Provaedem Relief Aid Taem ‘War Gohed and Iumi Herem Nius Abaotem War’

Lo olketa last day, iumi expectim for ‘herem olketa war and nius abaotem war.’ (Matthew 24:6) Nomata olsem, taem olketa brata and sista kasem hard taem bikos lo olketa event hia, mifala duim samting for helpem olketa. Disfala 2022 Governing Body Update #3 storyim hapi nius abaotem relief waka wea continue lo Eastern Europe for olketa wea war lo Ukraine affectim olketa. Hao nao mifala duim relief waka nomata war continue? Wat benefit nao olketa brata and sista lo Ukraine kasem?

Wat Nao Olketa Needim? Hao Nao Mifala Duim Delivery?

Lo February 24, 2022, wea hem day war happen lo Ukraine, Coordinators’ Komiti appruvim relief budget for assistim olketa brata and sista lo Ukraine. Ukraine branch stretawe peim olketa item lo there and iusim 27 Disaster Relief Komiti wea hem appointim finis for distributim.

Stretawe lo World Hedquarter blo Olketa Jehovah’s Witness waka hem start for faendaot wat practical help nao hem savve duim for assistim Ukraine branch. Coordinators’ and Publishing Komiti blo Governing Body askem Global Purchasing Department for waka witim olketa representative from Ukraine and Poland branch office for help lo diswan and mekem plan lo hao for duim datwan. Olketa from Purchasing, Shipping, and Legal department lo each branch, wanfala member blo Ukraine Branch Komiti, and samfala from Global Purchasing Department meet evriday for storyim wat for duim.

Jay Swinney blo Global Purchasing Department sei: “First, mifala mas disaedem wat nao olketa needim. Mifala laek for provaedem food and olketa hygiene item wea olketa brata and sista getius lo hem. Bat for disaedem wat olketa needim hem wan part nomoa lo problem. Mifala mas disaedem tu hao for duim delivery lo olketa goods hia lo Ukraine taem war continue lo sef wei and kwiktaem.”

Lo March 9, 2022, mifala disaedem finis goods wea olketa needim. Olketa box blo basic food olsem tin meat and fish, grain, rice, and bean, and tu olketa basic hygiene item olsem soap and toilet pepa. Lo dat taem, hem estimated dat for foa week supply for olketa goods hia for wan person bae kost samting olsem $65 (U.S.). From staka thousand brata and sista bae needim olketa samting hia, Coordinators’ Komiti appruvim big budget for provaedem disfala aid. Bat hao nao for no putim laef blo olketa brata lo danger taem olketa delivery lo goods hia?

Lo March 13, tufala brata from Poland duim test delivery from Poland branch office go lo wanfala warehouse klosap lo Lviv, Ukraine. Lo days bifor tufala go, samfala lo Poland and Ukraine branch helpem tufala volunteer hia prepare for datfala trip. Branch duim legal paperwork wea tufala needim for go akros lo border for givim humanitarian aid, and putim saen lo vehicle for showim klia hao tufala duim delivery lo aid, and story witim olketa brata lo Ukraine abaotem fast route afta tufala akrosim border. From olketa prepare gud and Jehovah blessim, relief aid kasem Olketa Disaster Relief Komiti insaed 24 hours afta delivery lo Lviv, and tufala brata return sef lo Poland.

Nomata first test ran successful, delivery wea tufala brata duim hem less than wan metric tonne (1 U.S. tonne) blo aid. Still needim yet estimated 200 metric tonne (220 U.S. tonne)! Hao nao for transportim staka tonne olsem and kwiktaem distributim?

“Pipol blo Iu Bae Willing for Givim Olketa Seleva”

Afta olketa readim olketa report lo jw.org abaotem hao olketa event lo Ukraine affectim olketa brata and sista, pipol evriwea lo world laek help. Staka wea stap farawe donatem selen lo waka wea gohed raonem world blo Olketa Jehovah’s Witness bikos olketa savve bae mifala iusim gud olketa selen hia. Pipol lo olketa kantri wea stap klosap iusim taem, strong, and wat olketa garem for help. Samfala example olsem.

Lo Poland, olketa willing volunteer putim tugeta staka thousand kea package, and olketa pikinini draw lo olketa handmade card. Bartosz Kościelniak, wea waka lo Purchasing Department lo Poland branch sei: “Staka taem mi readim verse lo Psalm 110:3, wea sei pipol blo Jehovah bae willing for givim olketa seleva. Bat taem miseleva lukim hao staka tumas kam for help, staka handred volunteer kam stretawe and redi for waka, datwan showim toktok lo datfala scripture barava tru.”

Wanfala Jehovah’s Witness wea owner lo wanfala international logistics company allowim for iusim olketa trak and peim tu fuel, hem sei: “Hem chance for mi showim mi lovem olketa brata, sista, and Jehovah. Mi hapi tumas for help.” Pipol donatem estimation blo winim 7,700 liter (2,034 gallon) fuel, and olketa brata iusim taem and strong blo olketa for draev klosap samting olsem 48,000 kilometer (30,000 mile) for duim evri delivery!

