Waswe, Olketa Jehovah’s Witness Les lo Eniwan wea Lusim Religion blo Olketa?

Mifala no les lo olketa blo mifala wea stop for duim preaching waka and wea no kam for worship witim mifala. Mifala traem best for helpem olketa interest moa lo spiritual samting.

Mifala no stretawe disfellowshipim from kongregeson man wea duim bigfala sin. Bat sapos wanfala Witness wea baptaes gohed for brekem olketa law insaed Bible and no repent hem bae disfellowship, wea minim mifala bae aotem hem from kongregeson and mifala les for story witim hem. Bible hem sei: “Aotem man wea duim rabis samting from kongregeson.”—1 Corinth 5:13.

Waswe sapos wanfala man disfellowship from kongregeson bat waef and olketa pikinini blo hem still Olketa Jehovah’s Witness yet? Saed lo spiritual samting, datwan minim datfala famili no wan mind nao. Nomata olsem, hem still hasband and dadi blo olketa, datwan no change.

Olketa wea disfellowship from kongregeson savve still kam lo olketa Christian meeting blo mifala. Sapos olketa laekem, olketa savve kasem kaonsel and help from olketa elder. Goal blo diswan hem for helpem olketa kamap Jehovah’s Witness moa. Sapos olketa lusim nogud wei blo olketa and showimaot olketa laek for followim moa samting wea Bible talem, olketa welkam for kamap Jehovah’s Witness moa.