3. Why Nao Gudfala Pipol Kasem Nogud Samting?

Why Iumi Need for Savve

Iumi no laek for lukim gud pipol kasem nogud samting. Samfala sei sapos gud pipol safa, then iumi no need nomoa for duim gud samting.

Samting for Tingim

Samfala pipol bilivim man savve dae and laef bak staka taem. Olketa sei man wea duim gud samting bae kasem gud samting lo next laef blo hem, bat man wea duim nogud samting bae kasem nogud samting lo next laef blo hem. Olketa sei tu nomata samwan hem gudfala man, bae hem safa sapos hem duim nogud samting lo laef blo hem bifor. Bat sapos datwan hem tru . . .

• Sapos man laef bak and no rememberim nogud samting hem duim wea mekem hem safa, hem no mek sense for hem safa.

• From nogud samting wea man duim mekem hem sik or kasem accident, bae hem no need for trae stap healthy or careful for no kasem accident.

  LANEM MOA SAMTING

  Lukim video Why Nao God Letem Wei for Safa Gohed? lo jw.org.

Ansa From Bible

Taem pipol safa hem no from God panisim olketa.

Staka taem pipol kasem nogud samting from seknomoa samting wea olketa no expectim kasem olketa.

“I no olketa hu i save ran kuiktaem nomoa i save winim resis, i no olketa strong man nomoa i save winim faet. I no olketa waes man nomoa i save garem gudfala laef, i no olketa man hu i smat nomoa i save kamap ris, i no olketa man hu i save tumas nomoa wea i garem hae nem. Hem nao bikos, enikaen samting hemi save kasem evriwan ya long enikaen taem.”—EKLESIASTES 9:11.

Iumi safa from iumi born sin.

Samfala sei disfala word “sin” savve minim nogud samting wea man duim. Bat Bible sei tu sin hem samting wea evri man kasem from Adam.

“Stat kam long taem wea mi bon, mi bin sin finis. An stat kam long taem wea mi bon, wei blong mi hemi nogud finis.”—SAMS 51:5.

Sin barava spoelem olketa man.

Sin spoelem wei for pipol fren witim God, and tu, hem mekem olketa man for heitim each other. Dastawe pipol safa tumas.

“Taem mi laek duim samting wea stret, tingting for duim samting wea nogud tu hem stap.”—ROME 7:21.

“Evri samting wea God wakem gohed for krae long heart and safa tugeta kam kasem distaem.”—ROME 8:22.