Toktok wea showimaot respect hem olsem cement wea strongim marit
HASBAND AND WAEF
3 Respect
WANEM HEM MINIM
Hasband and waef wea respectim each other bae showimaot love nomata tufala no agree long wanfala samting. Disfala buk Ten Lessons to Transform Your Marriage sei: “Hasband and waef olsem bae evritaem willing for story for trae faendem wei for stretem problem. Tufala lisin long wei wea showimaot respect long each other and trae for faendem wanem tufala savve agree long hem.”
BIBLE PRINCIPLE: “Man wea garem love . . . no tingim hemseleva nomoa.”—1 Corinth 13:4, 5.
“Mi respectim waef bilong mi taem mi tinghae long hem and no duim eni samting wea bae mekem hem feel nogud or spoelem marit bilong mitufala.”—Micah.
WHY HEM IMPORTANT
Sapos hasband and waef no respectim each other, tufala bae start for tok daonem, and tok spoelem each other. Olketa savveman sei datkaen wei for toktok savve lead go long divorce.
“Hasband wea tok daonem or mekfani abaotem waef bilong hem savve mekem waef ting daonem hemseleva, no trustim hasband, and diswan savve spoelem marit.”—Brian.
WANEM IU SAVVE DUIM
TING RAONEM DISWAN
Long week wea go pas, ting raonem olketa kwestin hia:
‘Haomas taem nao mi tok daonem marit partner bilong mi? Haomas taem nao mi praisem hem?’
‘Wanem nao mi duim wea showimaot mi respectim marit partner bilong mi?’
STORY WITIM MARIT PARTNER
Wanem nao iutufala savve duim and talem for showimaot respect long each other?
Wanem nao samfala samting wea iutufala duim and talem wea no showimaot respect?
GUD SAMTING FOR DUIM
Raetem thrifala samting wea iu laekem marit partner bilong iu for duim wea showimaot hem respectim iu. Askem marit partner for duim sem samting. Then lukim list bilong narawan, and waka hard for showimaot respect long thrifala wei hia.
Listim olketa wei bilong marit partner wea iu barava laekem. Then storyim long hem, iu tinghae long olketa wei hia.
“Mi respectim hasband bilong mi taem mi duim samting wea showimaot mi tinghae long hem and laek for mekem hem hapi. Staka taem hem olketa smol samting wea mi duim or talem wea showimaot mi respectim hem.”—Megan.
Important samting hem no sapos iu tingse iu showimaot respect, bat hem sapos marit partner feel olsem iu respectim hem.
BIBLE PRINCIPLE: “Showimaot love, sorre long pipol, kaen long olketa, hambol, no raf, and patient.”—Colossae 3:12.