Jesus raedem donkey go insaed lo Jerusalem

Hao, Olketa Profesi Abaotem Messiah Pruvim Jesus Nao Datfala Messiah?

Ansa from Bible

Yes. Taem Jesus stap lo earth, staka profesi abaotem “Messiah wea hem Leader,” and man wea bae “sevem pipol long world,” hem kamap tru lo hem. (Daniel 9:25, NW; 1 John 4:14) And nomata bihaen hem laef bak, olketa profesi abaotem Messiah hem kamap tru lo hem.—Sams 110:1; Acts 2:34-36.

Wat nao disfala word “Messiah” hem minim?

Datfala Hebrew word Ma·shiʹach (Messiah) and Greek word Khri·stos (Christ) hem minim “Anointed Wan.” So “Jesus Christ” hem minim “Jesus datfala Anointed Wan,” or “Jesus datfala Messiah.”

Lo Israel bifor, taem samwan anointim wanfala man for duim important waka, hem savve kapsaetem oil lo hed blo hem. (Levitikas 8:12; Fas Samuel 16:13) God nao appointim Jesus for hem Messiah for duim wanfala important waka. (Acts 2:36) Bat God anointim Jesus lo holy spirit and no lo oil.—Matthew 3:16.

Hao, olketa profesi abaotem Messiah bae kamap tru lo staka pipol?

Nomoa. Fingerprint blo wanfala man hem blo datfala man nomoa, olsem tu olketa profesi lo Bible hem kamap tru lo wanfala Messiah wea hem nao Christ. Bat Bible sei “olketa laea Christ and laea profet bae kam and showim olketa saen and duim olketa samting wea mekem pipol barava sapraes. Olketa duim diswan from olketa laek for trikim olketa wea God chusim.”—Matthew 24:24.

Hao, bae Messiah kam lo future?

Nomoa. Bible talem hao Messiah bae kam from laen blo King David blo Israel bifor. (Sams 89:3, 4) Bat taem olketa lo Rome tekovarem Jerusalem lo 70 C.E., luk olsem record blo famili tree blo olketa Jew start kam from David hem distroe.a So from datwan, no eniwan savve pruvim hem kam from laen blo King David. Taem Jesus stap lo earth, hem talem hao hem kam from laen blo David and datfala record blo famili laen blo olketa Jew hem stap. Nomata olsem, olketa enemy blo Jesus hard for sei hem no kam from laen blo David.—Matthew 22:41-46.

Hao many profesi abaotem Messiah nao stap lo Bible?

Bible no talem hao many profesi abaotem Messiah nao hem stap. For example, hao pipol kaontem olketa profesi from olketa scripture wea storyim Messiah hem no semsem. Lo Aesaea 53:2-7 storyim samfala profesi abaotem Messiah. Samfala maet kaontem wanem olketa verse hia storyim olsem wanfala profesi nomoa, bat olketa narawan sei hem tu-thri profesi.

