MINING BLO OLKETA BIBLE VERSE
Proverbs 17:17—“Wanfala Fren Hem Showim Love Evritaem”
“Wanfala tru fren hem showim love evritaem, and hem kamap wanfala brata blo iu lo taem blo trabol.”—Proverbs 17:17, Niu World Transleison.
“Wanfala fren hem showim love evritaem, and hem wanfala brata wea born for taem blo trabol.”—Proverbs 17:17, New International Version.
Mining blo Proverbs 17:17
Olketa tru fren hem samwan wea iumi savve depend lo hem and trustim. Olsem olketa klos sibling insaed lo famili, olketa loyal and kea for iumi, especially taem iumi feisim hard taem.
“Wanfala tru fren hem showim love evritaem.” Nara wei for talem disfala toktok hem, “olketa fren evritaem showimaot love.” Hebrew word for “love” wea olketa iusim lo disfala phrase hem minim moa samting winim for just showimaot feeling for samwan. Hem love wea no selfish wea hem showaot thru lo olketa samting wea iumi duim. (1 Corinth 13:4-7) Olketa fren wea garem kaen love olsem for each savve continue for loyal lo each other nomata lo taem wea eni problem or misunderstanding hem kamap wea maet testim frenship blo olketa. Olketa willing tu for forgivim each other. (Proverbs 10:12) And tu, wanfala fren bae no jealous taem nara fren blo hem kasem gud samting, bat hem hapi witim fren blo hem.—Rome 12:15.
“Wanfala tru fren . . . hem kamap wanfala brata blo iu lo taem blo trabol.” Datfala proverb showimaot klia hao olketa sibling savve barava klos lo each other. So taem iumi duim best for helpem wanfala fren wea go thru lo hard taem, iumi duim samting wea wanfala really brata or sista nao savve duim. And tu, no eni samting savve spoelem wei wea olketa fren hia klos lo each other. Bat, wei wea olketa klos bae strong go moa bikos lo bigfala love and respect wea olketa garem for each other.
Context blo Proverbs 17:17
Buk blo Proverbs garem olketa wise advaes thru lo olketa saying wea savve mekem man wea readim for ting raonem samting. King Solomon nao raetem big haf blo disfala Bible buk. Taem hem raet, hem iusim Hebrew stael poetry wea instead for iusim rhyme, hem iusim olketa idea wea semsem or difren wea diswan minim wanfala laen hem garem sem idea olsem narawan or hem opposite. Proverbs 17:17 hem wanfala example blo parallel poetry, wea mek-tu part blo verse hem givim moa idea for first part. Proverbs 18:24 hem example lo olketa idea wea opposite. “Samfala pipol spoelem fren blo olketa, bat wanfala fren hem stap wea hem lovem iu winim brata blo iu.”
Taem Solomon raetem Proverbs 17:17, hem maet tingim klos frenship wea dadi blo hem, David, garem witim Jonathan, wanfala son blo King Saul. (1 Samuel 13:16; 18:1; 19:1-3; 20:30-34, 41, 42; 23:16-18) Nomata David and Jonathan no relate lo each other, tufala barava klos winim tufala real brata. Jonathan even putim tu laef blo hem lo danger for sevem young fren blo hem.a
Olketa Nara Transleison blo Proverbs 17:17
“Wanfala fren hem showimaot love evritaem, and kamap wanfala brata lo taem blo trabol.”—The Bible in Basic English.
“Fren blo iu, hem fren blo iu for olowe, hem brata blo iu wea born for taem blo trabol.”—The Moffatt Translation of the Bible.
“Wanfala fren hem evritaem showim frenship blo hem—[kaen] brata olsem hem born for taem blo trabol.”—The Complete Jewish Study Bible.
Watchim disfala short video for lukim olketa main point lo buk blo Proverbs.
a Lukim article “Jonathan Barava Fren Gud Witim David.”