Why Iumi No Savve Stap Seleva Evribit
“Tufala hem moabeta winim wanfala . . . Sapos wanfala long tufala hem foldaon, narawan savve helpem partner bilong hem for standap.”—King Solomon
KING SOLOMON bilong Israel bifor sei olsem: “Tufala hem moabeta winim wanfala, bikos tufala garem gudfala reward for hard waka bilong tufala. From sapos wanfala long tufala hem foldaon, narawan savve helpem partner bilong hem for standap. Bat hao nao sapos wanfala hem foldaon and no eniwan stap for helpem hem standap?” (Ecclesiastes 4:9, 10) Disfala wise man wea studyim fasin bilong man mekhae long need for iumi garem fren and wei wea hem important for iumi no stap seleva. Bat, diswan hem no tingting bilong man nomoa. Olketa toktok bilong Solomon kam from wisdom bilong God and wea God muvim hem for raetem.
Hem no wise for iumi stap seleva. Pipol needim narawan. Iumi evriwan needim strong and help wea iumi savve kasem from olketa nara man. Wanfala Bible proverb sei: “Man wea stap seleva bae tingim nomoa samting wea hemseleva laekem; bae hem go againstim evri gudfala wisdom.” (Proverbs 18:1) So hem no wanfala niu idea taem olketa scientist wea studyim pipol encouragem olketa man for joinim wanfala grup and fren witim narawan.
Long samfala wei for startim bak community laef, Professor Robert Putnam talem wanfala wei hem for “garem strongfala faith long God.” Olketa Jehovah’s Witness nao nambawan example long diswan from olketa enjoyim protection insaed olketa kongregeson wea olsem wanfala famili raonem full earth. Followim toktok bilong aposol Peter, olketa “garem love for full sekson bilong olketa brata,” wea “fraet long God.” (1 Peter 2:17) Olketa Witness stap klia long nogud samting wea savve kamaot from wei for stap seleva bikos olketa gudfala waka for saportim tru worship keepim olketa busy long wei for helpem olketa neiba lane abaotem truth wea stap long Word bilong God, Bible.—2 Timothy 2:15.
Love and Wei for Fren Changem Laef
Olketa Jehovah’s Witness hem wanfala community wea wan mind and evri member bilong hem duim important waka. Olsem example, tingim Miguel, Froylán, and Alma Ruth, thrifala member bilong wanfala famili from Latin-America. Olketa born witim wanfala sik wea mekem olketa short tumas. Thrifala evriwan iusim wheelchair. Hao nao wei for kaban witim olketa Witness changem laef bilong olketa?
Miguel tok olsem: “Mi go thru olketa hardfala taem, bat taem mi start for kaban witim pipol bilong Jehovah, laef bilong mi hem change. For stap seleva hem wanfala danger. For kaban witim olketa Christian brata long olketa Christian meeting evri week hem helpem mi for satisfae long bigfala wei.”
Alma Ruth sei olsem: “Bifor, mi savve feel sorre tumas. Bat taem mi lane abaotem Jehovah, mi feel mi savve fren long klos wei witim hem. Datwan nao kamap first samting long olketa important samting long laef bilong mi. Famili bilong mi givim mifala bigfala saport saed long feeling and spiritual wei, and diswan nao mekem mifala wan mind.”
Dadi bilong Miguel kaen tumas for teachim hem hao for read and raet. Then Miguel teachim Froylán and Alma Ruth for read and raet. Diswan hem barava important long spiritual wei. Alma Ruth sei: “For lane for read mekem mifala kasem gudfala samting long bigfala wei bikos mifala kasem spiritual kaikai thru long wei for readim Bible and olketa Bible pablikeson.”
Distaem Miguel hem wanfala Christian elder. Froylán readim full Bible naenfala taem finis. Alma Ruth mekem service bilong hem for Jehovah moa big olsem wanfala pioneer minister wea full-taem for talemaot Kingdom, start kam from 1996. Hem tok olsem: “Mi kasem disfala goal from blessing bilong Jehovah, and witim saport bilong olketa Witness sista wea helpem mi for preach and for conductim 11-fala Bible study.”
