Wei for Disable No Garem Spialaen

OLKETA soldia long wanfala kantri long Africa kasholem Christian and trae for forcem hem for joinim army, bat hem no willing for duim olsem from conscience bilong hem wea Bible trainim no letem. Then olketa soldia tekem hem long wanfala army camp and, bihaen olketa hitim hem for fofala day, wanfala long olketa sutim leg bilong hem. Christian kasem wanfala hospital bat olketa need for katemaot leg bilong hem anda long knee. Long nara kantri long Africa, nomata olketa barava smol pikinini, olketa militant katemaot hand or leg bilong olketa. Long Cambodia, Balkans, Afghanistan, and Angola, olketa land mine go ahed for kosim wei for disable midolwan young and olo pipol evriwan.

Nara samting wea kosim diswan hem olketa accident and sik olsem diabetes. Olketa poison long air tu savve kosim wei for disable. Olsem example, long wanfala area bilong wanfala taon long Eastern Europe, samfala pikinini born kam witim haf arm nomoa. Pruv showaot chemical pollution nao kosim diswan. Olketa narawan garem arm bat olketa disable from part bilong body paralyze or kasem nara problem. Tru nao, wei for disable no garem spialaen.

Nomata wanem nao kosim, wei for disable savve barava spoelem man. Junior lusim botom haf long left leg bilong hem taem hem 20 year. Hem sei bihaen: “Mi kasem staka pain saed long feeling. Mi krae planti taem from mi savve mi hard for kasem bak leg bilong mi. Mi nating savve wanem for duim. Mi konfius.” Bat gogo, tingting bilong Junior barava change. Hem start for studyim Bible and lanem olketa samting wea helpem hem deal witim diswan and givim hem nambawan hope for wanfala hapi future hia long earth. Sapos iu tu wanfala wea disable, waswe, bae iu laek for garem disfala hope?

Sapos olsem, then plis readim nextfala article. Hem bae gud for iu readim olketa Scripture long Bible bilong iu mekem iu savve lukim seleva wanem nao Creator bae duim long future for olketa wea lanem purpose bilong hem and changem living bilong olketa followim datwan.