Hem Second Year blo Ukraine War—Wat Hope Nao Bible Storyim?

Friday, February 24, 2023, hem wan year anniversary blo barava nogud samting wea happen, wea hem datfala war lo Ukraine. Samfala report sei samting olsem 300,000 Ukrainian and Russian soldia dae or wounded, and samting olsem 30,000 civilian dae lo datfala war. Bat total namba maet hae winim datwan.

Sorre tumas, hem luk olsem datfala war no klosap for finis yet.

• “Klosap wan year wea Russian forces go in lo Ukraine, no eni saen showim if datfala war bae klosap for finis. No eniwan lo tufala showim dat hem bae win, and luk olsem tufala no savve faendem eni solution wea tufala evriwan agree lo hem.”—NPR (National Public Radio), February 19, 2023.

Hem normal nomoa for staka pipol sorre tumas bikos lo pain and wei for safa wea datfala war and olketa nara war affectim innocent pipol evriwea lo world. Wat hope nao Bible storyim? Hao, enitaem war bae finis?

War wea bae finisim evri war

Bible storyim war wea bae sevem pipol and no killim olketa dae. Staka pipol savve abaotem war blo Armageddon, and Revelation describem olsem “datfala war wea bae kamap long bigfala day bilong Olmaeti God.” (Revelation 16:14, 16) God bae iusim datfala war for finisim evri gavman blo man, wea kosim olketa war wea barava spoelem staka samting. For lanem hao Armageddon bae mekem peace stap for olowe, readim olketa article hia:

• “Wat Nao War blo Armageddon?”

• “Armageddon Hem Gud Nius!”