Narafala nambawan example hem Emelia. From hem kasem accident and garekil long leg and bak bone, hem mas iusim wheelchair. Olketa Jehovah’s Witness long Mexico City studyim Bible witim hem, and hem baptaes long 1996. Emelia sei: “Taem mi no savve long truth yet, mi laek for suisaed, mi no laek laef moa. Mi barava feel laef no garem eni purpose, and mi krae day and naet. Bat taem mi kaban witim pipol bilong Jehovah, mi feelim love bilong olketa brata. Wei wea olketa showim interest long mi encouragem mi. Wanfala elder hem barava olsem brata or dadi bilong mi nao. Datfala elder and samfala ministerial servant tekem mi go long olketa meeting and for duim preaching waka long wheelchair.”
José, wea baptaes olsem wanfala Jehovah’s Witness long 1992, hem stap seleva. Hem 70 year and retire long 1990. Bifor, José savve experiencem sorre feeling, bat bihaen wanfala Witness preach long hem, stretawe hem attendim olketa Christian meeting. Hem laekem wanem hem herem and lukim long there. Olsem example, hem lukim wei for fren midolwan olketa brata and feelim tu wei wea olketa interest long hem. Distaem, olketa elder and ministerial servant long kongregeson lukaftarem hem. (Philippians 1:1; 1 Peter 5:2) Olketa Christian brata hia “strongim” hem. (Colossians 4:11) Olketa tekem hem go long doctor, visitim hem, and givim saport saed long feeling long taem hem kasem fofala operation. Hem sei olsem: “Olketa showimaot wei for kea. Olketa nao really famili bilong mi. Mi enjoyim wei for fren witim olketa.”
Trufala Hapi Kamaot From Wei for Give
Taem King Solomon sei “tufala hem moabeta winim wanfala,” hem just finis for storyim wei wea hem iusles for man iusim full strong bilong hem for kasem material riches. (Ecclesiastes 4:7-9) Diswan nao samting wea planti aftarem distaem, nomata diswan minim wei for sakrifaesim wei for fren insaed famili and witim olketa narawan.
Datfala spirit bilong greedy fasin and selfish tingting mekem planti for laek stap seleva. Diswan nating mekem olketa hapi or satisfae long laef, from planti taem wei for kros and feeling for no garem eni hope kasem olketa wea laek for stap seleva. Long narasaed, olketa example iumi bin storyim showimaot olketa gud samting wea kamaot from wei for kaban witim olketa wea servem Jehovah from love for hem and neiba nao muvim olketa. For evritaem attendim olketa Christian meeting, kasem saport and kea bilong olketa Christian brata, and strong for duim ministry hem helpem olketa for winim nogud feeling wea join witim wei for stap seleva.—Proverbs 17:17; Hebrews 10:24, 25.
From iumi depend long narawan, iumi savve feel satisfae taem iumi duim olketa samting for narawan. Albert Einstein, man wea waka bilong hem givim gud samting long nara pipol sei: “Wei wea man hem important . . . shud depend long wanem hem givim and no wanem hem kasem.” Diswan agree witim disfala toktok bilong Lord Jesus Christ: “Moa hapi kamaot from wei for give winim wei for kasem.” (Acts 20:35) So, nomata hem gud for kasem love, wei for showimaot love long olketa narawan savve mekem feeling and physical health kamap moabeta.
Wanfala traveling overseer wea for planti year visitim olketa kongregeson for givim spiritual help and wea help tu for buildim olketa Kingdom Hall talemaot feeling bilong hem olsem: “Hapi wea mi kasem for servem and lukim hapi feis bilong olketa brata muvim mi for go ahed for luk aotem chance for givim help. Mi experiencem hao wei for showimaot interest long narawan nao hem key for hapi. And for olsem olketa elder, mifala shud ‘kamap olsem wanfala ples for haed from wind . . . , olsem river long drae ples, olsem shadow bilong bigfala ston long hotfala ples.’ ”—Isaiah 32:2.
Hem Naes Tumas for Stap Tugeta Long Wan Mind!
