Why Nao Olketa Jehovah’s Witness No Faet lo War?
Olketa Jehovah’s Witness no faet lo war bikos lo olketa reason hia:
Obeyim God. Bible hem sei olketa wea worshipim God bae “hammerim naef for faet for kamap hou” and no “lanem moa hao for faet.”—Isaiah 2:4.
Obeyim Jesus. Jesus sei olsem lo aposol Peter: “Iu no duim olsem. Leavim sword ia. Eniwan wea iusim sword for killim dae narawan, bae olketa iusim sword for killim hem dae tu.” (Matthew 26:52) Disfala toktok blo Jesus showimaot olketa wea followim hem bae no faet lo war.
Olketa disaepol blo Jesus no teksaed lo politik from olketa obeyim komand blo hem for “no olsem pipol long world.” (John 17:16) Olketa no tok againstim disison blo gavman for faet lo war, and olketa no trae for stopem olketa narawan wea chus for joinim army.
Love for olketa narawan. Jesus talem disfala komand lo olketa disaepol blo hem: “Iufala mas lovem iufala evriwan.” (John 13:34, 35) From olketa disaepol blo Jesus obeyim datfala komand, evriwan lo olketa wan mind nomata lo wanem kantri olketa stap lo hem, and no eniwan lo olketa bae faet againstim spiritual brata or sista blo olketa lo war.—1 John 3:10-12.
Example blo olketa firstfala Christian. Encyclopedia of Religion and War hem sei: “Olketa firstfala follower blo Jesus no agree lo war and no savve faet lo war,” bikos lo tingting blo olketa wei for faet lo war “no followim olketa teaching blo Jesus abaotem love and komand for man lovem olketa enemy blo hem.” Wanfala savveman from Germany wea nem blo hem Peter Meinhold storyim olketa firstfala follower blo Jesus and sei: “Hard for eni Christian kamap soldia.”
Gudfala samting mifala duim lo community
Olketa Jehovah’s Witness trae for duim gud samting lo narawan and no duim eni samting for spoelem peace blo kantri wea olketa stap. Mifala respectim paoa blo gavman, followim tufala komand hia lo Bible:
“Stap anda long olketa wea rul.”—Rome 13:1.
“Givim go bak long King samting wea hem bilong King, and givim go bak long God samting wea hem bilong God.”—Matthew 22:21.
Dastawe mifala obeyim olketa law blo kantri, peim olketa tax, and followim olketa samting wea gavman talem for helpem pipol lo kantri for stap gud.