SAPOS wanfala pablik speaker no tok laod inaf, samfala long audience maet start for sleep. Sapos wanfala pablisa hem tok kwaet tumas long field ministry, maet haosholder lus interest long wanem hem talem. And long olketa meeting wea audience givim koment bat hem no laod inaf, olketa narawan bae no kasem encouragement wea olketa needim. (Heb. 10:24, 25) Long narasaed, sapos speaker hem apim laod bilong hem long taem wea no fitim, audience maet feel nogud—maet les for herem tu.—Prov. 27:14.

Tingim Audience Bilong Iu. Iu toktok long hu? long man wanwan? long wanfala famili? long wanfala smol grup wea hipap for field service? long full kongregeson? or long wanfala bigfala convention? Hem klia hao laod wea fitim wanfala taem bae no fitim narafala taem.

Long samfala difren taem, olketa servant bilong God story long bigfala audience. Long dedication bilong temple long Jerusalem long taem bilong Solomon, no eni saond system stap. So Solomon hem stand antap long wanfala hae platform and blessim pipol “witim laod voice.” (1 Ki. 8:55; 2 Chron. 6:13) Samfala handred year bihaen, bihaen olketa kasem holy spirit long Pentecost long 33 C.E., staka pipol—samfala wea interest, and olketa narawan wea mekfani—hipap raonem datfala smol grup bilong olketa Christian long Jerusalem. Peter showimaot wisdom wea helpem man taem hem “standap . . . and hem apim voice bilong hem.” (Acts 2:14) Hem givim wanfala strongfala witness.

Hao nao iu savve faendaot sapos laod bilong iu hem fitim or nomoa? Best wei hem for lukluk long audience. Sapos iu lukim samfala long audience wea luk olsem no herem iu gud, iu mas trae for apim laod bilong iu.

Nomata iumi toktok long man wanwan or wanfala grup, hem wise for tingim hu nao insaed long audience. Sapos samwan hem earpas lelebet, iu maet need for apim laod bilong iu. Bat wei for tok laod tumas maet mekem olketa olo no mas hapi long iu, from olketa savve herem bat hem wei bilong olketa for slow for showim diswan. Pipol maet tingse iu garem nogud wei. Long kastom bilong samfala, sapos man story laod tumas, pipol tingse hem kros or no patient.

Tingim Olketa Noise wea Disturb. Taem iu duim field ministry, samting wea happen raonem iu hem barava affectim laod wea iu needim for givim witness. Maet iu need for ovarem noise bilong olketa trak, olketa pikinini, dog, laod music or television. Long narasaed, long olketa area wea olketa haos stap klos tugeta, sapos iu tok laod tumas and olketa neiba herem iu, maet haosholder hem feel shame.

Olketa brata tu wea givim tok long kongregeson or olketa convention mas deal witim planti difren samting wea savve happen. For givim tok long audience aotsaed hem barava difren from wei for givim tok insaed wanfala hall wea pipol isi for herem samting. Long Latin America, tufala missionary share for givim pablik tok long courtyard long haos bilong man wea interest taem olketa firecracker bosta long taon area and wanfala kokorako go ahed for mek-noise klosap!

Insaed long wanfala tok, samting maet happen wea needim speaker for stop lelebet kasem taem noise hem finis, or for apim laod bilong hem. Olsem example, sapos meeting go ahed long building wea garem kapa ruf, wanfala big rain savve mekem hem hard tumas for audience herem datfala speaker. Hem wanfala challenge tu taem pikinini hem krae, or pipol wea kam leit mek noise tumas. Lane for changem voice fitim samting wea disturb, mekem audience bilong iu kasem full samting from information long tok bilong iu.

Saond system savve help sapos hem stap, bat hem no minim speaker no need for apim laod bilong hem taem need kamap. Long samfala ples wea paoa hem kat planti taem, olketa speaker mas go ahed givim tok and no iusim microphone.

