Wat Nao Baptism?
Ansa from Bible
Baptism hem minim for full body blo wanfala person go andanit lo wata.a Bible story abaotem staka baptism. (Acts 2:41) Wanfala baptism hia hem blo Jesus. Taem hem baptaes lo Jordan River, full body blo hem go andanit lo wata. (Matthew 3:13, 16) Afta staka years, Ethiopian man hem baptaes lo “pool wata” wea klos lo road wea hem travel.—Acts 8:36-40.
Jesus teachim dat for pipol kamap follower blo hem, olketa mas baptaes. (Matthew 28:19, 20) Aposol Peter tu story abaotem datfala teaching.—1 Peter 3:21.
Lo disfala article
Wat nao baptism minim?
Baptism showimaot lo pipol lo pablik hao wanfala person wea baptaes repent from olketa sin blo hem, and hem mekem promis lo God dat hem bae duim will blo God. Datwan includim tu for evritaem obeyim God and Jesus lo evriting wea hem duim lo laef blo hem. Pipol wea baptaes showim dat olketa start wakabaot lo road wea lead go for kasem laef olowe.
Wata baptism showim dat wanfala person mekem changes lo laef blo hem. Why nao iumi sei olsem? Bible comparem baptism witim burial. (Rome 6:4; Colossae 2:12) Taem wanfala person go daon andanit lo wata, hem showim dat hem dae from olketa nogud wei blo hem bifor. Taem hem kamaot from wata, hem showim dat hem startim niu laef from hem wanfala Christian wea dedicate lo God.
Wat nao Bible talem abaotem baby baptism or christening?
Bible no mentionim word “christen” or “christening.”b Hem no teachim tu olketa baby shud baptaes.
Baby baptism no followim wat Scriptures talem. Bible teachim dat wanfala person wea laek baptaes mas duim samfala samting. For example, hem shud understandim olketa basic teaching lo Word blo God, and applyim olketa teaching hia. Hem repent from olketa sin blo hem. And lo wanfala prea, hem dedicatem laef blo hem lo God. (Acts 2:38, 41; 8:12) Olketa baby no able for duim olketa samting hia.
Wat nao hem minim for baptaes lo nem blo Dadi, Son, and holy spirit?
Jesus givim instruction lo olketa follower blo hem for “teachim pipol . . . for kamap disaepol bilong [hem]. Baptaesim olketa hia long nem bilong Dadi and bilong Son and bilong holy spirit. Teachim olketa for followim evri samting wea mi laekem iufala for duim.” (Matthew 28:19, 20) “Long nem bilong” hem minim wanfala person wea baptaes luksavve lo paoa and position blo Dadi, Son, and tu waka blo holy spirit blo God. Tingim disfala example: Aposol Peter sei lo man wea kripol from taem hem born: “Long nem bilong Jesus Christ bilong Nazareth, iu standap and wakabaot!” (Acts 3:6) Hem klia tumas, Peter luksavve lo paoa blo Christ and hem talem dat mirakol hia happen bikos lo Christ.
“Dadi” hem minim Jehovahc God. Hem nao Creator, hem nao givim laef, and hem nao Olmaeti God. Jehovah nomoa garem bigfala paoa.—Genesis 17:1; Revelation 4:11.
“Son” hem Jesus Christ, wea givim laef blo hem for iumi. (Rome 6:23) Iumi no savve kasem salvation, unless iumi luksavve and appreciatim important waka wea Jesus duim lo purpose blo God for evri pipol.—John 14:6; 20:31; Acts 4:8-12.
“Holy spirit” hem paoa blo God, wea minim hem paoa blo hem for duim samting.d God iusim holy spirit blo hem for creatim samting, givim laef lo samting, for talemaot olketa message blo hem lo olketa profet and olketa narawan, and for givim paoa wea olketa needim for duim will blo God. (Genesis 1:2; Job 33:4; Rome 15:18, 19) God iusim tu holy spirit for olketa Bible raeta raetem tingting blo hem lo Bible.—2 Peter 1:21.
Hao, hem wanfala sin for baptaes again?
Hem normal nomoa for pipol changem religion blo olketa. Bat hao if olketa baptaes taem olketa lo church blo olketa bifor? Hao, olketa duim sin if olketa baptaes again? Samfala sei hem wanfala sin bikos lo hao olketa understandim Ephesus 4:5, wea sei: “Wanfala Lord hem stap, wanfala faith, and wanfala baptism.” Nomata olsem, verse hia no minim wanfala person no savve baptaes again. Why?
Context. Context blo Ephesus 4:5 showim dat aposol Paul strongim point abaotem wei for olketa tru Christian wan mind lo wat olketa bilivim. (Ephesus 4:1-3, 16) Datkaen wei for wan mind happen nomoa, only if olketa followim sem Lord, wea hem nao Jesus Christ, garem sem faith, understandim wat Bible teachim, and followim wat Scriptures talem abaotem baptism.
Aposol Paul encouragem samfala wea baptaes finis for baptaes again. Hem bikos lo firstaem wea olketa baptaes, olketa no understandim gud evri Christian teaching.—Acts 19:1-5.
