Why Nao Iufala No Kolem Ples Wea Iufala Worship Insaed Wanfala Church?

Long Bible, Greek toktok wea samfala transleitim olsem “church” hem minim wanfala grup pipol wea worshipim God. Hem no minim wanfala building.

Tingim disfala example: Taem aposol Paul raet long olketa Christian wea stap long Rome, hem talem hello long datfala Christian man Aquila and waef bilong hem Priscilla, and hem sei tu: “Talem hello long church wea hipap long haos bilong tufala.” (Romans 16:5, Contemporary English Version) Paul no minim olketa shud talem hello long wanfala building. Hem laek talem hello long pipol, wea olketa nao kongregeson wea hipap long datfala haos.a

So mifala no kolem ples wea mifala hipap for worship wanfala church. Mifala kolem datwan “Kingdom Hall.”

Why Mifala Kolem Ples wea Mifala Worship Insaed “Kingdom Hall Bilong Olketa Jehovah’s Witness”

Disfala toktok hem fitim bikos long olketa reason hia:

• Building wea mifala iusim for garem meeting hem wanfala hall. Hall hem wanfala building for pipol hipap insaed.

• Mifala hipap for worshipim Jehovah and for givim witness abaotem hem, wea minim for story abaotem hem.​—Psalm 83:18; Isaiah 43:12.

• Mifala hipap tu for story abaotem Kingdom bilong God, wea hem nao samting Jesus story abaotem staka taem.​—Matthew 6:9, 10; 24:14; Luke 4:43.

Iu welkam for kam visitim Kingdom Hall klosap long ples wea iu stap for lukim wei wea Olketa Jehovah’s Witness duim worship bilong olketa