Jesus Bae Finisim Wei for Poor

Taem Jesus lo earth, hem showim big love lo pipol, especially lo olketa wea poor and barava sorre tumas. (Matthew 9:36) Hem even sakrifaesim laef blo hem for benefitim pipol. (Matthew 20:28; John 15:13) Klosap bae hem pruvim moa hem lovem pipol taem hem iusim paoa wea hem garem bikos hem King lo Kingdom blo God for finisim wei for poor evriwea lo earth.

Bible iusim poetry for describem wat Jesus bae duim:

• “Hem bae defendim olketa wea pipol ting daonem, hem bae sevem olketa son blo pipol wea poor.”—Psalm 72:4.

Hao nao iumi savve showim iumi appreciatim evriting Jesus duim finis, and no duim yet for iumi? Wanfala wei hem for lanem “gud nius abaotem Kingdom blo God,” wea hem nao datfala message wea hem preach abaotem. (Luke 4:43) Readim article “Wanem Nao Kingdom Bilong God?”