Wanem Nao Bible Talem Abaotem Olketa Barava Nogud Sik?
Ansa From Bible
Bible profesi hao olketa barava nogud sik (olketa sik wea kwiktaem spred, olsem olketa pandemic) bae kasem plande pipol lo olketa last day. (Luke 21:11) Olketa sik hia no panis from God. For tok stret, klosap nao God bae iusim Kingdom blo hem for finisim evri health problem and olketa pandemic tu.
Waswe, Bible profesi abaotem olketa barava nogud sik?
Olketa profesi lo Bible no talem nem blo olketa pandemic or olketa nogud sik, olsem COVID-19, AIDS, or Spanish flu, bat hem profesi abaotem “olketa barava nogud sik.” (Luke 21:11; Revelation 6:8) Olketa nogud sik hia hem part blo saen blo “olketa last day,” wea Bible storyim olsem taem wea “world hem gogo for finis.”—2 Timothy 3:1; Matthew 24:3.
Waswe, enitaem God mekem pipol sik for panisim olketa?
Bible storyim tu-thri taem wea God mekem pipol sik for panisim olketa. Olsem example, hem mekem samfala pipol for kasem datfala sik leprosy. (Nambas 12:1-16; Mektu Kings 5:20-27; Mektu Kronikols 26:16-21) Bat hem no mekem datfala nogud sik wea kasem olketa for spred go lo pipol wea innocent. God mekem olketa kasem kaen sik olsem bikos olketa duim samting for againstim hem.
Waswe, olketa pandemic distaem hem panis from God?
Nomoa. Samfala pipol sei God iusim olketa pandemic and olketa nara nogud sik for panisim pipol distaem. Bat wanem Bible talem no agree witim datwan. Why nao olsem?
Wanfala reason hem bikos samfala wea worshipim God lo bifor and lo distaem tu kasem olketa sik. Olsem example, datfala faithful man Timothy, hem “sik olowe.” (1 Timothy 5:23) Bat Bible no sei hem sik bikos God no hapi lo hem. And distaem tu, samfala wea faithful for worshipim God olketa savve sik or kasem olketa barava nogud sik. Plande taem hem bikos olketa stap lo wanfala ples and seknomoa nogud samting kasem olketa.—Eklesiastes 9:11.
Bible sei tu hao datfala taem for God panisim olketa nogud pipol hem no happen yet. Iumi stap lo “taem for God sevem iumi,” wea hem nao taem wea God invaetem evriwan for fren witim hem and sev. (2 Corinth 6:2) Wanfala wei hem invaetem pipol hem thru lo disfala “gud nius abaotem Kingdom” wea pipol blo hem preach abaotem lo full world.—Matthew 24:14.
Waswe, bae olketa barava nogud sik enitaem finis?
Yes. Olketa profesi lo Bible showimaot klosap nao olketa sik bae finis. Taem Kingdom blo God hem rul, God bae finisim olketa health problem. (Aesaea 33:24; 35:5, 6) Hem bae finisim wei for safa, feelim pain, and dae. (Revelation 21:4) And hem bae mekem olketa wea dae finis for laef bak, mekem olketa savve enjoyim gudfala health and perfect laef lo earth.—Sams 37:29; Acts 24:15.
Olketa verse lo Bible abaotem sik
Matthew 4:23: “[Jesus] go long evri ples long Galilee. Hem teach long olketa sinagog and hem preachim datfala gud nius abaotem Kingdom. Hem healim enikaen sik wea pipol garem.”
Mining: Olketa mirakol wea Jesus duim hem example nomoa lo wanem Kingdom blo God bae klosap duim for evri man.
Luke 21:11: “Olketa barava nogud sik . . . bae kasem plande pipol.”
Mining: Olketa health problem wea kasem pipol lo full world hem part blo saen blo olketa last day.
Revelation 6:8: “Mi lukim wanfala horse wea kala bilong hem luk nogud, olsem man wea sik. Dae nao nem bilong man wea sidaon antap long hem, and grev hem go followim hem. Olketa kasem paoa for . . . iusim . . . olketa barava nogud sik . . . for killim dae pipol.”
Mining: Profesi lo Revelation abaotem fofala man wea raedem horse showimaot olketa barava nogud sik bae happen lo taem blo iumi.