Wat Nao Man Savve Duim for Hapi and Satisfae?

Ansa from Bible

Plande pipol askem kwestin abaotem laef, olsem Why nao iumi laef? or Mi stap laef for wanem? Bible showimaot reason why iumi laef hem for fren gud witim God. Ting raonem samfala tru samting hia wea Bible storyim.

• God nao wakem iumi. Bible sei: “Yumi i blong [God] ya bikos hem nao hemi mekem yumi.”​—Sams 100:3; Revelation 4:11.

• God garem plan for evri samting wea hem creatim, and for iumi tu.​—Aesaea 45:18.

• God wakem iumi for luksavve iumi ‘needim Hem,’ and for laek savve wat nao mekem iumi hapi and satisfae lo laef. (Matthew 5:3) Hem laek givim iumi wanem iumi laekem.​—Psalm 145:16, New World Translation.

• Iumi showimaot iumi luksavve iumi needim God taem iumi fren gud witim hem. Nomata maet samfala pipol sei hem hard tumas for fren gud witim God, Bible sei: “Fren gud witim God and bae hem fren gud witim iufala.”​—James 4:8; 2:23.

• For kamap fren blo God, iumi mas followim plan blo hem for iumi. Bible storyim diswan lo Ecclesiastes 12:13. Hem sei: “Iumi mas tinghae lo God, and obeyim olketa komand blo hem, bikos hem nao samting wea God wakem olketa man for duim.”​—Good News Translation.

• Lo future, plan blo God for iumi bae kamap tru taem hem finisim wei for safa and mekem olketa fren blo hem, wea hem nao olketa wea worshipim hem, for kasem laef olowe.​—Sams 37:10, 11.