Tingim Information wea Iu Storyim. Information bilong tok bilong iu savve affectim laod wea iu needim tu. Sapos datfala subject needim strong, no spoelem long wei for tok smol tumas. Olsem example, taem iu readim olketa judgment from Bible, laod bilong voice shud strong winim taem iu readim kaonsel for showimaot love. Changem laod bilong voice fitim information, bat careful for no pullim interest bilong pipol long iu nomoa.

Tingim Goal Bilong Iu. Sapos iu want for muvim audience bilong iu for strong for duim samting, iu maet need for story moa laod. Sapos iu want for changem tingting bilong olketa, no mekem olketa les from iu tok laod tumas. Sapos iu trae for comfortim man, hem moabeta for daonem laod bilong voice.

Iusim Gud Wei for Apim Laod. Taem iu trae for kasem interest bilong man wea busy, wei for tok moa laod savve help. Parents savve long diswan, dastawe olketa apim laod bilong voice for singaotem olketa pikinini for finis plei. Wanfala chairman tu maet need for tok moa laod taem hem startim wanfala kongregeson meeting or assembly. Taem olketa pablisa share long field ministry, olketa maet singaot hello taem olketa go long pipol wea waka aotsaed.

Nomata bihaen iu kasem interest bilong samwan, hem important for go ahed for iusim laod wea fitim. Wanfala voice wea kwaet fogud maet mekem pipol tingse speaker hem no prepare gud or no biliv strong long samting hem talem.

Taem hem join witim wanfala komand, for tok moa laod savve muvim pipol for duim samting. (Acts 14:9, 10) Olsem tu, for singaotem wanfala komand maet stopem barava nogud samting. Long Philippi, man wea gardim prison redy for killim dae hemseleva bikos hem tingse olketa prisoner bilong hem ranawe. “Paul singaot witim laod voice, and sei: ‘No killim iuseleva, from mifala evriwan long hia!’ ” Diswan stopem datfala man for suisaed. Then Paul and Silas givim witness long datfala man wea gardim prison and famili bilong hem, and evriwan acceptim truth.—Acts 16:27-33.

Hao for Mekem Laod Bilong Iu Moabeta. Samfala need for waka moa hard for lane for iusim laod wea fitim. Wanfala man maet tok long wei wea no laod inaf from voice bilong hem wik. Nomata olsem, sapos hem trae hard hem savve kamap moabeta, nomata hem maet go ahed for toktok long kwaet wei. Lukluk gud long wei wea iu breathe and standap. Practicem wei for sidaon and standap stret. Standap stret, and breathe big. Mek sure iu fulimap botom long lungs bilong iu. Disfala wind, taem iu iusim gud, savve helpem iu for kontrolem laod bilong toktok bilong iu.

Problem bilong narafala pipol hem wei wea olketa tok laod tumas. Maet diswan kamap wei bilong olketa from olketa waka aotsaed or long ples wea hem noise tumas. Or maet olketa growap insaed famili wea garem fasin for singaot big and disturb. From diswan, olketa maet tingse only wei for join insaed story, hem for tok moa laod winim evri narawan. Taem olketa go ahed for obeyim kaonsel bilong Bible for werem “fasin for kea, kaenfala fasin, hambol tingting, kwaet fasin, and long-safaring,” olketa bae changem laod bilong voice taem olketa story witim narafala pipol.—Col. 3:12.

Wei for prepare gud, savve wea iu kasem from iu share long field service evritaem, and prea long Jehovah bae helpem iu for tok witim laod wea fitim. Nomata iu tok long platform or long man wanwan long field ministry, trae hard for tingim hao nara man savve kasem help sapos hem herem samting wea iu talem.—Prov. 18:21.