From olketa brata and sista showim love and willing for help, lo March 28, just 15 days afta first test delivery blo 100 metric tonne (110 U.S. tonne) blo food, olketa hygiene item, and olketa medical supply kasem Ukraine! And bikos olketa brata and sista and olketa company kaen tumas for donatem staka goods, amount lo donated selen blo organization for spendem lo olketa relief package hem reduce narawe. Kam kasem distaem, Olketa Jehovah’s Witness sendem winim 190 metric tonne (209 U.S. tonne) blo relief aid go lo Ukraine. Hao nao olketa delivery hia helpem olketa brata and sista?

“Olketa Garem Tu Love blo Iufala!”

Taem olketa package hia kasem Lviv, Olketa Disaster Relief Komiti evriwea lo Ukraine distributim lo olketa wea needim. Olketa delivery lo olketa aid package lo olketa difren city, samfala city hia winim 1,300 kilometer (800 mile) from Lviv. Nomata mifala duim waka hia lo wei wea organize gud, hem tek taem for duim.a

Markus Reinhardt, wanfala member blo Ukraine Branch Komiti sei: “During hard taem hia, staka brata and sista lukim seleva hao love blo Jehovah and benefit for followim direction from organization blo hem, even bifor disaster happen. For example, evriwan kasem encouragement for garem supply blo food and wata for samfala week lo haos blo olketa. Wanfala elder wea nem blo hem Anton wea serve lo Kyiv sei olsem abaotem datfala direction: ‘Organization blo Jehovah preparem mifala for olketa hard taem, and mifala appreciatim datwan. From mifala garem supply blo food, wata, and radio, datwan sevem laef blo mifala.’ Mifala hapi tumas olketa brata and sista followim datfala direction bikos datwan helpem olketa for gohed laef and stap healthy and hem givim taem for branch office organizem relief waka for olketa.”

Hao nao olketa brata and sista ting lo relief aid wea olketa kasem? Mykola and Zinaida, wea stap lo Kharkiv, storyim feeling blo olketa olsem: “Mifala appreciatim tumas hao iufala kea for mifala. Thankiu tumas for food and medicine. Mifala barava lukim hand blo Jehovah lo diswan.” Valentyna stap lo there tu. Hem sei: “Lo start blo datfala war, pipol mas weit lo staka long laen for peim food lo stoa. Staka taem hem no possible for baem wat mifala needim. Bat Jehovah savve and lukim disfala problem. Hem appointim olketa brother for distributim humanitarian aid lo haos blo mifala, and olketa package garem wat mifala barava needim! Lo olketa hard taem olsem, taem situation hopeles, miseleva feel savve Jehovah and organization blo hem kea for mifala lo barava spesol wei. . . . Hem naes tumas for lukim hao hem helpem and sapotim mifala lo barava taem wea mifala needim.”

Yevhen and Iryna, wea ranawe from Mariupol sei: “Mifala appreciatim tumas hao iufala kea and sapotim famili blo mifala. Hem kam lo barava taem. Iu savve, firstaem mifala tingse hem garem olketa difren item insaed olketa box hia, bat mifala realize olketa garem tu love blo iufala!”

No eni daot hao iu savve lukim holy spirit blo Jehovah and direction wea kam from hem pleim big part for duim delivery blo relief aid lo taem ‘olketa war gohed and iumi herem nius abaotem war.’ Olketa donation wea iu kaen tumas for givim for waka evriwea lo world, and staka donation hia, pipol mekem thru lo donate.jw.org, hem tu important reason why datwan hem possible. Mifala appreciatim tumas kaenfala wei blo iu!

Kwiktaem Provaedem Relief Aid lo Sef Wei

1. 

   February 24, 2022: Coordinators’ Komiti appruvim relief budget for Ukraine, wea allowim branch for start provaedem relief aid

2. 

   February 24–March 8, 2022: Ukraine branch peim samfala item lo Ukraine and start distributim thru lo Olketa Disaster Relief Komiti. Branch office prepare tu for receivim and distributim olketa goods from Poland

3. 

   March 9, 2022: Coordinators’ Komiti appruvim for duim delivery lo humanitarian aid lo Ukraine

4. 

   March 10–12, 2022: Mekem olketa plan for duim test delivery lo food and olketa item from Poland for go lo Lviv, Ukraine

5. 

   March 13, 2022: Test delivery lo food and olketa item for sendem from Poland go lo Lviv, Ukraine

6. 

   March 14–16, 2022: Lo Assembly Hall klosap lo Poznan, Poland, olketa Local Design/Construction volunteer organize for putim tugeta olketa relief package blo food and hygiene item

7. 

   March 17, 2022: Fo days afta test ran successful, start transportim 13 metric tonne (14 U.S. tonne) blo olketa relief package go lo Ukraine border

8. 

   March 21–27, 2022: Followim sem samting, olketa relief package wea leftova, olketa putim tugeta lo Poland and sendem go lo Ukraine, then distributim lo olketa ples wea needim insaed 24 hours

9. 

   March 28, 2022: Insaed 20 days afta approval, 100 metric tonne (110 U.S. tonne) blo food, olketa hygiene item, and medical relief aid olketa duim delivery lo Ukraine

Kam kasem distaem, Olketa Jehovah’s Witness sendem winim 190 metric tonne (209 U.S. tonne) blo relief aid lo Ukraine.