Eni Samting Savve Really Mekem Pipol Wan Mind?
NOMATA wanem nao biliv bilong iu, maet iu agree hao evri religion garem samfala pipol wea lovem truth. Pipol wea barava tinghae long tru samting and willing for lukaotem, stap midolwan olketa Hindu, Catholic, Jew, and olketa nara religion. Bat, luk olsem religion divaedem olketa man. Samfala iusim religion for duim nogud samting. Waswe, fitim enitaem for honest pipol from evri religion wea lovem gud samting and tru samting for garem wan mind? Waswe, olketa bae fit for garem wan mind for duim wanfala samting?
Hem nogud for lukim wei wea religion kosim wei for divaed hem kamap moa big! Tingim samfala long olketa faet hia. Olketa Hindu faetem olketa Buddhist long Sri Lanka. Olketa Protestant, Catholic, and olketa Jew kill-kill insaed olketa difren war. Pipol wea sei olketa Christian faetem olketa Muslim long Chechnya, Indonesia, and Kosovo. And long March 2000, 300 pipol bilong Nigeria dae insaed wanfala raoa wea go ahed for tufala day wea join witim religion. Tru nao, fasin for heitim nara religion kosim olketa raoa hia.
Evritaem olketa honest pipol feel nogud long olketa samting wea olketa duim long nem bilong religion. Olsem example, planti wea go long church no feel gud abaotem wei wea samfala church acceptim nomoa olketa bigman bilong church wea spoelem olketa pikinini saed long sex. Olketa narawan wea biliv shame tumas from planti Christian sect no garem wan mind long olketa samting olsem homosexual fasin and wei for killim dae pikinini insaed bele. Tru nao, religion nating mekem olketa man for garem wan mind. Nomata olsem, olketa wea lovem truth stap insaed planti religion, olsem olketa experience long daon showimaot.
Olketa Barava Laekem Truth
Fidelia hem wanfala worshiper wea honest and loyal long wanfala Church bilong Catholic bilong San Francisco long La Paz, Bolivia. Hem bow daon front long image bilong Mary and putim olketa best kandol wea hem baem front long kros . Each week, hem donatem staka kaikai long olketa priest for givimaot long poor pipol. Nomata olsem, faevfala baby bilong Fidelia dae bifor olketa fit for baptaes. Taem priest talem hem hao olketa evriwan safa long darkness bilong Limbo, Fidelia ting olsem, ‘Sapos God hem loving, why nao diswan happen?’
Tara, wanfala medical doctor, hem growap olsem wanfala Hindu long Kathmandu, Nepal. For followim olketa old kastom bilong olketa laen dadi bilong hem, hem worshipim olketa god bilong hem long olketa Hindu temple and garem olketa idol long haos bilong hem. Bat Tara hem konfius long olketa kwestin olsem: Why nao wei for safa hem big tumas? Why nao pipol dae? Hem nating faendem eni ansa insaed religion bilong hem wea mekem hem satisfae.
Long narasaed, Panya, hem growap olsem wanfala Buddhist long wanfala haos saed long wata long Bangkok, Thailand. Olketa teachim hem hao wei for safa hem kamaot from samting wea man duim long laef bilong hem bifor and for kamap free from diswan, man mas stap klia evribit from evri wei for wantem samting. Olsem olketa nara Buddhist wea honest, olketa teachim hem for garem deep respect for wisdom bilong priest wea werem yellow kaleko and wea kam long haos evri morning for tekem donation for poor pipol. Hem practicem meditation and kolektem olketa image bilong Buddha from hem bilivim hao olketa givim protection. Bihaen hem kasem bigfala accident wea mekem tufala leg bilong hem paralyze, Panya visitim olketa Buddhist monastery, from hem hope for kasem cure long mirakol wei. Hem nating faendem cure or spiritual savve. Bat olketa showim hem spiritism and then hem start for duim.
Virgil hem born long United States and joinim olketa Black Muslim long college. Hem strong for givimaot buk bilong olketa, wea teachim hao olketa white man nao datfala Devil. Olketa sei hem nao why olketa white man duim planti barava nogud samting againstim blak pipol. Nomata hem honest long olketa biliv bilong hem, Virgil still garem olketa kwestin olsem: Hao nao evri white man nogud? And why nao selen evritaem join long preaching bilong olketa?
Nomata Charo growap long South America wea staka nao Catholic, hem wanfala Protestant wea honest. Hem hapi for no join insaed wei for worshipim idol wea stap raonem hem. Charo enjoyim wei for go long church evri Sunday wea datfala service hem garem strongfala feeling, wea hem singaot “Hallelujah!” and join insaed lotu singsing and dance wea go ahed bihaen. Charo biliv strong hao hem sev finis and hem born moa. Hem peim mek-ten part long wages bilong hem long church, and taem TV evangelist wea hem laekem tumas ask for contribution, hem sendem selen for olketa pikinini long Africa. Bat taem hem askem pastor bilong hem why nao wanfala God bilong love mekem olketa soul for safa long hell, hem luksavve hao hem nating garem stretfala ansa. Bihaen, hem faendemaot tu hao olketa nating iusim olketa contribution bilong hem for helpem olketa pikinini long Africa.
Nomata olketa kam from difren kaen living, faevfala hia semsem long wanfala wei. Olketa lovem truth and barava lukaotem trufala ansa for kwestin bilong olketa. Bat, waswe, olketa savve really wan mind long tru worship? Nextfala article bae ansarem datfala kwestin.
[Piksa long page 4]
Waswe, pipol wea kam from difren kaen living fit for garem wan mind?
[Piksa Credit Line long page 3]
G.P.O., Jerusalem