Left: Hurricane Ian, Florida, USA, September 2022 (Sean Rayford/Getty Images); center: Wanfala mami and son blo hem ranawe for stap sef, Donetsk, Ukraine, July 2022 (Alex Chan Tsz Yuk/SOPA Images/LightRocket via Getty Images); right: COVID testing, Beijing, China, April 2022 (Kevin Frayer/Getty Images)
GOHED FOR LUKAOT!
2022: Year wea Mekem Pipol Wari and Konfius—Wat Nao Bible Talem Abaotem Diswan?
During year 2022, war, hard taem saed lo economy and natural disaster hem kamap staka taem lo nius. Only Bible nomoa savve explainim mining blo olketa samting hia.
Stretfala mining lo olketa samting wea happen lo 2022
Olketa samting wea happen lo last year hem barava pruvim klia iumi stap lo taem wea Bible kolem lo “olketa last day.” (2 Timothy 3:1) Disfala taem period hem start lo year 1914. Lukim hao olketa samting hia hem barava pruvim wat Bible talem dat bae hem happen lo taem blo iumi:
“War.”—Matthew 24:6.
“2022 Hem Year wea Europe Hem Experiencem Moa Olketa Nogud Samting wea Happen Bikos lo War.”a
Lukim disfala article “Russia Attakim Ukraine.”
“Short lo kaikai.”—Matthew 24:7.
“2022: Hem Year wea Kaikai Hem Short Winim Eni Taem Bifor.”b
Lukim article “War lo Ukraine Bae Mekem Staka Pipol Short lo Kaikai.”
“Sik.”—Luke 21:11.
“Polio hem kam bak moa bat hem kamap monkeypox and COVID-19 still gohed for affectim pipol, hem spred kwiktaem and isi tumas for pas lo olketa narawan and mekem pipol no feel sef.”c
Lukim article “6 Million Pipol Dae From COVID.”
‘Olketa samting wea mekem pipol barava fraet.’—Luke 21:11.
“Barava hot weather, drought, wildfire, and flood. Pipol bae no forgetim lo year 2022, staka samting saed weather hem happen and spoelem staka ples, killim dae staka pipol and mekem staka million pipol evriwea lo world for displace.”d
Lukim article “Temperature lo Staka Ples lo World Hem Hot Tumas.”
“Olketa raeot.”—Luke 21:9.
“Problem saed lo economy mekem staka pipol for kros, especially bikos price blo olketa samting hem gohed for increase, datwan mekem staka pipol for protest. Namba blo olketa protest wea happen lo 2022 hem winim enitaem bifor.”e
Lukim article “Price blo Evri Samting Go Ap Evriwea lo World.”
Wat nao bae happen next year?
No eniwan fit for talem wat bae happen lo 2023. Bat wat iumi savve hem klosap tumas for Kingdom blo God, or gavman blo God lo heven bae finisim olketa nogud samting wea happen lo disfala earth. (Daniel 2:44) Datfala gavman bae finisim olketa samting wea mekem pipol for safa and hem bae mekem plan blo God for disfala earth for kamap.—Matthew 6:9, 10.
Mifala encouragem iu for followim advaes blo Jesus Christ and “gohed for lukaot” taem olketa samting gohed for happen for fulfillim olketa Bible profesi. (Mark 13:37) Plis contactim mifala for savve moa abaotem hao nao Bible savve helpem iu distaem and hao hem savve helpem iu and famili blo iu for garem hope for datfala nambawan future.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.