2 Waka Tugeta

WANEM HEM MINIM

Hasband and waef wea waka tugeta olsem pilot and assistant pilot insaed plane wea go long sem ples. Nomata taem olketa feisim eni problem, tufala waka tugeta for stretem datfala problem.

BIBLE PRINCIPLE: “Tufala hia no tufala body, bat wanfala nomoa.”—Matthew 19:6.

“Hasband and waef mas waka gud tugeta for garem gudfala marit.”—Christopher.

WHY HEM IMPORTANT

Sapos hasband and waef no waka gud tugeta, taem eni problem kamap, tufala bae blamem each other winim wei for stretem datfala problem. Smol problem savve kamap big problem.

“Hem important for hasband and waef waka tugeta. Sapos tufala no waka tugeta hem olsem tufala stap long sem haos, bat no wan mind taem tufala mas disaedem olketa important samting.”—Alexandra.

WANEM IU SAVVE DUIM

TING RAONEM DISWAN

• Waswe, mi ting long selen wea mi kasem from waka hem bilong miseleva nomoa?

• Waswe, mi hapi taem mi stap witim olketa narawan winim taem mi stap witim marit partner bilong mi?

• Waswe, marit partner bilong mi laek spendem taem witim famili bilong hem bat mi no laekem?

STORY WITIM MARIT PARTNER

• Olketa wanem samting nao mitufala waka gud tugeta long hem?

• Olketa wanem samting nao mitufala need for kamap gud long hem?

• Wanem nao mitufala savve duim mekem mitufala gohed waka gud tugeta?

GUD SAMTING FOR DUIM

• Tingim sapos hasband and waef insaed long wanfala kanu, and tufala feis difren for padol. Wanem nao tufala savve duim for waka gud tugeta mekem tufala go long sem direction?

• No ting olsem, ‘Hao nao mi savve win?’ Bat ting olsem, ‘Hao nao mitufala savve win?’

“No trae for tingim hu nao hem stret and hu nao hem rong. Hem important for iutufala stap gud tugeta and garem wan mind.”—Ethan.

BIBLE PRINCIPLE: “Evritaem tingim olketa narawan and no tingim iufala seleva nomoa.” —Philippi 2:3, 4.