OLKETA KWESTIN WEA YOUNG PIPOL GAREM
Hao Sapos Fren blo Mi Mekem Mi Feel Nogud?
Wat iu shud savve lo hem
No eni frenship between olketa man hem free from problem. From iumi no perfect, gud fren or even samwan wea iumi ting lo hem olsem best fren blo iumi maet duim or talem samting wea mekem iumi feel nogud. Tru samting nao, iumi tu no perfect. So trae for tingim, hao, enitaem iu mekem samwan feel nogud?—James 3:2.
Internet hem isi for mekem samwan feel nogud. For example, wanfala teenager wea nem blo hem David sei: “Taem iu online and iu lukim piksa blo olketa fren blo iu lo wanfala gathering, maet iu start for tingim why nao olketa no invaetem iu. And then iu start for feel olsem olketa no interest lo iu and datwan mekem iu sorre.”
Iu savve lane for deal witim datfala problem.
Wat iu savve duim
Lukluk gud lo iuseleva. Bible sei: “No kwiktaem for feel nogud lo narawan bikos wei for feel nogud hem mark blo karangge man.”—Ecclesiastes 7:9, footnote.
“Samtaems bihaen nao iu just realizim dat wat iu feel nogud abaotem hem no wanfala big samting nomoa.”—Alyssa.
Samting for tingim: Hao, iu savve kwiktaem for feel nogud? Hao, iu savve lane for luksavve lo wik point blo narawan?—Ecclesiastes 7:21, 22.
Tingim gud samting wea kamaot from wei for forgive. Bible sei: “Pipol bae tinghae lo [man] sapos hem no tingim rong samting wea samwan duim lo hem.”—Proverbs 19:11.
“Nomata sapos iu garem eni reason for feel nogud, hem gud for willing for forgive, and datwan minim iu bae no gohed for remindim hem abaotem wat hem duim and mekem hem for sei sorre evritaem iu tok abaotem datwan. Taem iu forgive, no storyim datwan moa enitaem.”—Mallory.
Samting for tingim: Hao, datfala situation hem big tumas? Hao, iu savve forgive for keepim peace witim narawan?—Colossae 3:13.
Wei for evritaem storyim evri smol problem insaed wanfala frenship, hem olsem wei for evritaem openem door and letem cold air kam insaed wanfala rum wea warm
Tingim datfala person. Bible sei: “Evritaem tingim olketa narawan and no tingim iufala seleva nomoa.”—Philippi 2:4.
“Taem iu garem love and respect insaed lo frenship, datwan bae barava helpem iu for kwiktaem stretem problem bikos iu invest finis insaed datfala frenship. Iu duim staka samting finis for strongim datfala frenship, and iu no laek for lusim datwan.”—Nicole.
Samting for tingim: Hao, iu savve tingim eni gud saed blo hao datfala person ting lo samting?—Philippi 2:3.
Important samting for tingim: Wei for savve hao for deal witim wei for feel nogud hem wanfala skill wea bae helpem iu taem iu adult. Why nao iu no lanem datfala skill distaem?