap lelebet isi taem hem start for growim coca. Manuel hem laek for stop for harvestim crop hia, bat hem fraet nogud diswan mekem olketa raf man wea kontrolem coca production kros tumas.
Diswan hem samfala nomoa long olketa man wea kasem trabol from drug wea go ahed for spoelem planet bilong iumi.a Nomata olketa hia pipol for iusim, for wakem, or olketa wea no joinim, drug go ahed for tekovarem laef bilong olketa.
Hao Big Nao Drug Problem?
UN Secretary-General, Kofi Annan, hem sei: “Drug hem go ahed for spoelem community bilong iumi, mekem raf fasin kamap big, spreadim olketa sik olsem AIDS, and killim dae young pipol and future bilong iumi.” Hem sei moa: “Distaem samting olsem 190 million pipol wea iusim drug stap long world. No eni kantri hem free. And no eni kantri seleva savve stopem drug bisnis insaed olketa spialaen bilong hem. Evri kantri need for duim samting abaotem drug bisnis wea kamap evriwea long world.”
For mekem samting moa worse, insaed olketa year wea just go pas wei for wakem olketa niu kaen drugb hem go ahed. Olketa mixim tugeta samfala samting for mekem man wea iusim garem hae, or naesfala feeling. From hem cheap for wakem olketa drug klosap eniwea, olketa police no fit nao for kontrolem olketa. Long 1997 United Nations Commission on Narcotic Drugs warnim hao long planti kantri diskaen drug wea olketa mixim tugeta witim samfala samting hem kamap “main samting bilong olketa man wea iusim” and pipol mas tingim diswan olsem wanfala “danger samting long evri community long nextfala century.”
Olketa niufala drug barava strong olsem olketa bifor wan tu. Crack cocaine hem strong winim cocaine long wei wea hem mekem man depend long hem. Olketa niu kaen cannabisc plant garem moa strong for spoelem mind, and wanfala niu drug wea olketa kolem ice maet wanfala long olketa wea barava spoelem man.
Selen and Paoa Bilong Drug
Nomata maet olketa wea iusim drug no staka, namba nomoa hem inaf for givim bigfala paoa long olketa drug lord, olketa wea organize for wakem and givimaot olketa drug. Olketa nogud man hia ranem bisnis wea againstim law wea kamap barava rich—and barava bigfala— bisnis long earth. Maet drug bisnis kasem samting olsem 8 percent long evri bisnis evriwea long world, or klosap $2,000,000,000,000 evri year. Taem selen bilong drug muv raonem world, hem mekem olketa criminal kamap rich, spoelem olketa police, grisim hand bilong olketa politician, and saportim terrorism tu.
Waswe, man savve duim eni samting for stopem disfala drug problem? Long wanem wei nao drug bisnis affectim selen bilong iu, sef living, and laef bilong olketa pikinini bilong iu?
[Olketa footnote]
a Insaed olketa article hia, mifala tok abaotem olketa drug wea olketa no iusim for medical reason and wea olketa givimaot long wei wea no fitim law.
b Wanfala drug wea olketa changem lelebet olketa samting wea olketa wakem long hem, planti taem olketa duim diswan for stap klia from law wea stopem olketa nogud drug.
c Marijuana kam from olketa top part flaoa bilong cannabis plant wea olketa draem. Resin from disfala sem plant hem hashish. Olketa wea iusim drug savve smokem tufala evriwan.
[Map long page 4, 5]
(Lukim pablikeson for olketa nara information)
Wei for Wakem and Traffikim Drug Evriwea Long World
OLKETA MAIN AREA FOR WAKEM:
Cannabis—herbal (marijuana) and resin (hashish)
Heroin
Cocaine
Olketa arrow showim olketa main road bilong drug.
[Credit Line]
Kam from: United Nations World Drug Report
[Credit Line long page 3]
U.S. Navy foto