World Cup Savve Really Mekem Pipol for Wan Mind?

Olketa expectim samting olsem faev billion pipol for watchim datfala FIFA World Cup wea hem start lo November 20 and bae finis lo December 18, 2022. Staka pipol feel dat kaen sports program olsem no just encouragem pipol for kam tugeta for watch bat savve helpem pipol lo olketa narafala wei tu.

• “Sport hem garem paoa for changem world. Hem garem paoa for encouragem pipol. Hem mekem pipol for wan mind, only sport savve duim datwan.”—Nelson Mandela, president blo South Africa bifor.

• “Football . . . mekem pipol for garem sem hope, mekem evriwan for hapi, mekem pipol for garem sem interest, mekem pipol for lovem each other, and hem helpem tu pipol from olketa difren ples for wan mind.”—Gianni Infantino, president blo FIFA.a

World Cup or eni nara sports program savve helpem pipol for kasem olketa samting hia? Eni hope stap for pipol savve garem peace and wan mind?

Hao, datwan mekem pipol for barava wan mind?

World Cup wea gohed lo disfala year hem mekem pipol no just ting abaotem football. Hem mekem pipol for argue abaotem olketa social and political issue, olsem human raet, heitim pipol wea garem difren kala skin, and samfala samting saed lo economy.

Nomata olsem, staka pipol ting lo olketa international sport program hia olsem entertainment wea olketa savve enjoyim. Bat, kaen samting olsem no savve mekem pipol for stap gud for olowe. Staka taem pipol savve duim samting wea barava pruvim wei and tingting blo pipol lo taem wea iumi stap wea Bible kolem lo “olketa last day.”—2 Timothy 3:1-5.

Hope for full world garem wan mind

Bible storyim hope for full world garem wan mind. Hem promisim evri pipol lo full world bae garem wan mind anda lo wanfala gavman lo heven wea hem nao “Kingdom blo God.”—Luke 4:43; Matthew 6:10.

King blo datfala Kingdom, Jesus Christ, bae mek sure peace hem stap evriwea lo world. Bible hem sei:

• “Olketa wea raeteous bae olsem grass wea grow gud, and peace bae stap evriwea.”—Psalm 72:7.

• “Hem bae sevem olketa wea poor wea singaot for help . . . Hem bae sevem olketa from olketa wea heitim and raf lo olketa.”—Psalm 72:12, 14.

Nomata distaem, teaching blo Jesus hem helpem finis staka million pipol wea stap lo 239 kantri for wan mind. Olketa lane for lusim wei for heit. For savve moa, readim disfala article series wea garem title “Lusim Wei for Heit.”