Temperature lo Staka Ples lo World Hem Hot Tumas—Wat Nao Bible Talem Abaotem Diswan?

Lo July 2022, temperature lo staka ples lo world hem hot winim eni taem bifor:

• “For mek-tu taem disfala month, olketa bigman lo China warnim pipol lo 70-fala city abaotem weather wea bae hot tumas.”—July 25, 2022, CNN Wire Service.

• “Temperature lo staka ples lo Europe hem kamap hot tumas, and olketa bigfala fire bonem olketa forest lo staka kantri.”—July 17, 2022, The Guardian.

• “Lo Sunday, temperature lo staka city lo United States hem hot winim eni taem bifor. Disfala hot weather affectim staka ples lo East Coast and samfala part blo kantri lo South and Midwest.”—July 24, 2022, The New York Times.

Wat nao evri samting hia hem minim? Waswe, gogo bae hem hard for eni samting laef lo earth? Wat nao Bible talem abaotem diswan?

Waswe, olketa hot temperature hia fulfillim olketa Bible profesi?

Yes. Olketa hot temperature wea kasem staka ples lo world hem fitim wanem Bible sei bae happen lo taem blo iumi. Olsem example, lo wanfala profesi, Jesus sei iumi bae ‘lukim olketa samting wea mekem iumi barava fraet,’ or “olketa samting wea barava difren and mekem man fraet.” (Luke 21:11; Good News Translation) Wei wea temperature lo staka ples hem kamap hae tumas distaem, hem mekem staka for tingse gogo olketa man bae spoelem disfala earth.

Waswe, gogo bae hem hard for eni samting laef lo earth?

Nomoa. God creatim earth, and plan blo hem nao for olketa man stap olowe lo hem. (Sams 115:16; Eklesiastes 1:4) God bae no letem olketa man for distroem disfala earth. Bible sei hem promis for “finisim olketa wea spoelem earth.”—Revelation 11:18.

Lukim tufala profesi wea storyim olketa nara samting wea God promis for duim lo earth:

• “Wanfala taem wea bae hemi kam, olketa drae eria bae i hapi tumas, an plande flaoa bae hemi grou long ples wea no eniwan hemi stap long hem.” (Aesaea 35:1) God bae no letem disfala earth for kamap olsem wanfala desert or drae area wea no eni samting fit for laef, bat hem bae mekem olketa ples wea olketa man spoelem for gud bak moa.

• “Yu somaot dat yu lukaftarem disfala wol ya, bikos yu gohed fo sendem kam ren, an yu mekem graon ya fo hemi kamap gudfala.” (Sams 65:9) God bae blessim earth, and earth bae kamap wanfala paradaes.

Sapos iu laek lanem moa samting abaotem hao climate change hem fulfillim olketa Bible profesi, lukim disfala article “Climate Change and Future blo Iumi—Wat Bible Talem.”

Sapos iu laek lanem moa samting abaotem wanem Bible sei God bae duim for stretem evri problem lo environment, lukim disfala English article “Who Will Save the Earth?”