Wanem Nao Barava Happen Long Man wea Dae?

“Evri soul no savve dae, nomata olketa rabis man tu . . . Olketa panis long fire wea no savve finis, and from olketa no dae, hard tumas for wei wea olketa safa hem finis.”​—Clement of Alexandria, man for raet long mek-tu and mek-thri century C.E.

OLSEM Clement talem, olketa wea mekhae long hell olsem ples for safa bilivim hao man garem soul wea no savve dae. Waswe, teaching olsem stap long Bible? Ting raonem ansa wea Bible talem for olketa kwestin long daon.

Waswe, firstfala man Adam savve dae? No longtaem bihaen God wakem Adam, hem givim disfala law long hem: “From evri tree long garden iu savve kaikai gogo iu fulap. Bat iu mas no kaikai from tree bilong gudfala savve and nogud savve, bikos long day wea iu kaikaim bae iu dae.” (Genesis 2:16, 17) Tru nao, Adam savve dae.

Gogo, wanem nao kasem Adam bihaen hem sin? Panis wea God givim Adam, hem no for safa long hell for olowe. Catholic New American Bible storyim law bilong God long disfala wei: “Long swet bilong feis bilong iu, iu bae tekem bred for kaikaim, go kasem taem iu go bak long graon wea iu kam from; from iu nao graon, and iu bae go bak long graon.” (Mifala nao staelem leta; Genesis 3:​19) Toktok wea God talem nating storyim hao eni part bilong Adam bae laef bihaen hem dae.

Waswe, eni man no savve dae? Nomoa nao, evriwan savve dae. Long Ecclesiastes 3:20, Bible talem olsem: ‘Evriwan bae go long sem ples. Olketa kam from dust, and olketa go bak long dust.” Aposol Paul talem: ‘Wanfala man mekem sin kam insaed long world and dae hem kam from sin, dastawe evri man dae bikos evriwan sin.’ (Romans 5:​12) Evri man sin dastawe nao olketa savve dae.

Waswe, man wea dae hem savve long eni samting? Bible talem olsem: “Olketa wea laef savve olketa bae dae, bat olketa wea dae finis no savve long eni samting.” (Ecclesiastes 9:5) Bible storyim samting wea happen taem man hem dae: ‘Hem go bak long graon; Long datfala day tingting bilong hem finis nao.’ (Psalm 146:4) Sapos man wea dae “no savve long eni samting” and “tingting bilong hem finis nao,” hao nao bae hem savve hem safa long hell?

Jesus Christ markem dae witim man wea sleep no witim man wea wekap.a (John 11:11-​14) Bat samfala no agree and sei Jesus teachim hao hell hem hotfala ples and olketa man wea sin bae go long hellfire. Distaem, iumi bae storyim barava samting wea Jesus talem abaotem hell.

[Footnote]