Why Nao Olketa Jehovah’s Witness No Teksaed Long Politik?
Olketa Jehovah’s Witness no teksaed long politik bikos long wanem Bible hem teachim. Mifala no trae forcem gavman for duim samting, no vote for olketa long politik, and no join tu witim olketa nara sekson wea trae for changem gavman. Long tingting bilong mifala, Bible talem olketa gudfala reason for no duim olsem.
Jesus les for olketa mekem hem joinim politik. (John 6:15) Hem teachim olketa disaepol bilong hem for “no olsem pipol long world” and talem olketa hem no fitim for olketa teksaed long eni samting saed long politik.—John 17:14, 16; 18:36; Mark 12:13-17.
Mifala faithful for sapotim Kingdom bilong God. Jesus storyim disfala Kingdom taem hem sei: “Olketa disaepol bilong mi bae talemaot disfala gud nius abaotem Kingdom long evri ples long world.” (Matthew 24:14) From mifala sapotim and stap anda long Kingdom, and garem waka for preach abaotem Kingdom wea klosap for kam, mifala no teksaed long politik bilong eni kantri.—2 Corinth 5:20; Ephesus 6:20.
From mifala no teksaed, mifala free for story long pipol abaotem gud nius bilong kingdom, nomata wanem politik nao olketa joinim. Mifala trae for showim long toktok bilong mifala and long samting mifala duim, mifala depend long Kingdom bilong God for stretem olketa problem long world.—Psalm 56:11.
From mifala no join insaed olketa raoa saed long politik, mifala garem wan mind evriwea long world. (Colossae 3:14; 1 Peter 2:17) Olketa religion wea join insaed politik divaedem olketa member bilong olketa.—1 Corinth 1:10.
Respect for olketa gavman. Mifala no join witim politik, bat mifala respectim paoa wea gavman garem. Diswan hem followim samting wea Bible talem, bikos aposol Paul hem sei: “Iufala evriwan mas stap anda long olketa wea rul.” (Rome 13:1) Mifala obeyim olketa law, peim tax, and followim olketa arrangement bilong gavman for lukaftarem olketa citizen bilong hem. Mifala no join witim olketa wea trae for againstim gavman bikos Bible hem sei for “prea for olketa king and olketa bigman,” especially taem olketa mas disaedem samting wea savve affectim freedom for worship.—1 Timothy 2:1, 2.
Mifala respectim tu raet bilong pipol for disaed sapos olketa bae joinim politik or nomoa. Olsem example, mifala no trae for stopem olketa election or olketa wea go for vote.
Waswe, diswan hem wanfala niu samting? Nomoa. Olketa aposol and Christian long first century duim sem samting saed long politik. Datfala buk Beyond Good Intentions hem sei: “Olketa first Christian savve olketa mas respectim olketa long gavman, bat olketa no agree for join witim eni samting saed long politik.” Olsem tu, datfala buk On the Road to Civilization hem sei olketa first Christian “no laek for join insaed politik.”
Waswe, diswan minim kantri bae no sef? Nomoa. Mifala laekem peace nomoa. So olketa gavman shud no wari. Long report bilong National Academy of Sciences of Ukraine long 2001 hem sei: “Maet samfala pipol no laekem disison bilong Olketa Jehovah’s Witness for no join insaed politik. Hem nao reason why raf gavman bilong olketa Nazi and Communist accusim and againstim olketa.” Bat nomata olketa Soviet againstim olketa Witness, “olketa gohed for obeyim law bilong kantri. Olketa waka hard long olketa farm and factory. Olketa honest long waka bilong olketa and no duim eni samting for againstim Communist gavman.” Datfala report gohed for sei olketa biliv and wei bilong Olketa Jehovah’s Witness distaem “no spoelem security bilong eni kantri.”