Proverbs 16:3—“Depend lo LORD lo Evri Samting Iu Duim”

“Depend lo Jehovah lo evri samting wea iu duim, and olketa plan blo iu bae succeed.”—Proverbs 16:3, Niu World Transleison.

“Depend lo LORD lo evri samting iu duim, and hem bae mekem olketa plan blo iu for kamap.”—Proverbs 16:3, New International Version.

Mining blo Proverbs 16:3

Disfala proverb showim dat olketa plan blo olketa wea worshipim tru God bae succeed if olketa trustim hem lo wei for depend lo hem and followim guidance blo hem.

“Depend lo Jehovah lo evri samting wea iu duim.” Bifor olketa worshiper blo Jehovaha mekem eni disison, olketa hambol for depend lo hem for guidance. (James 1:5) Why? Wanfala reason hem bikos olketa man no fit for kontrolem staka samting wea happen lo laef blo olketa. (Ecclesiastes 9:11; James 4:13-15) And tu, olketa no garem wisdom for followim plan blo olketa. From diswan, staka pipol depend lo God or trustim hem for helpem olketa lo plan wea olketa mekem. Olketa duim datwan lo wei for prea lo hem for guidance and duim samting followim will blo hem wea stap insaed Word blo hem, Bible.—Proverbs 3:5, 6; 2 Timothy 3:16, 17.

Disfala toktok “depend lo LORDb lo evri samting iu duim” hem minim for “rolim olketa samting wea iu duim lo LORD.” Wanfala Bible commentary sei disfala toktok givim piksa blo “samwan [wea] givim go wanfala load wea hem karem for narawan wea strong winim hem and fit for karem datwan.” Olketa wea depend lo God savve sure dat hem bae helpem and kea for olketa.—Psalm 37:5; 55:22.

Disfala toktok “evri samting wea iu duim” hem no minim God bae appruvim or blessim evri plan wea pipol garem. For Jehovah blessim olketa, plan blo olketa mas followim olketa standard and will blo hem. (Psalm 127:1; 1 John 5:14) God no blessim olketa wea disobey. Tru samting nao, “hem spoelem plan blo wicked pipol.” (Psalm 146:9) Bat lo semtaem, hem sapotim olketa wea showim olketa stap anda lo hem lo wei for respectim olketa standard blo hem wea insaed lo Bible.—Psalm 37:23.

“And olketa plan blo iu bae succeed.” Samfala Bible transleison iusim toktok “mekem olketa plan blo iu for kamap.” Lo Hebrew Scripture, or Old Testament olsem hao staka pipol kolem, word wea olketa transleitim “for kamap” hem garem piksa blo wei for leim wanfala faondeson, and staka taem hem savve minim hao God creatim olketa samting hem barava strong. (Proverbs 3:19; Jeremiah 10:12) Lo sem wei, God bae barava mekem olketa plan blo pipol wea duim samting wea stret lo eye blo hem for kamap, helpem olketa for stap sef, stap gud, and garem hapi laef.—Psalm 20:4; Proverbs 12:3.

Context blo Proverbs 16:3

King Solomon nao raetem disfala proverb, wea hem raetem big haf lo buk blo Proverbs. Hem savve talem staka thousand proverb bikos lo wisdom wea God givim lo hem.—1 Kings 4:29, 32; 10:23, 24.

Lo chapter 16, Solomon startim witim wei for mekhae lo wisdom blo God and showim dat Hem barava heitim olketa wea praod. (Proverbs 16:1-5) Datfala chapter helpem reader for minim wanfala truth wea kamap staka taem insaed buk blo Proverbs, wea hem nao, olketa man savve kamap wise and succeed only sapos olketa hambol, lo wei for letem God leadim olketa. (Proverbs 16:3, 6-8, 18-23) Disfala truth hem kamap staka taem insaed Bible.—Psalm 1:1-3; Isaiah 26:3; Jeremiah 17:7, 8; 1 John 3:22.

Watchim disfala short video for lukim olketa main point lo buk blo Proverbs.