Hao, Eni Stable Gavman Stap wea Savve Rulim Planet blo Iumi?—Wat Nao Bible Talem?

Olketa gavman raonem world garem staka problem. Nomata lo olketa kantri wea luk olsem gavman blo olketa stable, olketa report kamap abaotem corruption wea olketa politician involve lo hem, olketa close election, politikol division, and civil unrest.

Bible storyim wanfala gavman wea hem stable. Maet iu savve abaotem datfala gavman finis. Hem nao gavman wea Jesus Christ mentionim lo Lord’s Prea.

“Iufala mas prea long wei olsem: ‘Dadi bilong mifala long heven, mifala laekem nem bilong iu for holy. Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.’”—Matthew 6:9, 10.

Wat nao Bible talem abaotem datfala Kingdom?

Datfala Kingdom hem wanfala stable gavman

Datfala Kingdom rul kam from heven.

Jesus kolem datfala gavman “Kingdom blo heven.” (Matthew 4:17; 5:3, 10, 19, 20) Dastawe Jesus sei: “Kingdom bilong mi hem no bilong disfala world.”—John 18:36.

Datfala Kingdom bae replacem olketa gavman blo man.

Bible sei: “Disfala kingdom . . . bae pisisim and finisim evri [human] kingdom hia, and hemseleva nao bae rul for olowe.”—Daniel 2:44.

Datfala Kingdom, wea Jesus Christ nao hem King, bae never distroe.

Bible sei: “Rul blo hem bae stap for olowe and bae hem no savve finis, and kingdom blo hem bae no enitaem distroe.”—Daniel 7:13, 14.

Datfala Kingdom bae mekem peace and security stap lo full earth.

Bible sei: “Evri pipol bae i stap gudfala, an garem piis olowe. Bae olketa save stap gudfala long olketa plantesin blong olketa long grep, an olketa save sidaon andanit long olketa fig tri blong olketa. An bae no eniwan save mekem olketa fo fraet moa.”—Micah 4:4, SIPB.

Lanem moa samting abaotem datfala Kingdom

Taem Jesus stap lo earth, hem spendem staka taem for “preachim datfala gud nius abaotem Kingdom.” (Matthew 9:35) Hem talem tu disfala profesi:

“Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”—Matthew 24:14.

Distaem, pipol blo God gohed preachim gud nius abaotem datfala Kingdom lo winim 240 kantri. Mifala invaetem iu for lanem samfala samting moa abaotem disfala gavman and hao iu savve benefit from rulership blo hem.

Lukim video Wanem Nao Kingdom Bilong God?