6-fala Wei for Keepim Gud Health Bilong Iu

Challenge Long Olketa Poor Kantri

PLANTI pipol distaem mas barava waka hard for stap klin, especially long kantri wea sef wata and klin living hem hard for kasem. Nomata olsem, hem barava important for stap klin. Winim haf long olketa sik and dae midolwan olketa young pikinini hem kamap from olketa germ wea go insaed mouth bikos hand bilong olketa dirty or kaikai or wata wea no klin. Iumi savve stap klia long olketa sik hia, especially diarrhea, sapos iumi followim idea long daon wea kam from Facts for Life, wanfala buk wea United Nations Children’s Fund pablisim.

1 Torowem siti long sef wei

Planti germ stap long siti. Taem olketa germ wea mekem man sik go insaed long wata and kaikai or kasem hand, samting for kaikai from, or ples wea iumi wakem kaikai, hem savve go insaed mouth and man swallowim, wea kosim sik. For torowem evrikaen siti nao gud wei for stopem olketa germ olsem for kamap. Siti bilong man shud go insaed toilet. Lukluk gud for no eni siti bilong animal wea stap klosap long haos, ples for wakabaot, or ples wea pikinini savve plei.

Sapos no eni toilet stap, kwiktaem berem siti. Tingim hao evri siti karem olketa germ wea savve mekem sik kamap, nomata siti bilong baby. Siti bilong pikinini tu mas go insaed toilet or berem.

Klinim olketa toilet evritaem. Kavarem toilet and flasim.

2 Wasim hand bilong iu

Iu mas wasim hand evritaem. Wei for wasim hand witim soap and wata bae aotem germ. For wasim hand long wata nating hem no inaf​—⁠iu mas rabem tufala hand evriwan witim soap or asis bilong fire.

Barava important for wasim hand bihaen iu go long toilet and bihaen iu klinim ass bilong baby or eni pikinini wea siti. And tu, wasim hand bihaen iu tasim animal, bifor iu tasim kaikai, and bifor iu feedim pikinini.

For wasim hand savve protectim pipol from olketa worm wea mekem sik kamap. From olketa worm hia smol tumas man needim microscope for lukim. Olketa stap insaed siti and mimi, antap long wata and graon, and insaed meat wea no kuk or wea no tan gud. Wanfala main wei for stopem olketa germ for no go insaed body hem for wasim hand bilong iu. And tu, for werem shoe taem iu stap klosap long toilet bae stopem worm wea stap long there for go insaed body bilong iu thru long skin long leg bilong iu.

Planti taem pikinini savve putim hand bilong hem insaed mouth bilong hem, so wasim hand bilong hem evritaem, especially bihaen olketa go long toilet and bifor olketa kaikai. Teachim olketa for wasim hand bilong olketa seleva and for no plei klosap long toilet or ples for siti long hem.

3 Wasim feis bilong iu evriday

For helpem iu no kasem soa long eye, wasim feis witim soap and wata evriday. Wasim tu feis bilong olketa pikinini. Flae wea karem olketa germ laekem feis wea dirty. Olketa germ hia savve kosim soa long eye and tu mekem man kamap blind.

Chekim eye bilong pikinini bilong iu evritaem. Eye wea healthy hem no drae and hem shaen. Sapos eye bilong hem drae, red, soa, or sapos eni samting kamaot from hem, tekem pikinini bilong iu for lukim eni nurse or doctor.

4 Iusim klin wata nomoa

Olketa famili no sik tumas taem olketa iusim klin wata and keepim gud from olketa germ. Maet wata bilong iu hem klin sapos hem kam followim gudfala pipe or kam from well and spring wea no dirty. Hem no isi for keepim klin wata wea kam from stream, river, and open tank, bat wei for boelem wata hia savve mekem hem sef.

Kavarem olketa well. Wasim evritaem baket, rope and container wea iu iusim for tekem and keepim wata long hem, and putim long klin ples, no long graon. Keepim animal farawe from ples wea wata for drink kam from and from ples wea famili stap. No iusim pesticide or chemical klosap long ples wea wata kam from.

Insaed long haos, keepim wata insaed klin container wea garem kava. Hem gud for garem wata container wea garem tap. Sapos no eni tap, iusim wanfala kap for tekem wata from container. No tasim wata for drink witim hand wea no klin.

5 Protectim kaikai from olketa germ

Sapos iu kukim gud kaikai, bae iu killim evri germ. Kukim gud kaikai, especially meat and kokorako. Olketa germ savve kwiktaem kamap staka insaed kaikai wea no hot tumas. Dastawe hem gud for kwiktaem kaikaim kaikai bihaen hem tane. Sapos iu need for keepim kaikai for winim tu hour, iu mas putim long ples wea hem hot or cold. And tu, sapos iu laek keepim kaikai for narataem, kavarem. Diswan bae protectim from flae or insect. Bifor iu kaikaim kaikai, hotem moa datfala kaikai.

Milk bilong susu nao best and sef for baby and young pikinini. Hem no wise for drinkim milk wea kam stret from animal wea iu no boelem firstaem. No iusim susu botol sapos hem hard for iu klinim witim wata wea boel. Olketa susu botol staka taem karem germ wea kosim diarrhea. Hem gud for susum pikinini or feedim from wanfala klin, open kap.

Wasim frut and vegetable witim klin wata. Diswan hem moa important sapos iu givim kaikai wea no kuk long baby and young pikinini.

6 Torowem evri rabis wea stap long haos

Evri flae, cockroach, rat, and mice karem olketa germ. Evri samting hia laef gud long rabis. Sapos long ples wea iu stap no garem eni arrangement for torowem rabis, putim evri rabis bilong iu insaed wanfala bigfala hol wea iu savve berem or bonem long next day. Keepim haos bilong iu klin and no keepim rabis or wata wea iu waswas witim.

Sapos iu followim olketa idea hia, bae iu lukim olketa kamap part long evriday living bilong iu. Olketa no hard and no needim planti selen for duim, bat bae olketa protectim health bilong iu and famili bilong iu.

[Piksa long page 25]

Sapos no eni toilet stap, kwiktaem berem siti

[Piksa long page 25]

Iu mas wasim hand evritaem

[Piksa long page 26, 27]

Wasim feis witim soap and wata evriday

[Olketa piksa long page 26]

Olketa famili no sik tumas taem olketa iusim klin wata and keepim gud from germ

[Piksa long page 27]

Sapos iu laek keepim kaikai for narataem, kavarem

[Piksa long page 27]

Mas berem or bornem evriday rabis bilong haos