Wat Nao Bible Talem Abaotem Homosexuality?
Ansa from Bible
Taem God creatim olketa human, hem wakem man and woman, and hem allowim man and woman wea marit nomoa for duim sex. (Genesis 1:27, 28; Leviticus 18:22; Proverbs 5:18, 19) Bible stopem tufala wea no marit for duim sex, whether tufala homosexual or heterosexual. (1 Corinth 6:18) Diswan includim intercourse, plei witim genital blo narawan, and oral or anal sex.
Nomata Bible no acceptim homosexual acts, hem no sei hem olraet nomoa for heitim pipol wea homosexual or wea homophobic. Bat, Bible talem dat olketa Christian mas “respectim evriwan.”—1 Peter 2:17, Good News Translation.
Hao, samwan savve born witim wei for homosexual?
Bible no talem dat samwan hem born witim feeling for homosexual, bat Bible sei iumi evriwan born witim feeling for laek againstim wat God laekem. (Rome 7:21-25) Bible no storyim wat nao kosim man for garem feeling for laek homosexual, bat Bible sei homosexual acts hem rong.
Hao, hem possible for God hapi lo samwan wea garem homosexual feeling?
Bible sei: “No letem body blo iu kontrolem iu. Killim dae evri feeling for laekem sex wea no stret.” (Colossians 3:5, Contemporary English Version) For killim dae olketa feeling for laekem samting wea no stret, wea savve leadim iu for duim rong samting, iu mas kontrolem tingting blo iu. If iu evritaem fulimap mind blo iu witim olketa tingting wea klin, hem bae isi for iu aotem olketa feeling for laekem samting wea no stret. (Philippi 4:8; James 1:14, 15) Maet firstaem iu barava stragol witim diswan, bat gogo bae hem isi for iu duim datwan. God promis for helpem iu for ‘gohed for mekem paoa wea kontrolem tingting blo iu for kamap niu.’—Ephesus 4:22-24.
Staka million heterosexual wea laek for followim olketa Bible standard olketa stragol tu witim datwan. For example, olketa wea singol wea maet no garem chance for marit, or olketa wea marit bat marit partner blo olketa no satisfaem olketa saed lo sex, olketa chus for kontrolem feeling blo olketa nomata maet olketa feisim eni temptation. Taem olketa duim datwan, olketa garem gud laef and hapi. And olketa wea garem homosexual feeling savve garem gud laef olsem tu if olketa really traem best for mekem God hapi.—Deuteronomy 30:19.