OLKETA KWESTIN WEA YOUNG PIPOL GAREM
Hao if Parents blo Mi Disaed for Divorce?
Wanfala hard situation wea olketa young wan mas deal witim hem taem parents blo olketa divorce. Hao nao iu savve deal witim sorre wea kamaot from datwan?
Lo disfala article
Thri tings wea iu shud no duim
1. No blamem iuseleva
“Wantaem mami blo mi sei evri problem between hem and dadi blo mi hem start taem mi born, so mi tingse mi nao reason why parents blo mi brek ap.”—Diana.
No forgetim diswan: Why tufala divorce hem no bikos lo iu. Hem bikos tufala garem olketa problem between tufala. Hem no iu nao kosim olketa problem blo tufala and hem hard for iu solvem. Tufala seleva nao responsible for stretem olketa problem lo marit blo tufala.
2. No keepim kros
“Mi barava kros lo dadi blo mi bikos hem no faithful lo mami blo mi. Hem bae hard tumas for mi trustim hem moa.”—Rianna.
No forgetim diswan: Iu maet kros fogud and feel nogud bikos lo wat hem gohed happen between parents blo iu, and hem fitim nomoa for iu feel olsem. Bat for gohed keepim kros hem bae spoelem health blo iu. Hem savve mekem iu sik and barava affectim feeling blo iu. Dastawe olketa sei dat for keepim kros hem olsem man drinkim poison and then weit for narawan nao for hem sik.a
3. No daotem dat iu savve garem hapi marit
“Mi fraet tumas nogud mi tu duim wat dadi blo mi duim. Mi fraet if gogo mi marit and garem pikinini, then mi duim sem samting wea parents blo mi duim wea mekem tufala for divorce.”—Jessica.
No forgetim diswan: Just bikos parents blo iu brek ap, datwan no minim marit blo iu bae olsem tu. Really, iu savve lanem olketa important leson from wat parents blo iu go thru lo hem. For example, iu maet lane for luksavve lo olketa quality wea iu laekem lo wanfala marit partner. And tu, wei wea parents blo iu brek ap savve motivatim iu for trae for garem olketa quality wea savve helpem iu for kamap wanfala beta hasband or waef.
For recover from divorce blo parents hem olsem wei for recover bihaen bone hem brek. Firstaem hem bae barava pain then bihaen samfala taem datfala pain bae katdaon
Thri tings wea iu savve duim
1. Communicate. Pipol wea no savve storyim olketa negative feeling wea olketa garem savve isisi duim samting wea savve spoelem olketa seleva, olsem wei for ova tumas lo alcohol or iusim drug. Instead for duim datwan, trae followim olketa idea hia:
Story lo parents blo iu. If wanfala lo parents blo iu or tufala evriwan trae for mekem iu involve insaed problem blo tufala, explainim klia hao datwan affectim iu. If iu faendem hard for story direct lo tufala, raetem olketa feeling blo iu lo wanfala leta and givim lo tufala or wanfala lo tufala.
Story lo wanfala fren wea iu trustim. Taem iu garem samwan for lisin lo iu datwan savve barava helpem iu. Bible sei dat “wanfala tru fren hem showim love evritaem. And hem kamap wanfala brata blo iu lo taem blo trabol.”—Proverbs 17:17.
Story lo Creator blo iu. Jehovah God hem “Man wea herem olketa prea,” and hem bae evritaem lisin lo iu. (Psalm 65:2) Bible sei iu savve ‘torowem evri wari blo iu go lo hem bikos hem kea for iu.’—1 Peter 5:7.
Lo parents blo iu, which wan nao iu savve story gud witim hem?
Hu nao wanfala fren wea iu trustim (sem age or adult) wea savve helpem iu?
Wat nao olketa specific samting wea iu savve prea abaotem?
2. Change fitim olketa niu situation
From parents blo iu divorce iu maet need for adjust fitim olketa niu situation, olsem niu haos, niu skul, niu frens or niu income lo selen. For sure, diswan savve mekem iu feel nogud tumas and feel olsem laef blo iu hem ap-saed-daon. Wat nao savve helpem iu for change fitim olketa situation olsem? Trae for focus lo hao iu savve adjust fitim olketa niu situation wea kamap.
Wat nao wanfala barava big change wea kamap bikos parents blo iu divorce?
Wat nao iu savve duim for adjust fitim datfala change?
3. Luksavve lo olketa gud quality blo iu
Divorce blo parents blo iu savve mekem iu for barava wari, bat hem savve teachim iu tu for luksavve lo olketa gud quality wea iu garem. And hem even helpem iu for garem olketa niu quality. Jeremy, wea parents blo hem divorce taem hem 13, hem sei: “Divorce blo parents blo mi hem mekem mi kwiktaem for kamap moa responsible. Mi nao older than olketa narawan, so mi mas duim moa samting for helpem mami blo mi and for sapotim smol brata blo mi.”
Divorce blo parents blo iu savve motivatim iu for kamap moa responsible insaed famili
Bikos lo situation blo parents blo iu, wat nao olketa gud quality wea iu lukim iu garem?
Wat nao samfala quality wea iu laek for impruv lo hem?
a For lanem moa samting, lukim article “How Can I Control My Anger?”