Olketa Bible Principle wea Savve Helpem Iu If Iu Finis From Waka
If iu finis from waka, datwan savve barava affectim iu saed lo selen and tu famili laef, saed lo emotions and tingting. If iu ting raonem olketa suggestion hia wea base lo olketa Bible principle, hem savve helpem iu for deal witim datwan.
Storyim feeling blo iu lo others.
Wat Bible talem: “Wanfala tru fren hem showim love evritaem.”—Proverbs 17:17.
Bihaen iu lusim waka blo iu, maet iu feel sad, kros, or konfius, or maet iu feel iusles. Taem iu storyim feeling blo iu witim olketa lo famili and olketa klos frens, bae olketa savve sapotim iu saed lo emotions. Maet olketa givim tu olketa practical advaes wea savve helpem iu taem iu lukaotem nara waka.
Avoidim wei for ova wari tumas.
Wat Bible talem: “No warim samting wea bae happen tumoro, leavim go datwan for tumoro nao, bikos evri day bae olketa problem kamap.”—Matthew 6:34.
Bible encouragem iumi for plan ahed. (Proverbs 21:5) Bat, hem advaesem iumi tu for no wari tumas and no wari abaotem future. Staka taem wat iumi wari abaotem endap hem nating happen nomoa. Hem beta for focus lo wat iumi bae duim nomoa tuday.
Bible storyim tu samfala wise advaes moa lo hao for cope witim stress wea maet iu kasem distaem. Readim article “Wanem Iu Savve Duim Taem Iu Stress” for lanem moa samting.
Changem hao iu spendem selen.
Wat Bible talem: “Mi lanem . . . nomata mi garem staka samting or nomoa, mi lane for satisfae nomoa.”—Philippi 4:12.
Adjust for fitim situation blo iu distaem. Diswan minim tu for iu changem nao hao iu spendem selen mekem hem fitim nomoa wat iu garem. Mas careful for no kaon karangge.—Proverbs 22:7.
For kasem samfala idea moa lo hao for adjust for fitim situation blo iu saed lo selen distaem, lukim article “Wat for Duim Taem Pei blo Iu Katdaon.”
Iusim taem blo iu lo wise wei.
Wat Bible talem: “Iufala mas wise long samting wea iufala duim . . . , iusim gud taem wea iufala garem.”—Colossae 4:5.
Nomata iu no garem job schedule wea followim taem, followim gudfala routine lo hao for iusim taem blo iu. Taem iu duim olsem, bae iu garem gudfala schedule lo wat iu duim evriday and bae iu feel gud and respectim seleva.
Willing for change.
Wat Bible talem: “Man wea waka hard lo eni waka wea hem duim bae kasem gud samting.”—Proverbs 14:23.
Mas willing for duim waka wea difren from wat iu duim bifor. Maet iu need for acceptim eni job wea no olsem job blo iu bifor and pei blo hem no big nomoa.
No givap.
Wat Bible talem: “Plantim olketa seed blo iu lo morning and no letem hand blo iu for rest go kasem evening, bikos iu no savve which wan nao bae grow.”—Ecclesiastes 11:6.
Continue for lukaotem waka. Talem lo others dat iu lukaotem wanfala job distaem. Storyim lo olketa relative, others wea iu savve lo olketa, former workmate, and olketa neiba blo iu. Chekim olketa employment agency, olketa advertisement wea needim samwan for duim tu-thri waka for olketa, and olketa vacancy lo website blo olketa company. For faendem wanfala job, iu mas redi for go lo staka job interview and for submitim staka résumé.