6 Million Pipol Dae From COVID—Wat Nao Bible Talem Abaotem Diswan?

Information from World Health Organization (WHO) hem sei, kam kasem May 23, 2022, 6.27 million pipol dae finis from COVID-19. Nomata olsem, lo wanfala nius article wea WHO pablisim lo May 5, 2022, olketa sei luk olsem really namba wea dae bikos lo datfala sik hem staka winim datwan. Datfala article sei, lo 2020 and 2021, “total namba blo pipol wea dae lo disfala pandemic bikos lo COVID or bikos olketa sik finis and kasem COVID . . . hem samting olsem 14.9 million pipol.” Waswe, Bible talem eni samting abaotem olketa nogud sik olsem diswan?

Olketa Bible profesi storyim olketa nogud sik

•  Jesus hem sei “olketa barava nogud sik” bae kamap lo taem wea Bible kolem “olketa last day.”—Luke 21:11; 2 Timothy 3:1.

datfala profesi blo Jesus hem kamap tru lo taem blo iumi. Sapos iu laek lanem moa samting abaotem diswan, readim disfala English article “What Is the Sign of ‘the Last Days,’ or ‘End Times’?“

Bible givim comfort

•  “God [hem] givim iumi comfort wea iumi needim. Nomata long eni hard taem wea iumi kasem, hem comfortim iumi.”—2 Corinth 1:3, 4.

Staka wea lusim samwan wea olketa lovem lo dae olketa kasem comfort from wanem Bible talem. Lanem moa samting lo tufala article hia: “Taem Iu Lusim Samwan—Samting wea Savve Helpem Iu“ and “Nambawan Comfort for Olketa wea Sorre.“

Bible storyim hao God bae finisim olketa problem

•  “ Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.”—Matthew 6:10.

Klosap nao,“Kingdom bilong God” bae stretem olketa problem and “no eniwan . . . bae hemi talem dat hemi sik.’” (Mark 1:14, 15; Aesaea 33:24) Lukim disfala video Wanem Nao Kingdom Bilong God? for faendaot moa samting abaotem disfala gavman lo heven and wanem hem bae duim.

Mifala invaetem iu for lanem moa samting abaotem wanem Bible talem, mekem iu and famili blo iu kasem gud samting from wise advaes and olketa nambawan promis wea Bible storyim.