Samfala profesi abaotem Messiah wea kamap tru lo Jesus

Profesi	Lukim	Kamap tru
Pikinini blo Abraham	Genesis 22:17, 18, NW	Matthew 1:1
Kam from laen blo Isaac, son blo Abraham	Genesis 17:19, NW	Matthew 1:2
Born lo tribe blo Judah	Genesis 49:10, NW	Matthew 1:1, 3
Kam from laen blo King David	Aesaea 9:7	Matthew 1:1
Born lo wanfala virgin	Isaiah 7:14, NW	Matthew 1:18, 22, 23
Born lo Bethlehem	Maeka 5:2	Matthew 2:1, 5, 6
Nemim hem lo Immanuelb	Aesaea 7:14	Matthew 1:21-23
Kam from simpol famili	Aesaea 53:2	Luke 2:7
Killim dae olketa smol pikinini bihaen hem born	Jeremaea 31:15	Matthew 2:16-18
God kolem bak son blo hem from Egypt	Hosia 11:1	Matthew 2:13-15
Olketa bae kolem hem man blo Nazarethc	Isaiah 11:1, NW	Matthew 2:23
Man for talem message go firstaem lo hem	Malakae 3:1	Matthew 11:7-10
Kasem anointing for Messiah lo 29 C.E.d	Daniel 9:25, NW	Matthew 3:13-17
God talemaot hem Son blo hem	Sams 2:7	Acts 13:33, 34
Laekem tumas haos blo God	Sams 69:9	John 2:13-17
Talemaot gud nius	Aesaea 61:1	Luke 4:16-21
Ministry blo hem lo Galilee mekem pipol lukim laet wea braet tumas	Aesaea 9:1, 2	Matthew 4:13-16
Duim olketa mirakol olsem Moses	Diutronomi 18:15	Acts 2:22
Storyim nomoa wat God talem lo hem olsem Moses	Diutronomi 18:18, 19	John 12:49
Healim staka wea sik	Isaiah 53:4, NW	Matthew 8:16, 17
Hambol	Aesaea 42:2	Matthew 12:17, 19
Kaen lo pipol wea kasem hard taem	Aesaea 42:3	Matthew 12:9-20; Mark 6:34
Showimaot justice blo God	Aesaea 42:1, 4	Matthew 12:17-20
Givim gudfala advaes	Isaiah 9:6, 7, NW	John 6:68
Talemaot nem blo Jehovah	Psalm 22:22, NW	John 17:6
Iusim illustration	Sams 78:2	Matthew 13:34, 35
Wanfala Leader	Daniel 9:25, NW	Matthew 23:10
Staka no bilivim hem	Aesaea 53:1	John 12:37, 38
Ston wea mekem narawan stambol	Aesaea 8:14, 15	Matthew 21:42-44
Pipol les lo hem	Sams 118:22, 23	Acts 4:10, 11
Heitim hem nating nomoa	Sams 69:4	John 15:24, 25
Raedem donkey go insaed lo Jerusalem	Sekaraea 9:9	Matthew 21:4-9
Olketa pikinini praisem hem	Sams 8:2	Matthew 21:15, 16
Kam lo nem blo Jehovah	Sams 118:26	John 12:12, 13
Fren blo hem betrayim hem	Sams 41:9	John 13:18
Salem hem for 30 silver coine	Sekaraea 11:12, 13	Matthew 26:14-16; 27:3-10
Olketa fren blo hem lusim hem	Sekaraea 13:7	Matthew 26:31, 56
Staka talem laea samting abaotem hem	Sams 35:11	Matthew 26:59-61
Stap kwaet nomoa taem olketa accusim hem	Aesaea 53:7	Matthew 27:12-14
Spit lo hem	Aesaea 50:6	Matthew 26:67; 27:27, 30
Hitim hed blo hem	Maeka 5:1	Mark 15:19
Whipim hem	Aesaea 50:6	John 19:1
Letem olketa for hitim hem	Aesaea 50:6	John 18:22, 23
Olketa leader lo gavman story tugeta for againstim hem	Sams 2:2	Luke 23:10-12
Nilam hand and feet lo post	Sams 22:16	Matthew 27:35; John 20:25
Pleim daes for tekem kaleko blo hem	Sams 22:18	John 19:23, 24
Hem tekem ples blo pipol wea sin	Aesaea 53:12	Matthew 27:38
Heitim and tok spoelem hem	Sams 22:7, 8	Matthew 27:39-43
Safa for sin blo pipol	Aesaea 53:5, 6	1 Peter 2:23-25
Luk olsem God lusim hem	Sams 22:1	Mark 15:34
Givim hem wine wea mix witim gall	Sams 69:21	Matthew 27:34
Bifor hem dae hem laek drink	Sams 22:15	John 19:28, 29
Hem putim laef blo hem lo hand blo God	Sams 31:5	Luke 23:46
Hem willing for dae	Aesaea 53:12	Mark 15:37
Ransom sakrifaes blo hem aotem sin	Aesaea 53:12	Matthew 20:28
Bon no brek	Sams 34:20	John 19:31-33, 36
Spiarim hem	Sekaraea 12:10	John 19:33-35, 37
Berem hem witim olketa wea rich	Aesaea 53:9	Matthew 27:57-60
Resurrect	Sams 16:10	Acts 2:29-31
Narawan changem Judas	Sams 109:8	Acts 1:15-20
Sidaon lo raet saed blo God	Sams 110:1	Acts 2:34-36

a McClintock and Strong’s Cyclopedia sei: “No eni daot hao olketa record lo tribe blo olketa Jew and famili blo olketa hem distroe taem olketa finisim Jerusalem, and no bifor datwan.”

b Datfala Hebrew nem Immanuel, hem minim “God hem stap witim iumi.” Datwan storyim waka wea Jesus duim from hem Messiah. Olketa samting wea Jesus duim taem hem lo earth pruvim God hem stap witim pipol wea worshipim Hem.—Luke 2:27-32; 7:12-16.

c Datfala toktok “man bilong Nazareth” kam from Hebrew word neʹtser, wea minim “niu sut.”

d For savve lo olketa samting wea Bible sei bae happen for showim 29 C.E. nao hem year wea Messiah arrive, lukim article “Wei wea Profesi Bilong Daniel Markem Taem wea Messiah Bae Arrive.”

e Disfala profesi stap lo buk blo Zechariah, bat Matthew wea raetem Bible sei hem “toktok bilong Jeremiah.” (Matthew 27:9) Hem luk olsem samfala taem buk blo Jeremiah nao first wan lo sekson blo Scripture wea olketa kolem lo “raeting blo olketa profet.” (Luke 24:44) So masbi Matthew talem “Jeremiah” for story abaotem evri raeting blo olketa profet, and wanfala nao hem buk blo Zechariah.