Baptism wea stret. God acceptim baptism blo wanfala person if hem garem stretfala savve abaotem truth lo Bible. (1 Timothy 2:3, 4) If wanfala person baptaes bikos hem lanem olketa religious teaching wea no followim wat Bible talem, God bae no acceptim baptism blo hem. (John 4:23, 24) Maet hem tingse hem duim stret samting, bat hem no “savve lo tru samting.” (Rome 10:2) God bae acceptim nomoa if hem lanem truth lo Bible, applyim wat hem lanem, dedicatem laef blo hem lo God, and baptaes again. From hem duim evriting hia, taem hem baptaes again, datwan hem no wanfala sin. Really, hem nao stret samting for duim.
Bible story abaotem olketa nara baptism
Bible storyim olketa nara baptism wea difren from wata baptism blo olketa follower blo Christ. Tingim samfala example.
Baptism wea John Baptaesa duim.e John baptaesim olketa Jew and Jewish proselyte for showim dat olketa repent from olketa sin wea olketa duim againstim Law blo Moses. God givim datfala Law lo Moses for olketa Israelite. Baptism wea John duim redyim pipol mekem olketa luksavve and acceptim Messiah, wea hem nao Jesus from Nazareth.—Luke 1:13-17; 3:2, 3; Acts 19:4.
Baptism blo Jesus. Taem John Baptaesa baptaesim Jesus, datwan difren from eni nara baptism. Jesus hem man wea perfect and no duim eni sin. (1 Peter 2:21, 22) So baptism blo hem no for hem repent, or “askem God for givim hem gudfala konsens.” (1 Peter 3:21) Bat for showim dat hem givim hemseleva lo God for duim will blo God wea Bible profesi abaotem hao hem nao Messiah, or Christ. Hem includim tu for hem givim laef blo hem for iumi.—Hebrew 10:7-10.
Baptaes lo holy spirit. John Baptaesa and Jesus Christ story abaotem baptaes lo holy spirit. (Matthew 3:11; Luke 3:16; Acts 1:1-5) Datfala baptism hem difren from baptaes lo nem blo holy spirit. (Matthew 28:19) Why?
Only smol namba lo olketa follower blo Jesus nomoa baptaes lo holy spirit. Olketa hia kasem anointing from holy spirit bikos olketa bae waka witim Christ for king and priest lo heven ovarem disfala earth.f (1 Peter 1:3, 4; Revelation 5:9, 10) Olketa bae rulim staka million follower blo Jesus wea garem hope for laef olowe lo Paradaes lo earth.—Matthew 5:5; Luke 23:43.
Baptaes lo Christ Jesus and lo dae blo hem. Olketa wea baptaes lo holy spirit, olketa baptaes tu lo Christ Jesus. (Rome 6:3) So datfala baptism hem for olketa anointed follower blo Jesus wea bae rul witim hem lo heven. From olketa baptaes lo Jesus, olketa nao member lo anointed kongregeson blo hem. Hem nao Hed, and olketa nao body.—1 Corinth 12:12, 13, 27; Colossae 1:18.
And tu, olketa anointed Christian “baptaes long dae bilong [Jesus].” (Rome 6:3, 4) Olketa followim example blo Jesus for evritaem focus for obeyim God and no duim nomoa wat olketa seleva laekem, and no tingim hao olketa bae laef olowe lo earth. Datfala baptism finis taem olketa dae and laef bak for go lo heven for kamap olketa spirit.—Rome 6:5; 1 Corinth 15:42-44.
Baptaes lo fire. John Baptaesa sei lo pipol wea lisin lo hem: “Man hia [Jesus] bae baptaesim iufala long holy spirit and long fire. Hem holem nao savol bilong hem for torowem wheat long air, and hem bae barava klinim floor for separatem wheat from skin bilong hem. Hem bae putim evri wheat bilong hem long haos for keepim datwan, bat hem bae bonem evri skin bilong wheat long fire wea no eniwan savve killim dae.” (Matthew 3:11, 12) Tingim hao samfala samting difren lo baptaes lo fire and baptaes lo holy spirit. Wat nao John minim lo datfala illustration blo hem?
Wheat representim pipol wea lisin lo Jesus and obeyim hem. Olketa garem chance for baptaes lo holy spirit. Skin blo wheat representim pipol wea no lisin lo Jesus. Olketa hia bae baptaes lo fire, wea minim olketa bae finis for olowe.—Matthew 3:7-12; Luke 3:16, 17.
a Vine’s Complete Expository Dictionary of Old and New Testament Words sei Greek word iumi transleitim “baptaes” hem minim for “wanfala person go insaed lo wata, full body blo hem go andanit lo wata, and then hem kamaot from wata.”
b “Christening” minim ceremony wea samfala church duim for nemim olketa baby, and then “baptaesim” olketa lo wei for sprinkolem wata or pourim wata lo hed blo olketa.
c Jehovah hem nem blo God. (Psalm 83:18) Lukim article “Hu Nao Jehovah?”
d Lukim article “Wanem Nao Holy Spirit?”
e Lukim article “Who Was John the Baptist?”
f Lukim article “Hu Nao Bae Go lo Heven?”
g Bible iusim tu word “baptaes” for describem wei for iusim wata for klinim samfala samting olsem for putim olketa utensil go andanit lo wata. (Mark 7:4; Hebrew 9:10) Bat datwan difren tumas from Jesus and olketa follower blo hem wea full body blo olketa nao go andanit lo wata taem olketa baptaes.