Olketa Disaepol Kasem Holy Spirit

Tenfala day afta Jesus go bak lo heven, olketa disaepol blo hem kasem holy spirit. Datwan hem lo Pentecost 33 C.E., and staka pipol kam from olketa difren ples for celebrate lo Jerusalem. Samting olsem 120 disaepol blo Jesus hipap tugeta lo rum ontop lo wanfala haos. Seknomoa wanfala sapraesing samting happen. Wanfala samting olsem smol fire appear ontop hed blo each disaepol, and olketa start for story lo olketa difren languis. And wanfala laod noes wea here olsem big wind hem mek noes insaed full haos.

Pipol from olketa difren ples wea kam lo Jerusalem herem datfala noes and ran go lo datfala haos for lukim wat nao happen. Olketa sapraes tumas taem olketa herem olketa disaepol story lo olketa languis hia. Olketa sei: ‘Bat evri pipol hia olketa from Galilee, iaman? Hao nao olketa savve story lo languis blo iumi?’

Then Peter and olketa nara aposol standap front lo pipol hia. Peter storyim lo pipol hia hao olketa killim dae Jesus and Jehovah mekem hem for laef bak. Peter sei: ‘Distaem Jesus hem lo heven lo raet hand blo God, and hem givim kam holy spirit wea hem promisim. Dastawe iufala lukim and herem olketa mirakol hia.’

Olketa samting wea Peter storyim barava encouragem pipol hia and olketa ask olsem: ‘Wat nao mifala mas duim?’ Hem talem olketa: ‘Iufala mas repent from olketa sin blo iufala and each wan lo iufala mas baptaes lo nem blo Jesus. Iufala tu bae kasem holy spirit wea hem present from God.’ Lo datfala day, samting olsem 3,000 pipol nao baptaes. Start from datfala taem, kwiktaem nomoa olketa disaepol gohed for increase lo Jerusalem. Witim help blo holy spirit olketa aposol startim staka kongregeson moa, mekem olketa savve teachim olketa disaepol lo evri samting wea Jesus komandim olketa for duim.