Wat Nao Bible Talem Abaotem Marit?

Ansa from Bible

Afta God creatim first man and woman, hem mekem tufala for marit. Hem startim marit olsem wanfala spesol bond between man and woman, mekem datwan hem faondeson for famili laef.—Genesis 1:27, 28; 2:18.

God laekem olketa marit couple for hapi. (Proverbs 5:18) Hem provaedem olketa standard and olketa principle lo Bible wea savve helpem olketa wea marit for succeed.

Lo disfala article

Wat nao olketa standard blo God for olketa wea marit?

From start, purpose blo God saed lo marit hem for wanfala man and wanfala woman nao for marit. (Genesis 2:24) God no appruvim polygamy, homosexual acts, or couple wea stap tugeta bat no marit. (1 Corinth 6:9; 1 Thessalonica 4:3) Jesus teachim olketa follower blo hem for obeyim original standard blo God saed lo marit.—Mark 10:6-8.

Lo eye blo God, marit hem wanfala permanent bond. Taem wanfala man and woman marit, tufala promis for loyal lo each other and stap tugeta for full laef blo tufala. God expectim tufala for keepim marit promis blo tufala.—Mark 10:9.

Wat nao Bible talem abaotem wei for separate and divorce?

Maet samfala taem, hasband or waef need for lusim partner blo hem for go tek kea lo wanfala famili emergency. Bat Bible discouragem wei for hasband and waef for separate bikos lo marit problem. Instead, hem encouragem olketa couple wea insaed kaen situation olsem for waka hard for reconcile.—1 Corinth 7:10.

Adultery hem only reason wea Bible sei hasband and waef savve divorce. (Matthew 19:9) Dastawe, if wanfala hasband and waef disaed for separate or divorce for eni reason nomoa bat no bikos lo adultery, Bible sei hem no stret for eniwan lo tufala for datem samwan else or for marit moa.—Matthew 5:32; 1 Corinth 7:11.

For marit hem stret lo eye blo God, hao, tufala wea laek for marit mas registerim marit blo tufala?

God expectim olketa Christian for obeyim olketa law blo gavman saed lo marit. (Titus 3:1) Taem tufala wea laek for marit registerim marit blo tufala, tufala showim tufala respectim law blo gavman and standard blo God wea sei marit hem for olowe.a

Wat nao role and olketa responsibility blo hasband and waef wea Bible storyim?

Responsibility blo tufala evriwan. Olketa hasband and waef shud treatim each other witim love and respect. (Ephesus 5:33) Tufala shud givim lo each other wat narawan needim saed lo sex lo loving wei, and avoidim eniting wea bae mekem tufala no faithful lo each other. (1 Corinth 7:3; Hebrews 13:4) If tufala garem olketa pikinini, hem responsibility blo tufala evriwan for lukaftarem olketa pikinini.—Proverbs 6:20.

Bible no storyim hu lo tufala nao shud waka for selen and hu nao shud duim olketa waka lo haos. Tufala savve mekem disison hia tugeta, followim wat hem best for famili blo tufala.
Role blo hasband. Bible sei “hasband hem hed blo waef” blo hem. (Ephesus 5:23) Diswan minim hasband leadim famili blo hem, and mekem olketa disison wea bae benefitim waef and olketa pikinini blo hem.

Hem shud traem best for lukaftarem gud physical, emotional, and spiritual need blo famili. (1 Timothy 5:8) Taem hasband mekem olketa disison, hem showim dat hem tinghae lo olketa quality and capability blo waef blo hem lo wei for lisin lo tingting and tingim feeling blo waef blo hem. (Proverbs 31:11, 28) Bible sei hasband shud lukaftarem olketa responsibility blo hem lo loving wei.—Colossae 3:19.
Role blo waef. Bible sei “waef mas barava respectim hasband bilong hem.” (Ephesus 5:33) Taem waef respectim role wea God givim lo hasband blo hem, datwan mekem God hapi.

Role blo waef hem for helpem hasband blo hem for mekem olketa gud disison and for sapotim hem olsem hed lo famili. (Genesis 2:18) Bible praisem waef wea duim gud important role blo hem insaed lo marit.—Proverbs 31:10.

Hao, God sei olketa marit couple distaem mas garem pikinini?

Nomoa. Lo past, God givim komand lo samfala worshiper blo hem for mas garem olketa pikinini. (Genesis 1:28; 9:1) Bat instruction hia hem no apply for olketa Christian distaem. Jesus never talem olketa follower blo hem for mas garem pikinini. And no eni first disaepol blo Jesus tu talem for olketa marit couple mas garem pikinini. So olketa couple savve disaed seleva if olketa bae garem pikinini or nomoa.

Hao nao Bible savve helpem marit blo mi?

Bible garem olketa principle wea savve helpem wanfala couple for startim gud marit blo tufala. Olketa Bible principle savve helpem tu olketa couple for avoidim and ovakamim olketa challenge wea olketa kasem.

Olketa Bible principle savve helpem wanfala marit couple for . . .

showim tru love.—1 Corinth 13:4-7; Colossae 3:14.
stretem eni disagreement.—1 Corinth 10:24.
lisin gud.—James 1:19.
showim respect.—Rome 12:10.
forgive.—1 Peter 4:8.
loyal.—Mark 10:9.
patient.—Ephesus 4:2, 3.
waka tugeta olsem wanfala team.—Ecclesiastes 4:9.
strongim love blo tufala for each other.—Song of Solomon 8:7.

a If iu laek for savve lo wat Bible talem abaotem customary marriage, lukim Wastaoa blo November 1, 2006, page 10, paragraf 12.

Olketa Bible verse wea story abaotem marit

Proverbs 18:22: “Man wea faendem gud waef hem faendem gud samting.”

Mining: Bible hem sei marit hem wanfala gud samting.

Malachi 2:15: “Mas faithful lo waef wea iufala tekem taem iufala young.”

Mining: God laekem hasband and waef for faithful lo each other and for treatim each other witim respect, nomata tufala marit for staka years finis.

Mark 10:9: “No eni man mas aotem samting wea God joinim finis.”

Mining: Purpose blo God for tufala wea marit hem for tufala stap tugeta for olowe.

Hebrews 13:4: “Evriwan mas respectim marit.”

Mining: Hasband and waef shud prioritizim marit blo tufala and waka hard for protectim.

1 Corinth 7:28: “Olketa wea marit bae kasem hard taem long laef bilong olketa.”

Mining: No eni marit hem perfect, so hasband and waef mas waka tugeta for ovakamim olketa challenge.