FOR iusim simpol wei for strongim word hem helpem audience for minim samting wea iu talem. Bat pipol bae enjoyim tok bilong iu long big wei moa taem iu mekius long olketa difren wei for changem laod, fast, and wei for apim or daonem voice. Winim datwan, wei wea iu duim olsem bae mekem audience savve long feeling bilong iu abaotem samting wea iu talem. Wei wea iu ting long datfala information savve affectim feeling bilong olketa abaotem datwan tu. Diswan hem tru nomata iu toktok long platform or long man wanwan long field ministry.

Voice bilong man hem wanfala nambawan instrument, fit for duim staka difren samting. For iusim long stretfala wei savve mekem wanfala tok interesting, kasem heart, muvim feeling, and muvim pipol for duim samting. Bat, iu no savve duim diswan nomoa long wei for putim mark insaed olketa note bilong iu for showim iu ples wei iu mas changem laod, fast, or for apim or daonem voice. For changem voice followim mark olsem bae here nogud. Winim wei for mekem tok bilong iu interesting, datwan maet mekem audience feel nogud. For iusim wei for changem voice long stretfala wei hem kam from heart.

Taem hem iusim long wisefala wei, wei for changem voice bae no mekem pipol tingim speaker nomoa. Bat, hem bae helpem audience for kasholem really mining bilong datfala subject wea hem storyim.

Changem Laod. Wanfala wei for changem wei wea iu story hem for changem laod bilong iu. Bat diswan mas no wei for apim or daonem laod long wei wea semsem evritaem. For duim olsem savve spoelem mining bilong samting wea iu talem. Sapos iu apim laod staka taem tumas, bae hem here nogud.

Laod bilong iu mas fitim datfala information. Nomata iu readim wanfala komand wea important tumas, olsem Revelation 14:6, 7 or Revelation 18:4, or wanfala toktok wea showimaot strong, olsem Exodus 14:13, 14, hem gud for apim laod long wei wea fitim. Long sem wei, sapos iu readim wanfala strongfala judgment from Bible, olsem long Jeremiah 25:27-38, wei for changem laod bilong iu bae mekem samfala toktok showaot klia.

Tingim tu, goal bilong iu. Waswe, iu want for muvim audience for duim samting? Waswe, iu want for mekem olketa main point insaed tok bilong iu showaot klia? For toktok moa laod long balance wei savve helpem iu for kasem olketa goal hia. Bat, for apim laod bilong iu nomoa maet spoelem goal bilong iu. Long wanem wei? Samting iu talem maet needim feeling, no wei for moa laod. Iumi bae storyim diswan long Study 11.

Sapos iumi duim witim fasin for luksavve, wei for daonem laod savve muvim audience for luk forward long samting. Bat for duim olsem planti taem needim man for strongim saond bilong voice stretawe bihaen. Wei for daonem laod and strongim saond bilong voice hem fitim for showimaot wari or fraet. For daonem laod maet showimaot tu hao samting wea iu talem hem no important olsem olketa nara samting wea stap raonem. Bat, sapos voice bilong iu evritaem kwaet tumas, diswan maet mekem audience tingse iu no sure or no biliv strong or no really interest long subject bilong iu. Tru tumas, speaker mas careful hao nao hem iusim barava low voice.

Changem Fast Bilong Iu. Long toktok bilong iumi evriday, olketa word kamaot isi nomoa taem iumi talemaot tingting bilong iumi. Taem iumi hapi tumas, iumi tok fast. Taem iumi laekem narawan for barava no forgetim samting wea iumi talem, iumi talem moa slow.

Bat, planti niu speaker no changem fast bilong olketa. Why nao olsem? From olketa tingting tumas nomoa long olketa word for talem. Maet olketa raetem evri samting. Nomata sapos hem no readim from wanfala manuscript, hem maet baeheartim olketa word. From diswan, hem talem evri samting long wei wea semsem nomoa. For lane for givim tok from aotlaen bae help for stretem disfala problem.

Stap klia long wei for kwiktaem change for moa fast wea olsem wanfala puskat wea wakabaot and seknomoa hem jamp taem hem lukim wanfala dog. And no enitaem tok fast tumas wea mekem iu no talem stret olketa word.