Nambawan samting and trufala hapi bae kamaot from wei for helpem olketa narawan and for fren witim olketa wea servem Jehovah. Man for raetem psalm singaot olsem “Lukim! Hem gud and naes tumas for olketa brata for stap tugeta long wan mind!” (Psalm 133:1) Hem important for famili wan mind for saportim narawan, olsem example bilong Miguel, Froylán, and Alma Ruth showimaot. And hem wanfala blessing for garem wan mind witim narawan long tru worship! Bihaen hem givim kaonsel long olketa Christian hasband and waef, aposol Peter raet olsem: “Lastfala samting, iufala evriwan mas garem wankaen tingting, showim feeling long narawan, garem love olsem brata, garem fasin for kea, hambol long mind.”—1 Peter 3:8.
Trufala wei for fren savve bringim planti gud samting saed long feeling and spiritual wei. Taem hem raet for olketa fren bilong hem long faith, aposol Paul encouragem olketa olsem: “Tok kaen long olketa soul wea feel sorre, saportim olketa wea wik, showimaot long-safaring long evriwan. . . . Evritaem aftarem samting wea gud long each wan and long evriwan.”—1 Thessalonians 5:14, 15.
So, luk aotem olketa wei for duim wanem hem gud long olketa narawan. “Duim gud samting long evriwan, bat main wan nao long olketa wea garem sem faith olsem [iu],” from diswan nao bae mekem laef bilong iu garem mining and for satisfae. (Galatians 6:9, 10) Disaepol bilong Jesus, James, raet olsem: “Sapos wanfala brata or sista no garem inaf kaleko and kaikai for datfala day, bat wanfala long iufala sei long olketa: ‘Go long peace, stap gud and kaikai gud,’ bat iufala no givim samting wea body bilong olketa needim, hao nao diswan bae helpem olketa?” (James 2:15, 16) Ansa hem klia. Iumi mas ‘no interest long olketa samting bilong iumiseleva, bat interest long olketa samting bilong narafala pipol tu.’—Philippians 2:4.
For join witim wei for helpem olketa narawan long material wei long taem bilong spesol need or disaster, Olketa Jehovah’s Witness barava busy for duim wanem hem gud for olketa narawan long wanfala important wei—for preachim gud nius bilong Kingdom bilong God. (Matthew 24:14) Winim 6,000,000 Witness duim disfala waka for talemaot message bilong hope and comfort wea showimaot olketa garem trufala loving interest long olketa narawan. Bat for givim help from olketa Holy Scripture hem help tu for meetim nara important need bilong man. Wanem nao datwan?
Wanfala Barava Important Need
For kasem trufala hapi, iumi need for garem stretfala wei for fren witim God. Long buk bilong hem, Man Does Not Stand Alone, A. Cressy Morrison sei: “Tru samting nao from kam kasem distaem, long evriwea and evritaem, man garem feeling for luk long samting wea hem bilivim wea moa hae and garem moa paoa winim hemseleva, diswan showaot man born witim feeling for followim religion and science shud luksavve long diswan. . . . Iumi shud tinghae and respectim wei wea evri man luk aotem and biliv long samwan wea barava hae.”
Jesus Christ tok olsem: “Hapi nao olketa wea luksavve long spiritual need bilong olketa.” (Matthew 5:3) Pipol no savve deal witim laef sapos olketa stap seleva for longfala taem from olketa nara man. Bat, hem moa serious sapos iumiseleva stap farawe from Creator bilong iumi. (Revelation 4:11) Wei for kasem and followim “barava savve bilong God” shud kamap wanfala important part long laef bilong iumi. (Proverbs 2:1-5) Tru nao, iumi shud trae hard for satisfaem spiritual need bilong iumi, from iumi no savve stap seleva evribit and separate from God. Wanfala hapi and nambawan laef hem depend long gudfala wei for fren witim Jehovah, “Most Hae ovarem full earth.”—Psalm 83:18.
[Piksa long page 5]
Miguel: “Mi go thru olketa hardfala taem, bat taem mi start for kaban witim pipol bilong Jehovah, laef bilong mi hem change”
[Piksa long page 5]
Alma Ruth: “Taem mi lane abaotem Jehovah, mi feel mi savve fren long klos wei witim hem”
[Piksa long page 6]
Emelia: “Taem mi no savve long truth yet, . . . Mi barava feel laef no garem eni purpose”
[Piksa long page 7]
For kaban witim olketa trufala worshiper hem help for satisfaem spiritual need bilong iumi